II Kauleethaus 3:1-3
Nqe cim
“Qhov tseeb, Yexus Khetos yog tus sau tsab ntawv no thiab peb yog cov uas xa. Tsab ntawv no tsis yog nws muab kua mem sau, tiamsis yog nws muab Vajtswv tus uas muaj sia nyob tus Ntsujplig sau, thiab tsis yog sau rau ntawm tej txiagzeb, tiamsis yog sau rau hauv neeg lub siab.” (II Kauleethaus 3:3).
Lus nug rau sawvdaws xav:
- Vim licas Timthawj Paulus hais rau Pawg Ntseeg Kauleethaus hais tias “Nej twb yog tsab ntawv uas peb muab sau rau hauv peb lub siab”?
- Cov ntseeg hauv Kauleethaus yog tus Cawmseej tsab ntawv muaj lub ntsiab licas?
- Tsab ntawv ntawd muab dabtsi los sau thiab sau rau qhov twg?
- Niaj hnub nimno, peb yuav tsum ua neej zoo licas thiaj yuav zoo li “tus Cawmseej tsab ntawv”?
Cov xibhwb cuav pheej coj tej tsab ntawv uas sau qhia txog tus kheej tuaj rau tej Pawg Ntseeg ua timkhawv tias lawv muaj hwjchim tswj cov ntseeg. Tiamsis Timthawj Paulus hais rau cov ntseeg hauv Kauleethaus paub hais tias nws tsis cheemtsum ua li ntawd vim cov ntseeg “twb yog tsab ntawv uas peb muab sau rau hauv peb lub siab…” (nqe 2a). Zoo ib yam li tsab ntawv sau txhua lo lus hauv nruab siab uas tus sau xav hais tawm, Timthawj Paulus muab cov ntseeg hauv Kauleethaus piv li tsab ntawv ua haujlwm, yog ib tsab ntawv uas sau “kom txhua tus paub thiab tau nyeem” (nqe 2b), txhais tau hais tias cov ntseeg hauv Kauleethaus lubneej hloov dua tshiab lawm ua rau txhua tus saib pom, thiab qhov no kuj yog tej lus ua tabpov rau tej nqi zog ntawm Timthawj Paulus thiab nws cov phoojywg kev ua tus Tswv haujlwm.
Tsis tas li ntawd xwb, Timthawj Paulus qhia rau cov ntseeg hauv Kauleethaus pom hais tias lawv lubneej uas tau hloov dua tshiab lawm tseemceeb kawg nkaus li, vim kev hloov dua tshiab tomqab uas ntseeg Tus Tswv qhia tau hais tias lawv yog tus Cawmseej tsab ntawv. Dhau los ntawm lubneej hloov dua tshiab, lawv qhia tshwm tej lus uas tus Cawmseej xav hais hauv nruab siab tuaj, tej uas tus Cawmseej qhia, tau lawv muab los coj hauv lawv lubneej txhua hnub. Tiamsis, tej kevcai uas lawv coj no tsis yog muab kua mem sau, vim kua mem muaj peevxwm ploj taus mus raws sijhawm, kuj tsis yog muab sau rau ntawm tej txiagzeb zoo li thaum Mauxes txais ob daim txiagzeb sau tus Tswv kaum nqe kevcai saum roob Xinais, vim txiagzeb yoojyim raug tsoo tawg, tiamsis tej no yog muab Vajtswv tus uas muaj sia nyob tus Ntsujplig sau rau ntawm cov ntseeg Tswv Yexus lub siab. Lawv yuav tsis hnov qab tej lus cogtseg nrog Vajtswv. Ntawm no yog daim duab kev coglus tshiab thaum Vajtswv coglus yuav pub rau haivneeg Yixalayees thaum Nws coj lawv tawm hauv lub tebchaws ua cev qhev rov los (Yelemis 31:33; Exekees 11:19; 36:26).
Tsis yog tsuas muaj cov ntseeg hauv Kauleethaus thaum ub xwb, tiamsis niaj hnub nimno peb sawvdaws kuj yog “tus Cawmseej tsab ntawv”. Peb nyob hauv txoj kevcai tshiab uas tau sau tseg los ntawm Vaj Ntsujplig kev ua haujlwm hauv peb lubneej. Thiab cov neeg uas yuav nyeem tsab ntawv tshwjxeeb no ces yog cov uas nyob ibncig peb, tej phoojywg, cov uas nrog peb ua haujlwm ua ke. Peb yuav tsum “muaj lub siab zoo ib yam li Yexus Khetos lub” (Filipis 2:5) peb thiaj yuav ua rau lwm tus ntsia pom tus Tswv dhau los ntawm peb lubneej uas hloov dua tshiab lawm.
Lwm tus puas pom txog Yexus Khetos lub siab xav dhau los ntawm peb kev xav, tej lus hais thiab tej uas peb ua?
Thov Vajtswv
Vajtswv! Nyuam yaus zoo siab heev thaum paub hais tias nyuam yaus lubneej yog tus Tswv tsab ntawv, thov pab nyuam yaus tau Vaj Ntsujplig nrog nraim txhua hnub thiab tau Vajtswv lub hwjchim hloov dua tshiab kom nyuam yaus tau lubneej kaj siab hauv tus Tswv tej lus cogtseg. Amees.
Nyeem Vajluskub peb lub xyoos: Ntawv Nkauj 38:13-40:10
Tshooj Youtube BHKTHN: https://www.youtube.com/c/bhkthn
