Klei Aê Diê Blŭ: I Y-Timôthê 6:17-19
Êlan kliăng: “Mtă bĕ kơ phung mdrŏng hŏng mnơ̆ng lăn ala anei, đăm brei diñu jing mgao ôh amâodah čang hmăng kơ klei mdrŏng amâo sĭt ôh, ƀiădah čang hmăng kơ Aê Diê, Pô brei kơ drei êbeh dlai djăp mta mnơ̆ng dưi bi mơak kơ drei” (I Y-Timôthê 6:17)
Klei êmuh ksiêm mĭn: Dua klei mplư phung mdrŏng ênưih lĕ ya jing? Ya klei Khua ƀĭng kna Y-Pôl mtă brei phung mdrŏng ngă? Ya klei brei ƀuh drei dôk knang kơ Aê Diê?
Klei mdrŏng ênưih bi lĕ arăng hlăm dua klei mplư: “jing mgao” leh anăn “čang hmăng kơ klei mdrŏng amâo sĭt ôh” (êlan 17). Thâo săng kơ klei anei, êlâo kơ phung gưl êdei găp djuê Israel mŭt hlăm čar mâo mnơ̆ng ƀơ̆ng huă mnăm êbeh dlai, Y-Môis lŏ bi hdơr kơ klei bhiăn Aê Diê leh anăn mtă: “Brei diih hdơr kơ Yêhôwa Aê Diê diih, kyuadah Ñu yơh Pô brei klei dưi mâo klei mdrŏng” (Klei Mtô Mñă Klei Bhiăn 8:18). Ngăn drăp jing mnơ̆ng bi êdah kơ klei jăk Aê Diê brei kơ drei, kyuanăn ngăn drăp srăng jing mnơ̆ng brei drei bi mni kơ Aê Diê, Pô brei kơ drei ai ktang leh anăn klei thâo mĭn čiăng dưi mâo dŏ anăn. Ƀiădah ngăn drăp ăt khăng bi lĕ pô mâo ñu lĕ hlăm klei mplư “jing mgao” bi mni kơ gơ̆ pô.
Klei mplư tal dua jing, ngăn drăp dưi brei mnuih ƀuh klei hdĭp digơ̆ mâo klei rơ̆ng kjăp amâo guôn mâo Aê Diê ôh. Čiăng đăm mâo klei čhuai anăn, klei tal êlâo Khua ƀĭng kna Y-Pôl mtă: “čang hmăng kơ Aê Diê, Pô brei kơ drei êbeh dlai djăp mta mnơ̆ng dưi bi mơak kơ drei” (êlan 17). Aê Diê drei jing Ama sĭt suôr grăp hruê, hŏng klei kmah brei “êbeh dlai”, leh anăn khăp snăk dlăng kơ drei yua hŏng klei mơak. Klei tal dua Khua ƀĭng kna Y-Pôl mtă kơ phung mdrŏng: “jing mdrŏng hlăm bruă jăk, jing kmah leh anăn thâo bi mbha kơ arăng” (êlan 18). Tơdah drei brei hrô kơ mkăm pioh, drei dôk hriăm kơ klei “mkăm pioh kơ diñu pô atur jăk leh anăn kjăp kơ ênuk êdei” yơh (êlan 19). Tơdah drei amâo mdơ̆ng ôh atur kơ klei hdĭp drei hŏng prăk jing mnơ̆ng yua mă êjai bhiâo, yua prăk mah kơ bruă jăk, leh anăn ăt knang nanao kơ Khua Yang, snăn yơh klei đăo drei srăng jing kjăp, drei “mkăm” kơ ênuk êdei “sa atur jăk leh anăn kjăp…dưi djă păn klei hdĭp sĭt nik” (êlan 19). Khua Yang Yêsu lač, “Kyuadah ti anôk mâo ngăn drăp yuôm ih, tinăn mơh ai tiê ih srăng dôk” (Y-Mathiơ 6:21). Tơdah drei knang kơ klei brei mơ̆ng Aê Diê, mbha mnơ̆ng drei mâo kơ mnuih mkăn, klei anăn bi êdah sĭt nik ai tiê drei dưm ti Ƀuôn Jăk Aê Diê amâo djŏ ti ngăn drăp ôh.
Khua ƀĭng kna Y-Pôl amâo lač arăng mâo klei bi mtlaih kyua klei myơr leh anăn klei ngă bruă jăk ôh, klei bi mtlaih drei mâo jing dŏ Aê Diê brei. Ƀiădah lĕ, msĕ si klei yăl dliê kơ sa čô êkei hlăk ai mdrŏng hlăm Y-Markôs 10:17-22, êlan drei yua ngăn drăp ăt brei ƀuh mơh ti anôk drei dưm ai tiê drei. Tơdah drei knang kơ ngăn drăp, sĭt nik hlăm klei hdĭp drei Khua Yang amâo lŏ jing Pô knŏng kơ Ñu ôh drei kkuh mpŭ, leh anăn drei kăn dưi jing mdrŏng lei hlăm bruă jăk leh anăn amâo srăng čiăng bi mbha kơ pô mkăn ôh.
Ya klei drei ƀuăn rơ̆ng hŏng klei klă hlăm klei myơr leh anăn klei bi mbha?
Wah lač: Ơ Khua Yang, đru kâo thâo knang kơ Ih hrô kơ klei tui duah klei rơ̆ng kjăp mơ̆ng prăk mah. Đru kâo thâo yua ngăn drăp Ih brei pioh ngă bruă jăk leh anăn bi mbha kơ mnuih kƀah. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 114-115
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
