II Kevcai 32:34-39
Nqe cim:
“Kuv tib leeg xwb thiaj yog Vajtswv, tsis muaj dua lwm tus vajtswv lawm. Kuv ua kom neeg tuag thiab kuv pub tau txojsia, kuv ua kom nqaij to thiab kho tau kom zoo. Tsis muaj leejtwg txwv tau tej uas kuv ua ntawd li.” (II Kevcai 32:39)
Lus nug rau sawvdaws xav:
– Lwm haivneeg tej mlom pab tau dabtsi thaum cov Yixalayees ntsib kev txhawj ntshai?
– Leejtwg yog tus muaj hwjchim cawm tau tus Tswv haivneeg?
– Puas muaj qee zaus peb kuj tsis ntseeg zoo li tus Tswv haivneeg hnub thaud?
Nyob rau lub sijhawm cov Yixalayees raug yeebncuab tua rhuav, tus Tswv nug Nws haivneeg ib lo lus hais tias, cov mlom uas nej pe thiab tua tsiaj fij nyob qhovtwg tas lawm? Lo lus nug no zoo nkaus li lo lus tu siab ua rau tus Tswv haivneeg tsim dheev thiab nyuaj siab zeem paub hais tias, tej mlom uas lawv pe thiab cia siab txog tav no, nyob ntsiag to tsis teb lawv tej lus thov, tsis pab thaum lawv raug kev txomnyem! Tsuas yog thaum ntsib kev txomnyem thiab kaj siab, kev tuag thiab kev ciaj, cov Yixalayees thiaj zeem paub hais tias, tsuas yog Vajtswv thiaj yog tus uas pab lawv, dhau ntawm Nws tsis muaj leejtwg lawm. Vim tias lub sijhawm uas tus Tswv haivneeg tws kev, Vajtswv txhais tes muaj hwjchim los cawm lawv dim, Nws yog lawv lub hauvpaus cawm siav thiab yog qhov kev vamkhom. Tsis yog li ntawd xwb, Vajtswv tseem coglus tseg tias Nws yuav cim ntsoov tej uas yeebncuab ua rau Nws haivneeg, thiab Nws yuav ua pauj rau Nws haivneeg, txiav txim ncaj ncees rau lawv. Peb hais tau tias, qhov uas Vajtswv ua rau Nws haivneeg tshaj qhov uas lawv xav tau. Ua kom lawv xav tsis txog tias ua li cas Vajtswv yuav hlub thiab cev tes pab lawv, txawm yog lawv tsis mloog lus, tsis tsimnyog tau.
Peb yuav tsis zoo siab thaum pom qhov uas cov Yixalayees tau tus Tswv foom koob hmoov ntau heev tiamsis lawv tseem muab tus Tswv tso tseg mus pemlom thiab cia siab rau tej mlom ntawd. Tej zaum peb yuav khav hais tias, txawm kuv ua tsis tau zoo txaus los kuv tsis txog qib uas muab tus Tswv tso tseg, tsis mus pehawm Vajtswv, tsis koom pab pawg thov Vajtswv. Qhov kev sim cov ntseeg Yexus tamsim no tsis yog tso tus Tswv tseg tsis pehawm Nws xwb, tiamsis yog peb txojkev xav thiab ua uas yoojyim tsis nco txog tus Tswv. Ua tib zoo tig saib tej lub sijhawm uas peb tus kheej ua txhua yam, peb siv peb lub zog ua lossis yog vamkhom tus Tswv lub zog, peb cia siab rau Nws los yog peb cia siab rau tej nyiaj txiag. Peb tsuas los cuag tus Tswv tom qab uas peb siv tswvyim ua tas tsis tau xwb! Sim nug saib ua neej zoo li puas txawv li qhov uas hnub thaud tus Tswv haivneeg tsis ntseeg Vajtswv. Cia li nco ntsoov, Vajtswv yog lub hauvpaus peb cia siab thiab nrog Nws mus.
Thov Vajtswv,
Tus Tswv, Koj yog tus uas cawm thiab yog lub hauvpaus cia siab. Muaj qee zaus nyuam yaus tsis ntseeg zoo li Koj haivneeg hnub thaud. Thov zam txim rau nyuam yaus thiab pab kom nyuam yaus paub vamkhom Koj txojkev pab thaum ntsib teebmeem hauv lub neej. Tuav Tswv Yexus lub npe thov, Amees.
Thaum ntsib tej teebmeem nyuaj hauv lub neej, peb pheej ua dabtsi ua ntej?
Nyeem Vajluskub hauv peb lub xyoo: I Vajntxwv 20
Kênh Youtube BHKTHN:
