Klei Aê Diê Blŭ: Y-Yakơ 4:7-10
Êlan kliăng: “Nao giăm bĕ kơ Aê Diê, leh anăn Ñu srăng hriê giăm kơ diih.” (Y‑Yakơ 4:8a).
Klei êmuh ksiêm mĭn: Ya klei Khua Yang ƀuăn tơdah phung anak ƀuôn sang Ñu nao giăm kơ Ñu? Ya klei brei drei ngă tơdah nao giăm kơ Khua Yang? Si drei ngă čiăng dưi bi kdơ̆ng hŏng yang jhat? Si drei dôk pioh mmông nao giăm kơ Khua Yang grăp hruê?
Y-Yakơ čih hră anei kơ phung đăo tal êlâo čiăng bi mđĭ ai klei đăo diñu tơdah dôk tlă anăp hŏng lu klei lông dlăng dleh dlan (kdrêč 1). Hlăm kdrêč anei, ñu iêô mthưr ai tiê khăp leh anăn đup gưt kơ Khua Yang. Phung anak ƀuôn sang Aê Diê brei nao giăm Khua Yang čiăng Ñu brei klei pap leh anăn ai ktang dưi bi kdơ̆ng hŏng klei yang jhat mplư hlăm kdrăn blah klei hdĭp mngăt myang. Snăn si drei dưi nao giăm Aê Diê? Y-Yakơ hưn mdah dŭm knhuang brei phung anak ƀuôn sang Aê Diê ngă tơdah nao giăm hŏng Khua Yang msĕ snei:
Tal sa, đup gưt kơ Aê Diê (êlan 7a): knhuang êlâo hĭn jing đup gưt kluôm dhuôm kơ klei kiă kriê leh anăn kơ klei Khua Yang čiăng hŏng klei hriăm leh anăn gưt ngă tui si Klei Aê Diê Blŭ. Tal dua, bi kdơ̆ng hŏng yang jhat (êlan 7b): Čuăn knang klei pap Khua Yang bi kdơ̆ng hŏng djăp mta klei mplư mơ̆ng yang jhat, mơ̆ng lăn ala. Tal tlâo, rao bi doh kngan, bi doh ai tiê (êlan 8b): Brei thâo kral klei soh leh anăn čuăn lui, bi doh klei soh kyua hŏng klei pap mơ̆ng êrah Khua Yang Yêsu. Tal pă, thâo kral klei soh, ênguôt hnĭng kơŭ kơyăm (êlan 9): Tơdah ngă soh, brei hưn sĭt klei soh pô, kơŭ kơyăm leh hia aksâo kơ Khua Yang pap brei klei soh. Tal êma, luă gŭ pô ti anăp Khua Yang (êlan 10): Brei thâo bi ti gŭ pô đup gưt kơ klei ktang myang Khua Yang, thâo kral klei êdu awăt pô akâo kơ Khua Yang đru mtlaih.
Anăn jing dŭm knhuang brei phung anak Aê Diê ngă grăp blư̆ nao kơ Khua Yang čiăng dưi giăm hĭn hŏng Ñu. Klei Aê Diê Blŭ ƀuăn tơdah drei nao giăm Aê Diê snăn Ñu srăng hriê giăm kơ drei. Leh anăn tơdah drei luă gŭ ti anăp Khua Yang, Ñu pô srăng bi mđĭ drei. Klei ƀuăn tloh ênoh êdi ! Ya klei mkăn dưi bi mđơr hŏng klei dưi nao giăm Mtao kơ jih jang mtao, Khua Yang kơ jih jang khua. Anei jing klei pap yuôm bhăn Khua Yang pioh brei kơ grăp čô phung đăo. Ƀiădah ênguôt êdi hruê anei mâo lu phung anak Aê Diê amâo thâo săng amâodah ka thâo săng ôh klei pap anei. Diñu amâo bi knal ôh klei jăk mơak leh anăn klei mmih tơdah dưi nao giăm Khua Yang. Diñu tui hlue Khua Yang kbưi kbưi leh anăn yua klei ktang hjăn pô bi kdơ̆ng hŏng yang jhat hŏng klei suăi êmăn. Diñu amâo pioh êlâo hĭn mmông dlăng, hriăm Klei Aê Diê Blŭ leh anăn bi mguôp hŏng Khua Yang ôh. Snăn si dưi mâo klei dưi hĭn hŏng klei soh leh anăn yang jhat?
Čiăng dưi nao giăm Aê Diê, brei hriăm kpĭ mjuăt drei pô pioh mmông dôk hjăn nao kơ Khua Yang. Hlăm mnĭt mmông kriêp ñăt dôk hŏng Khua Yang yơh, drei dưi mă tŭ ai ktang mrâo Khua Yang brei. Hŏng Klei Aê Diê Blŭ mtô, drei bi knal klei khăp leh anăn klei pap Khua Yang pioh kơ drei čiăng hdĭp dưi hĭn leh anăn mâo boh tŭ dưn kơ Khua Yang nanao.
Si ngă drei čuăn kpĭ mjuăt pô hŏng klei pioh mmông kriêp ñăt, dôk hjăn hŏng Khua Yang mơ̆?
Wah lač: Ơ Khua Yang, akâo Ih đru kâo čuăn djă pioh mmông dôk hjăn kriêp ñăt grăp hruê čiăng dưi nao giăm Khua Yang. Akâo Khua Yang brei kâo bi knal klei mmih leh anăn klei jăk mơak tơdah dôk hlăm klei bi mguôp hŏng Khua Yang grăp hruê.
Dlăng Klei Aê Diê Blŭ hlăm tlâo thŭn: Klei Mmuñ Siam Hĭn 1:1 – 2:7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
