Loos 5:6-11
Nqe cim:
“Tiamsis Vajtswv qhia rau peb hais tias Vajtswv hlub peb kawg li, rau qhov thaum peb tseem ua neeg txhaum Yexus Khetos tuag txhiv peb” (Loos 5:8)
Lus nug xav:
– Vim licas ntoo khaublig thiaj li yog povthawj txog Vajtswv txojkev hlub uas loj kawg nkaus?
– Tswv Yexus tuag saum ntoo khaublig coj tau dabtsi los rau tibneeg txhaum?
– Peb yuav ua dabtsi thaum peb ua neej nyob hauv qhov tseeb no?
Qhib thawj, Timthawj Paulus qhia paub hais tias thaum peb tseem yog neeg txhaum ces Tswv Yexus twb tuag txhiv peb lawm. Tibneeg feem ntau tsuas kam tuag hloov pauv tus neeg ncaj ncees xwb, tiamsis Tswv Yexus txojkev tuag txhiv loj tshaj txhua yam, Nws tuag hloov cov neeg muaj txim. Ntawd yog qhov qhia tshwm txog txojkev hlub uas loj kawg nkaus!
Txojkev cawmdim tsis yog nqi zog rau peb tes haujlwm lossis peb qhov kev tsimtxiaj, tiamsis yog yam uas tus Tswv pub rau peb thaum peb tseem ua yeebncuab nrog Nws (nqe 8). Nyob saum lub roob Khaulakhauthas, txojkev ncaj ncees thiab txojkev hlub tau sib ntsib: Vajtswv txojkev dawbhuv tsis zam tej kev txhaum, thiab Nws txojkev hlub tsis muab tus neeg txhaum tso tseg. Ntoo khaublig yog qhov chaw uas kev ncaj ncees tau ua tiav thiab txojkev hlub tau nchuav lug. Vajtswv txojkev hlub tsis nyob ntawm ib yam dabtsi uas peb tibneeg ua tau. Nws paub hais tias tibneeg tsis muaj peevxwm txhim kho tau tus kheej lub siab, lossis ua timkhawv txog lawv kev ncaj ncees. Nws tau ua tes haujlwm ntawd thaum peb ua tsis tau ib yam dabtsi hlo li. Vim li ntawd, ntoo khaublig thiaj li los ua qhov povthawj uas ci ntsa iab tshajplaws txog ib txojkev hlub uas hla dhau ntawm tibneeg txojkev xav: yog txojkev hlub tig mus rau cov neeg uas tsis tsim nyog tau txais.
Dhau ntawm Yexus Khetos cov ntshav, peb thiaj tau suav hais tias yog neeg ncaj ncees thiab tau cawmdim dim ntawm Vajtswv txojkev chim (nqe 9). Vajtswv txojkev chim ncaj ncees yog qhov uas Nws ua los teb rau txojkev txhaum. Yog muab txojkev txhaum tso tseg twjywm tsis rau txim, ces Vajtswv txojkev ncaj ncees yuav raug ntau nqi qis heev. Tiamsis Vajtswv tsis cia rau tibneeg ris lub txim, Nws muab lub nra hnyav ntawd tso rau Nws Leej Tub uas yog Tswv Yexus ris lawm. Saum ntoo khaublig, txojkev txhaum tau raug txiav txim hnyav kawg nkaus, tib lub sijhawm ntawd Vajtswv txoj koob hmoov hlub kuj nchuav lug kom tus neeg txhaum tau zam txim thiab tau txais txojsia tshiab.
Txojkev txhaum yog qhov uas ua rau peb los ua yeebncuab nrog Vajtswv, nyob deb ntawm Vajtswv, thiab ua neej tawmtsam Nws (nqe 10a). Dhau ntawm Tswv Yexus txojkev tuag, peb thiaj rov tau sib raug zoo, tau rov coj los sib raug zoo nrog Vajtswv, tau ua Nws cov menyuam Nws hlub. Qhov kev sib haum xeeb ntawd tau ua tabpov tseg ruaj khov los ntawm Tswv Yexus txojkev ciaj sawv rov los (nqe 10b).
Tshooj Vajluskub no xaus los ntawm ib lo lus caw sawvdaws kom muaj kev xyivfab: “Vajtswv ua rau peb zoo siab kawg li, rau qhov nimno Yexus Khetos tus uas yog peb tus Tswv twb coj peb los nrog Vajtswv sib raug zoo lawm” (nqe 11). Ntoo khaublig yog qhov chaw uas Vajtswv txojkev chim thiab txojkev hlub sib ntsib. Nyob qhov ntawd, peb pom txog lub txim hnyav ntawm txojkev txhaum, thiab tib lub sijhawm ntawd peb txais tau Vajtswv txoj koob hmoov hlub uas loj dav kawg nkaus. Thaum nyob hauv txojkev tseeb no, peb tau txais kev thajyeeb zoo siab, ruaj khov hauv txojkev cia siab, thiab tau nqua hu los tshajtawm txog txojkev hlub uas peb twb tau txais ntawd rau lwm tus.
Thov Vajtswv,
Tus Tswv, thov pab nyuam yaus niaj hnub nco ntsoov Koj txojkev tuag txhiv saum ntoo khaublig vim nyuam yaus lub txim, kom nyuam yaus ua tau lubneej tsimnyog nrog Koj txoj koob hmoov thiab txojkev hlub uas Koj muab rau nyuam yaus. Nyuam yaus tuav Tswv Yexus Khetos lub npe thov, Amees.
Peb puas paub txog Tswv Yexus txojkev hlub loj kawg nkaus uas tau qhia tshwm saum ntoo khaublig lawm tau?
Nyeem Vajluskub hauv peb lub xyoos Daniyees 10
Kênh Youtube BHKTHN:
