Klei Aê Diê Blŭ: II Kôrantô 3:1-3.
Êlan kliăng: “Leh anăn diih bi êdah kơ diih jing hră mơ̆ng Krist hmei djă ba leh, amâo djŏ ôh čih hŏng êa jŭ, ƀiădah hŏng Mngăt Myang Aê Diê hdĭp, amâo djŏ ôh ti mdhă boh tâo, ƀiădah ti mdhă ai tiê mnuih.” (II Kôrantô 3:3).
Klei êmuh ksiêm mĭn: Ya ngă Khua ƀĭng kna Y‑Pôl lač hŏng Sang Aê Diê Kôrantô “Diih pô yơh jing hră hmei”? Ya jing klei yuôm bhăn mơ̆ng klei phung đăo Kôrantô jing hră mơ̆ng Krist? Hŏng hră anăn čih leh anăn ti anôk čih? Hruê anei, si drei hdĭp čiăng ăt msĕ si “hră mơ̆ng Krist”?
Phung ksiêm hriăm mgưt khăng djă dŭm pŏk hră mơĭt, jing hră hưn mthâo hŏng dŭm Sang Aê Diê čiăng bi mklă klei dưi diñu hlăm phung đăo. Ƀiădah Khua ƀĭng kna Y‑Pôl brei phung đăo ti Kôrantô thâo ñu amâo guôn ngă snăn ôh kyua phung đăo jing “hră hmei, čih leh hlăm ai tiê hmei” (êlan 2a). Msĕ si hră bŏ hŏng klei khăp mơ̆ng pô čih, Khua ƀĭng kna Y‑Pôl bi hmô phung đăo ti Kôrantô msĕ si hră kơ bruă ñu ngă, sa pŏk hră dưi bi êdah kơ “kơ jih jang mnuih thâo leh anăn dlăng” (êlan 2b), jing klei hdĭp mlih mrâo mơ̆ng phung đăo ti Kôrantô mâo grăp čô mnuih ƀuh, leh anăn anei ăt jing klei rơ̆ng ênoh yuôm kơ klei Khua ƀĭng kna Y‑Pôl leh anăn phung găp mă bruă kơ Aê Diê.
Amâo dôk tăp năn ôh, Khua ƀĭng kna Y‑Pôl brei kơ phung đăo ti Kôrantô ƀuh klei hdĭp dưi mlih mrâo mơ̆ng diñu jing yuôm bhăn snăk, kyua klei mlih mrâo leh đăo kơ Aê Diê bi êdah diñu jing hră mơ̆ng Yang Krist. Mơ̆ng klei hdĭp mlih mrâo, diñu bi êdah klei mĭn Krist, diñu ba yua klei Khua Yang bi hriăm hlăm klei hdĭp grăp hruê. Khădah snăn, dŭm klei bhiăn anei amâo djŏ čih hŏng êa giê čih ôh, kyua êa giê čih srăng luč hlue hruê mông, ăt kăn čih hlăm boh tâo msĕ si hlăk đưm Khua gĭt gai Y‑Môis tŭ mă dua pŏk hră klei bhiăn ti cư̆ Sinai ôh kyua boh tâo thâo mčah, ƀiădah dưi čih hŏng Yang Mngăt Jăk hlăm ai tiê phung đăo kơ Khua Yang Yêsu. Diñu srăng amâo dưi wơr ôh klei bi mguôp hŏng Aê Diê. Anei jing rup klei bi mguôp mrâo leh Aê Diê ƀuăn srăng brei kơ phung ƀuôn sang Israel hlăk Ñu ba digơ̆ wĭt mơ̆ng klei jing hlŭn (Y‑Yêrêmi 31:33; Y‑Êsêkiêl 11:19; 36:26).
Amâo djŏ knŏng phung đăo Kôrantô đưm dih ôh, ƀiădah hruê anei jih jang drei ăt jing “hră mơ̆ng Krist”. Drei ăt hdĭp hlăm klei bi mguôp mrâo dưi mkŏ mjing mơ̆ng bruă Yang Mngăt Jăk ngă hlăm klei hdĭp grăp čô drei. Leh anăn phung dlăng hră yuôm bhăn anei jing phung riêng gah, ƀĭng găp, phung mă bruă mbĭt hŏng drei. “Brei diih mâo klei mĭn msĕ si Krist Yêsu mâo leh” (Philip 2:5) čiăng kơ grăp čô mnuih ƀuh nanao Aê Diê hlăm klei hdĭp drei mlih mrâo.
Grăp čô mnuih ƀuh mơ̆ klei mĭn mơ̆ng Krist bi êdah hlăm klei mĭn, klei blŭ leh anăn bruă ngă drei?
Wah lač: Ơ Aê Diê! Kâo hơ̆k mơak kyua ƀuh leh klei hdĭp kâo ăt jing hră mơ̆ng Krist, akâo kơ Ih đru kâo grăp hruê mâo Yang Mngăt Jăk leh anăn klei myang Aê Diê mlih mrâo čiăng hdĭp hlăm klei bi mguôp mrâo Aê Diê.
Dlăng Klei Aê Diê Blŭ hlăm tlâo thŭn: Klei Mmuñ Hđăp 38:13-22; 39:1-13; 40:1-10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
