Yakaunpaus 4:7-10
Nqe cim:
“Nej cia li los nyob ze Vajtswv, Vajtswv thiaj yuav los nyob ze nej” (Yakaunpaus 4:8a).
Lus nug rau sawvdaws xav: Tus Tswv coglus li cas thaum Nws cov menyuam los nyob ze Nws? Peb cheemtsum ua dabtsi thaum los nyob ze Vajtswvswv? Yuav ua li cas kom peb tawmtsam yeej dab Ntxwgnyoog? Peb tabtom siv sijhawm los nyob ze Vajtswv txhua hnub zoo li cas?
Yakaunpaus sau tsab ntawv no mus txhawb cov ntseeg xubthawj txojkev ntseeg thaum ntsib tej kev sim siab (tshooj 1). Hauv tshooj no, Yakaunpaus nqua hu kom lawv muaj lub siab hlub tus Tswv thiab mloog Nws lus. Tus Tswv haivneeg los nyob ze Vajtswv kom tau Nws tej koob hmoov thiab lub zog tawmtsam dab Ntxwgnyoog tej kev sim siab. Yog li, yuav ua li cas peb thiaj los nyob ze tau Vajtswv? Yakaunpaus qhia Vajtswv cov menyuam ua cov kaujruam li nram qab no kom los nyob ze Vajtswv:
Tim ib, Mloog Vajtswv lus (nqe 7a): Thawj kaujruam yog yuav tsum mloog Vajtswv lus thiab ua raws li Nws hais. Tim ob, Tawmtsam dab Ntxwgnyoog (nqe 7b): Vamkhom tus Tswv lub zog tawmtsam dab Ntxwgnyoog tej kev sim siab hauv lub ntiajteb no. Tim peb, Ntxuav tes kom huv, tu lub siab kom zoo (nqe 8b): Cheemtsum zeem paub kev txhaum thiab txiav txim siab muab tso povtseg, vamkhom Yexus Khetos cov ntshav ntxuav tej kev txhaum huvsi mus. Tim plaub, Nyuaj siab rau tej kev txhaum, cia li quaj ntsuag (nqe 9). Thaum ua txhaum, cia li lees txim, nyuaj siab thiab quaj thov tus Tswv zam txim. Tim tsib, Txo hwjchim tabmeeg Vajtswv (nqe 10): Yuav tsum txo hwjchim qis tabmeeg Vajtswv uas muaj hwjchim loj, zeem paub yus qhov tsis zoo thiab thov Vajtswv pab.
Saum no yog cov kaujruam uas Vajtswv cov menyuam cheemtsum ua kom nyob ze Vajtswv dua. Vajtswv Txojlus hais tias thaum peb los nyob ze Vajtswv ces Nws yuav nyob ze peb. Thiab thaum peb txo hwjchim tabmeeg Vajtswv, Nws yuav tsa peb rau qhov chaw siab. Qhov no yog cov lus cog tseg zoo heev! Tsis muaj ib yam dabtsi muaj nqis npaum qhov uas peb tau los nyob ze tus Vajntxwv ntawm txhua tus vajntxwv, tus Tswv ntawm txhua tus tswv. Qhov no yog txoj koob hmoov zoo uas tus Tswv muab pub rau cov ntseeg Yexus. Tiamsis nimno muaj ntau tus ntseeg tsis totaub lossis tsis paub txoj koob hmoov no. Lawv tsis tau txais qhov zoo thiab kaj siab thaum los nyob ze Vajtswv. Lawv nyob deb deb Yexus thiab qaug zog rau txojkev tawmtsam dab Ntxwgnyoog. Lawv tsis muaj lub sijhawm tshwjxeeb los nyeem, kawm Vajtswv Txojlus thiab nrog Nws sib raug zoo. Ua li ntawd yuav ua li cas thiaj kovyeej taus txojkev txhaum thiab dab Ntxwgnyoog?
Cia kom los nyob ze Vajtswv, peb yuav tsum tau xyaum ua neeg tswj tus kheej kom muaj sijhawm nyob ze Vajtswv. Lub sijhawm nrog tus Tswv sib txuas lus, peb yuav tau txais lub zog tshiab. Dhau los ntawm tus Tswv cov lus qhia, peb kawm paub Nws hlub peb, pub koob hmoov kom peb ua lub neej muaj yeej thiab tawg pab txi txiv rau Nws.
Thov Vajtswv,
Tus Tswv, thov Koj pab nyuam yaus paub npaj muaj lub sijhawm thov Vajtswv txhua hnub kom nyuam yaus thiaj nyob ze Koj. Thov Koj pub kom nyuam yaus tau txais kev kaj siab thaum nyob ze hauv Koj txhua hnub. Amees.
Peb puas tau muaj kev txiav txim siab tswj tus kheej dhau los ntawm qhov siv sijhawm thov Vajtswv ntsiag to nrog tus Tswv?
Nyeem Vajluskub hauv peb lub xyoos: Xalumoos Tej Nkauj 1:1-2:7
Kênh Youtube BHKTHN:
