I Timôthê 6:17-19
“Ih khan kơ lu bơngai mơdrŏng ‘nĕ pơang akâu kơdih păng khan kơ sư ‘nĕ gơnang kơ mŭk-măk sư mơdrŏng. Athei sư tơchĕng gơnang kơ ‘Bok Kei-Dei đĕch gơh tơgŭm sư. Tơdrong mơdrŏng ưh kơ kơjăp nhoi ôh. ‘Bok Kei-Dei hơlăng, Sư ăn kơ bơ̆n tôm tơdrong bơ̆n kăl yua wă kơ bơ̆n chơt hiôk.”
(I Timôthê 6:17)
Nơ̆r jet tơchĕng pơwao:
- ‘Bar tơdrong nhen thoi kap pơm kơ bơngai mơdrŏng noh tơdrong kiơ?
- ‘Bok Pôl athei bơngai mơdrŏng pơm tơdrong kiơ?
– Tơdrong kiơ tơ’bôh ăn kơ bơ̆n gơnang kơ Kră Yang ‘Bok Kei-Dei?
Tơdrong mơdrŏng ba ăn tơdrong nhen thoi kap đăk wă kơ ‘leh lăm ‘bar tơdrong: “Pơang” păng “gơnang kơ mŭk tơmam mă ưh kơ sot đunh” (trong 17). Băt kơ tơdrong ‘nâu, hơdrol lu kon pơlei Israel mă lu chăl đơ̆ng rŏng wă mơ̆t tơlăm dêh đak sut, ‘bok Môis tơblŏk kơ lu sư Khôi Juăt Kră Yang đei bơtho: “Iĕm athei ‘blŏk kơ Kră Yang ‘Bok Kei-Dei iĕm, noh jơ̆ đơ̆ng Sư ăn kơ iĕm jing mơdrŏng; wă pơsĭt tơdrong pơgơ̆p Sư pơkă pơkăm hăm ‘bok iĕm sơ̆.” (Bơtho Khôi juăt 8:18). Mŭk tơmam noh jơ̆ tơdrong pơsĭt kơ đơ̆ng ‘Bok Kei-Dei ba ăn tôm mah, Kră Yang song ăn kơ lu bơ̆n, thoi noh bơ̆n athei pơsĭt kơ tơmam bơ̆n noh đơ̆ng ‘Bok Kei-Dei ăn păng ư-ang kơ Sư, Kră Yang mă ăn kơ bơ̆n đei jơ-hngơ̆m pran păng tơdrong gơh hơgei. Mă tơpă, tơmam oei ba ăn kơ kon bơngai đei tơdrong pơhlŭ pơm ăn kơ kon bơngai “pơ-ang” wă ư-ang kơ akâu kơdih.
Tơdrong nhen thoi kap wă kơ ‘leh mă ‘bar, mŭk tơmam ba ăn kơ kon bơngai đei tôm mah na ưh kơ kăl kơ Kră Yang. Wă kơ hoei kơ đei tơdrong glăi thoi noh, tơdrong blŭng a ‘bok Pôl đei bơtho akhan, “Athei sư tơchĕng gơnang kơ ‘Bok Kei-Dei đĕch gơh tơgŭm sư. Tơdrong mơdrŏng ưh kơ kơjăp nhoi ôh. ‘Bok Kei-Dei hơlăng, Sư ăn kơ bơ̆n tôm tơdrong bơ̆n kăl yua wă kơ bơ̆n chơt hiôk.”(trong 17). Kră Yang bơ̆n noh jơ̆ ‘Bă mă tơpăt sĭt “rim năr” hơmrah “ba ăn tơmam rơkah rơkai”, păng lăng hơiă kơ lu bơ̆n đei yua tơmam mă đơ̆ng Sư đei song ăn. Tơdrong mă ‘bar ‘bok Pôl athei lu bơngai mơdrŏng “Ih khan kơ lu bơngai mơdrŏng athei pơm jơhngơ̆m ‘lơ̆ng păng đe păng athei gơh tơgŭm mơnat kơ lu bơngai dơnuh hin tơmam.” (trong 18). Kơplah đei song ăn ưh kơ đei ‘măn lê̆ kơ kơdih, thoi noh bơ̆n đei pơhrăm iŏk tơdrong mă “Dah sư hơlăng kơ đe thoi noh, mŭk măk sư huach ‘biơ̆ mơ̆n, mă-lei sư mơdrŏng tôm tơdrong nơ̆r pơma đơ̆ng ‘Bok Kei-Dei tơgŭm sư ling-lang păng sư gô iŏk tơdrong arih ning-mônh.” (trong 19). Kơplah bơ̆n ưh kơ dan tơdrong arih bơ̆n lăm tơdrong tơmam mă ưh kơ sot đunh, păng yua tơmam bơ̆n lăm tơdrong ‘lơ̆ng păng ling lang kơ gơnang kơ Kră Yang, thoi noh hơnă đon lui bơ̆n gô dơ̆ng kơ jăp, lu bơ̆n “‘măn lê̆” tơdrong tơ hơnăp “minh tơdrong kơjăp wă ba tơdrong arih tơpă” (trong 19 BTTHĐ). Kră Yang Yêsu đei bơtho: “Dah iĕm đei mŭk tơmam tơ plĕnh ti, jơhngơ̆m đon iĕm kư̆m tơchĕng tơ noh mơ̆n. Dah iĕm đei mŭk tơmam tơ teh âu, jơhngơ̆m đon iĕm kư̆m tơchĕng tơ teh âu mơ̆n.” (Mathiơ 6:21). Tơdah bơ̆n lui gơnang kơ tơdrong Kră Yang ‘Bok Kei-Dei wei rong bơ̆n, yua mŭk tơmam bơ̆n wă asong kơ bơngai nai, tơdrong ‘noh pơsĭt kơ lu bơ̆n dan đon lui bơ̆n tơ kơpal plĕnh ‘lơ̆ng rŏ ưh kơ dan đon lui bơ̆n lăm tơdrong mŭk tơmam ôh.
‘Bok Pôl ưh kơ đei bơtho bơ̆n gơh klaih yua kơ pơyơ̆r kơ ‘Bok Kei-Dei jên tơmam păng pơm tơdrong ‘lơ̆ng. Tơdrong Dŏng pơklaih noh jơ̆ tơmam song ăn đĕch đơ̆ng Kră Yang. Mă lei, nhen thoi bơngai mă oei tơdăm mơdrŏng đei chih lăm Markôs 10:17-22, tơdrong mă bơ̆n yua mŭk tơmam tơ’bôh ăn kơ bơ̆n jơhngơ̆m đon lui bơ̆n dan ‘bơ̆t tơdrong kiơ. Tơdah bơ̆n gơnang kơ mŭk tơmam lei lăm jơhngơ̆m bơ̆n ưh pă đei pôk pơ ư kơ minh ‘nu ‘Bok Kei-Dei bơih, păng bơ̆n kư̆m ưh kơ đei mơdrŏng lăm tơdrong pơm ‘lơ̆ng tơgŭm yua kơ ưh kơ đei jơhngơ̆m wă chă song ăn tơmam mă bơ̆n đei kơ bơngai nai.
Ơ Kră Yang, pinh Ih tơgŭm inh gơnang kơ Ih tơplih kơ tơdrong gơnang kơ mŭk tơmam. Apinh Ih tơgŭm inh wă yua dôm tơmam mă đơ̆ng Ih ăn wă pơm tơdrong ‘lơ̆ng păng song ăn tơmam kơ bơngai mă dơnuh hin. Yua anăn Kră Yang Yêsu Krist, Amen.
Lu bơ̆n đei pơkă tơpă thoi yơ lăm tơdrong pơyơ̆r kơ Kră Yang păng song ăn tơmam kơ bơngai nai?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hơriso 114-115
Kênh Youtube BHKTHN:
