I Timautes 3:1-7
Nqe cim:
“Muaj ib lo lus tseeb hais rau sawvdaws li no: Yog leejtwg xav ua tus thawj uas saib cov ntseeg, tus ntawd xav ua tes haujlwm uas zoo kawg nkaus.” (I Timautes 3:1)
Lus nug xav:
– Timthawj Paulus hais li cas txog txojkev xav ua tus thawj saib cov ntseeg?
– Tej yam ntxwv zoo uas tus thawj saib cov ntseeg yuav tsum muaj yog dabtsi?
– Vajtswv cov menyuam yuav tsum ua dabtsi los pab tus thawj coj sab ntsujplig kom ua tiav lub luag haujlwm tseem ceeb uas Vajtswv muab cob?
Tom qab hais rau ob pab neeg uas yog cov txivneej thiab cov pojniam, Timthawj Paulus tig los tham txog ob lub luag haujlwm tseem ceeb hauv Pawg Ntseeg, uas yog tus thawj saib cov ntseeg thiab cov pab ua Vajtswv haujlwm. Qhov xubthawj, nws hais txog txoj haujlwm ua tus thawj saib xyuas. Raws li Phau Vajluskub Tshiab, tus saib xyuas, tus xibhwb, thiab cov txwj laus muaj lub ntsiab lus yuav luag zoo sib xws, puavleej hais txog tes haujlwm saib xyuas, tu Pawg Ntseeg (Titus 1:5-7). Tham txog txoj haujlwm ua tus saib xyuas, Timthawj Paulus hais peb yam. Yam thawj, nws hais meej hais tias leejtwg xav ua tus thawj saib cov ntseeg ces yog xav tau ib tes haujlwm uas zoo kawg nkaus. Hais ntxiv rau lub ntsiab lus no, nws pib los ntawm lo lus: “kuj yog tus ntawd xav ua tes haujlwm zoo” (nqe 1 HMOWSV), txhais tau tias “Nov yog lo lus tsimnyog ntseeg tau” (nqe 1). Txojkev xav ua tus thawj saib xyuas sab ntsujplig rau lwm tus yog ib txojkev xav zoo, tsimnyog tau txhawb nqa. Niaj hnub no, peb yooj yim poob rau ob sab: Ib txhia saib tus neeg ua Vajtswv haujlwm yog tus koom ua “tes haujlwm dawb huv”, muaj nqis dua, nyob ze Vajtswv dua cov neeg ua haujlwm sab nraud. Tiamsis, ib txhia ho saib qhov ua haujlwm sab nraud tseem ceeb dua los ntawm lub siab xav tias “yog ua rau Vajtswv” txog qib saib tsis taus tus thawj saib xyuas cov ntseeg tes haujlwm. Ob sab ntawd puavleej tsis yog. Timthawj Paulus qhia rau peb pom tias txojkev xav ua tus thawj saib xyuas yog txojkev xav zoo rau txoj haujlwm ntawd, tsis yog muab piv rau txojkev xav ua lwm yam haujlwm.
Yam ob, txij nqe 2-7, Timthawj Paulus qhia tias, yuav kom txojkev xav zoo ntawd dhau los ua txoj haujlwm zoo tiag tiag, tus neeg thawj saib xyuas sab ntsujplig rau lwm tus yuav tsum tau xyaum tswj lub neej sab hauv, qhov ntawd yog tsis muaj chaw thuam, paub tswj tus kheej, paub tswj siab…; thiab lub neej qhia tshwm sab nraud, qhov ntawd yog tsis txhob qaug cawv lossis ua limhiam, nyiam txais qhua, siab mos siab muag, tau cov neeg sab nraud ua timkhawv zoo… Ib seem tseem ceeb ntxiv yog tsev neeg, yuav tsum yog muaj ib tug pojniam xwb, paub tswj tsev neeg, paub qhia cov menyuam (nqe 2-4). Kev tswj tsev neeg yog kev tswj Pawg Ntseeg me ntag. Tus cwjpwm ua neej nrog poj niam menyuam twb yog ib zaj lus qhia muaj sia rau pab yaj lawm.
Yam peb, “tsis txhob cia tus uas nyuam qhuav ntseeg tshiab ua tus saib xyuas Pawg Ntseeg” vim nws tseem tsis tau paub tab, yuav yooj yim ua siab khav (nqe 6-7).
Tus thawj coj sab ntsujplig yog tus uas Vajtswv xav kom muaj ntau yam, txij ntawm tus cwjpwm mus txog lub neej nrog tsev neeg thiab sab nraud yuav tsum ua qauv zoo, tsis txhob ua qauv phem. Txawm li cas los xij, qhov no yog ib “tes haujlwm uas zoo kawg nkaus”, tsimnyog ntshaw ua. Tus neeg “xav ua tus thawj uas saib cov ntseeg” yuav tsum paub tswj tus kheej, xyaum coj kom zoo; nrog rau qhov ntawd Vajtswv cov menyuam los yuav tsum thov Vajtswv rau tus thawj coj sab ntsujplig kom ua tiav lub luag haujlwm loj uas Vajtswv muab cob.
Thov Vajtswv,
Tus Tswv, thov pub kom nyuam yaus paub saib txoj haujlwm thawj coj sab ntsujplig raws li Koj saib. Thov pab nyuam yaus tswj tus kheej, xyaum coj kom zoo raws li Koj Txojlus qhia kom xwv kom nyuam yaus lub neej tau Koj siv. Nyuam yaus tuav Yexus Khetos lub npe thov, Amees.
Peb puas muaj lub siab xav lossis tabtom koom tes saib xyuas sab ntsujplig rau lwm tus?
Nyeem Vajluskub hauv peb lub xyoos: Yau-ees 4
Kênh Youtube BHKTHN:
