Filipis 1:3-8
Nqe cim:
“Txhua zaus uas kuv nco txog nej sawvdaws, kuv nco ntsoov ua kuv tus Vajtswv tsaug” (Filipis 1:3)
Lus nug rau sawvdaws xav:
– Timthawj Paulus ua dabtsi txhua zaus uas nco txog cov ntseeg hauv Filipis?
– Nws nco txiajntsig thiab ua Vajtswv tsaug rau cov ntseeg txog yam dabtsi?
– Peb zaj lus thov Vajtswv lub ntsiab yog dabtsi?
Ntu Vajluskub no hais muaj zog heev txog kev zoo siab, kev nco txiajntsig, thiab Paulus kev thov Vajtswv ua Vajtswv tsaug thaum nws nco txog cov ntseeg hauv lub nroog Filipis. Nws ua Vajtswv tsaug vim kev sib koom tes ntawm cov ntseeg Filipis hauv kev tshaj tawm Txojmoo Zoo. Lawv tau nrog Timthawj Paulus tiv dhau tej kev tau zoo thiab txomnyem hauv tes haujlwm no (nqe 3-6). Timthawj Paulus qhia tshwm nws txoj kev hlub uas nws muab pub rau cov ntseeg Filipis. Paulus rov nco txog tej kev zoo siab, nyuaj siab thawj zaug uas nws tuaj tshaj Txojmoo Zoo hauv lub nroog no (Tes Haujlwm 16:6-40). Txawm yog tamsim no nws tseem raug kaw, los nws lub siab yeej xav ntsoov txog lawv los ntawm kev zoo siab thiab ua Vajtswv tsaug. Txoj kev hlub uas Paulus muab pub rau cov ntseeg hauv Filipis yog tus duab hauv txoj kev hlub ntawm Tswv Yexus. Timthawj Paulus zoo siab heev thaum nws qhia tshwm nws txoj kev hlub rau Vajtswv cov menyuam, nws tau hais rau cov ntseeg hauv Thexalaunikes hais tias nws tu lawv ib yam li leej niam pub mis rau nws tej menyuam thiab txaus siab hlo muab nws txojsia pub rau lawv (1 Thexalaunikes 2:7-8).
Kev ua Vajtswv tsaug ua rau Paulus muaj nplua mias kev thov Vajtswv pab lwm tus. Paulus kev nco Vajtswv txiaj ntsig thiab ua Vajtswv tsaug tau qhia tshwm tseeb meej dhau ntawm nws tej lus thov Vajtswv hauv txhua tsab ntawv uas xa mus rau cov Pawg Ntseeg. Nws pom Vajtswv tej koobhmoov muaj nyob txhua qhov, hauv tej lubneej uas tau pauv hloov, hauv tej lub siab uas muaj txoj kev zoo, thiab hauv tej kev sim siab huvsi. Hla dhau txhua lub tsamthawj, Timthawj Paulus yeej nco ntsoov Vajtswv txiaj ntsig, kiag thaum tseem nyob hauv tsev lojcuj zoo li tamsim no (nqe 7, 13-14), nws tsis hnyav siab tiamsis nco ntsoov txog cov ntseeg thiab ua Vajtswv tsaug. Muaj coob tus ntseeg tsuas yog ua Vajtswv tsaug thaum lub neej tau zoo thiab tau koobhmoov xwb. Tiamsis Timthawj Paulus, nws ua Vajtswv tsaug rau txhua lub sijhawm li nws tau txhawb cov ntseeg: “Tsis txhob nyuaj siab rau ib yam dabtsi li, tiamsis thaum nej thov Vajtswv, nej ciali qhia txhua yam uas nej xav yuav rau Nws, thiab nco ntsoov thov los ntawm lub siab uas paub ua Nws tsaug” (Filipis 4:6)
Niaj hnub nim no, hauv Vajtswv cov menyuam muaj tsis txaus kev ua Vajtswv tsaug thaum thov Vajtswv thiab thov pab lwm tus. Peb tsuas yog thov Vajtswv pab daws yus tej teebmeem thiab lwm tus tej teebmeem xwb, peb ua Vajtswv tsaug rau tej uas Vajtswv pub rau peb tiamsis tsis nco ua Vajtswv tsaug rau tej uas Vajtswv pub rau yus cov kwvtij ntseeg. Thov Vajtswv pab kom peb paub txhawj xeeb, sib hlub sib pab, pom txog tej uas Vajtswv pub rau yus cov kwvtij, kom peb muaj ntau yam kev zoo siab ua Vajtswv tsaug hauv kev thov Vajtswv.
Thov Vajtswv,
Tus Tswv, thov Koj zam txim rau nyuam yaus vim hauv nyaum yaus zaj lus thov tsis muaj kev ua Koj tsaug. Thov pab nyuam yaus kom paub nco Koj txiajntsig txhua lub tsam thawj, ua Koj tsaug vim nyuam yaus tus kheej thiab tsevneeg. Nyuam yaus tuav Tswv Yexus Khetos lub npe thov, Amees.
Ib tsoom mloog uas hmov tshua,
Peb puas ua Vajtswv tsaug thaum thov Vajtswv?
Nyeem Vajluskub hauv peb lub xyoo: Yelemis 29
Kênh Youtube BHKTHN:
