Klei Aê Diê Blŭ: Klei Mtô Mñă Klei Bhiăn 32:34-39
Êlan kliăng: “Ară anei brei diih thâo kâo, kâo gơ̆, jing Aê Diê, leh anăn amâo mâo yang mkăn ôh êngao kơ kâo; kâo bi mdjiê leh anăn kâo bi hdĭp; kâo bi êka leh anăn kâo bi hlao; leh anăn amâo mâo pô dưi bi mtlaih mơ̆ng kngan kâo ôh.” (Klei Mtô Mñă Klei Bhiăn 32:39)
Klei êmuh ksiêm mĭn: Ya klei phung yang mkăn đru leh phung ƀuôn sang Israel tơdah diñu tuôm hŏng klei knap mñai? Hlei jing Pô mâo jih klei myang bi mtlaih phung ƀuôn sang Aê Diê? Hlăm ya boh klei drei ăt kăn đăo msĕ si phung ƀuôn sang Aê Diê mphŭn dô?
Hlăk êjai phung ƀuôn tue dôk ngă jhat kơ phung ƀuôn sang Israel, Aê Diê mâo leh sa klei êmuh phung ƀuôn sang Ñu snei, ti anôk rup yang diñu kkuh leh anăn myơr mnơ̆ng ngă yang? Klei êmuh snei msĕ si sa klei bi mdih đru kơ phung ƀuôn sang Aê Diê ƀuh leh anăn ênguôt hnĭng ƀuh snei, rup yang diñu tui hlue leh anăn đăo knang sui hŏng anei, ya ngă dôk ñăt kriêp ti anăp klei diñu kwưh akâo, kuăl kngan dôk dlăng klei kñap mñai diñu! Knŏng tơdah găn klei knap mñai leh anăn hơ̆k mơak, klei djiê leh anăn klei hdĭp kơh phung ƀuôn sang Israel thâo sĭt, knŏng Aê Diê yơh jing Pô Myang Sĭt Nik sa anăn, êngao Ñu amâo mâo pô myang mkăn ôh. Kyua hlăk phung ƀuôn sang Ñu dôk hlăm klei ênguôt hnĭng jih hnơ̆ng, kngan myang Aê Diê sa blư̆ dơ̆ng bi mtlaih diñu, Aê Diê jing phŭn bi mtlaih leh anăn đăo knang kơ diñu. Amâo djŏ knŏng dŭm năn ôh, Aê Diê lŏ ƀuăn hdơr jih phung roh ngă leh kơ phung ƀuôn sang Ñu, leh anăn Ñu srăng rŭ ênua hrô kơ phung ƀuôn sang, phat kđi kpă ênô kơ diñu. Năng ai dưi lač, ya klei Aê Diê ngă leh kơ phung ƀuôn sang Aê Diê hĭn kơ klei diñu bi mĭn. Phung ƀuôn sang Ñu amâo mĭn ôh, Aê Diê lŏ mâo hĕ klei pap leh anăn ba kngan đru truh knhal tuč hŏng sa djuê ana amâo gưt asăp, amâo năng msĕ si diñu.
Drei ênưih ƀuh đĭ ai tơdah ƀuh phung ƀuôn sang Israel mâo Aê Diê brei lu đei klei jăk mơak ƀiădah lŏ lui Aê Diê nao kkuh leh anăn knang kơ rup yang mkăn. Năng ai drei ăt ktưn hưn bi mĭn wăt tơdah pô amâo đei ktang ôh, ƀiădah ăt kăn tơl lui hĕ Aê Diê, lui klei kkuh mpŭ, bi kƀĭn hlăm êpul. Klei lông dlăng kơ phung đăo hruê anei amâo djŏ lui Aê Diê hlăm klei nao kkuh mpŭ ôh, ƀiădah drei ênưih lui Aê Diê hlăm ai tiê leh anăn bruă ngă. Brei lŏ hdơr dŭm gưl drei gĭr hŏng ai ktang hjăn pô hrô kơ knang kơ Khua Yang, knang hlăm klei bi kral hrô kơ Khua Yang, knang kơ ai ktang prăk mah hrô kơ knang hlăm klei myang leh anăn ai ktang mơ̆ng klei wah lač hŏng Khua Yang. Drei khăng knŏng nao kơ Khua Yang leh yua jih djăp hdră! Lông êmuh klei hdĭp snăn mdê mơ̆ hŏng klei phung ƀuôn sang Aê Diê amâo đăo hlăk đưm. Brei drei hdơr, Aê Diê jing phŭn đăo knang sa anăn kơ drei hlăm klei tui hlue Ñu.
Tơdah tuôm hŏng klei rŭng răng hlăm klei hdĭp, ya klei drei khăng ngă êlâo hĭn?
Wah lač: Ơ Khua Yang, jing Pô bi mtlaih leh anăn Pô kâo đăo knang. Lu blư̆ kâo ăt kăn đăo msĕ si phung ƀuôn sang Ih mphŭn dô. Akâo kơ Ih pap brei kơ kâo leh anăn đru kâo thâo knang kơ klei Ih đru tơdah tuôm hŏng djăp klei truh hlăm klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Bruă Mtao 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
