Klei Aê Diê Blŭ: Klei kbiă 22:29-30
Êlan kliăng:
“Đăm bi hnui ôh myơr boh hlâo hlang mơ̆ng hma ih leh anăn mơ̆ng čeh prŏng. Brei kơ kâo anak êkei ih kkiêng êlâo hĭn” (Klei kbiă 22:29).
Klei êmuh ksiêm mĭn: Ya mnơ̆ng phung ƀuôn sang Aê Diê ruah myơr kơ Khua Yang? Ya ngă Aê Diê čiăng digơ̆ ngă snăn? Ya mta klei drei hriăm hlăm klei myơr? Ya klei yuôm bhăn hŏng diih mơ̆ng klei hriăm anei?
Yêhôwa čiăng kơ phung buôn sang Aê Diê myơr kơ Ñu boh mnga hlâo hlang, anak êkei kkiêng êlâo hĭn leh anăn hlô mnơ̆ng tal êlâo. Bruă anei lač truh kơ hƀuê ênuk yuôm bhăn mơ̆ng phung ƀuôn sang Aê Diê ruah. Leh Aê Diê tuh klei bi kmhal tal pluh ti lăn čar Êjip, phung dĭng buăl jăk Aê Diê bi mdjiê jih jang anak êkei kkiêng tal êlâo leh anăn hlô mnơ̆ng tal êlâo mnuih Êjip ƀiădah phung anak êkei kkiêng tal êlâo leh anăn hlô mnơ̆ng tal êlâo mnuih Israel ăt bŏ hŏng klei êđăp ênang. Leh anăn, Aê Diê ba diñu hlăm krĭng lăn Kanaan bŏ hŏng êa ksâo leh anăn êa hnuê êbeh dlai. Snăn, djăp mta klei Aê Diê čiăng kơ diñu myơr kơ Khua Yang jing leh dŏ Ñu (I Klei Yăl Dliê 29:14).
Phung anak êkei kkiêng tal êlâo dưi pioh hjăn čiăng mă bruă hlăm Sang Aê Diê, boh mnga hlâo hlang leh anăn hlô mnơ̆ng tal êlâo dưi yua hlăm klei kkuh mpŭ, leh anăn diñu huă ƀơ̆ng mbĭt hŏng phung khua ngă yang, mnuih ƀun leh anăn phung tač êngao (Klei Mtô Mñă Klei Bhiăn 26:1-11). Aê Diê čiăng kơ phung ƀuôn sang Ñu bi êdah klei mpŭ leh anăn hdơr knga kơ Khua Yang mơ̆ng bruă myơr klei jăk hĭn kơ Ñu. Phung ƀuôn sang Aê Diê brei myơr hŏng ai tiê hơ̆k mơak, jih ai tiê, amâo bi hnui ôh (êlan 29a). Phung ƀuôn sang Aê Diê ruah knŏng myơr klei diñu hlăk mâo msĕ si boh mnga hlâo hlang hlăm đang pla mjing. Ênoh mnơ̆ng myơr amâo dưi čih klă ôh, năng ai tui si klei grăp gŏ sang mâo. Aê Diê knŏng ktrâo lač kơ diñu dưm boh mnga hlâo hlang hlăm sa boh bai (Klei Mtô Mñă Klei Bhiăn 26:2). Leh anăn Aê Diê ƀuăn srăng brei êbeh dlai kơ hlei pô djă pioh klei bhiăn anei (Klei Bi Hriêng 3:9-10).
Ae Diê jing Pô hrih jih jang mnơ̆ng, Ñu hrih mjing lăn adiê knŏng hŏng klei ñu blŭ, klă sĭt Khua Yang amâo čiăng ôh mnơ̆ng phung ƀuôn sang Ñu myơr. Khădah, Aê Diê čiăng diñu hdơr hlăm hƀuê ênuk leh anăn bi êdah klei hdơr knga kơ Khua Yang. Bruă myơr anak êkei kkiêng tal êlâo, hlô mnơ̆ng tal êlâo leh anăn boh mnga hlâo hlang bi hdơr kơ anak čô ênuk êdei thâo kơ klei jăk, klei myang Aê Diê ngă leh kơ djuê ana diñu. Klei anei ăt bi hdơr diñu hdĭp thâo bi khăp, năng hŏng phung ƀuôn sang Aê Diê ruah.
Hruê anei, phung ƀuôn sang Aê Diê brei hdĭp hlăm ai tiê myơr tui si klei Aê Diê čiăng. Myơr hŏng ai tiê kmah leh anăn myơr klei jăk hĭn pô mâo jing sa hdră čiăng bi êdah klei hdơr knga kơ Aê Diê kơ djăp mta klei Aê Diê brei leh kơ drei. Anei ăt jing bruă ngă bi êdah klei drei đaŏ knang kơ Khua Yang, Pô mkăp brei djăp klei drei čiăng năng djŏ. Klei yăl dliê kơ sa čô mniê djiê ung ƀun myơr jing sa čô mnuih bi hmô jăk kơ phung drei tui hluê. (Y-Markôs 12:41-44)
Ya klei drei dưi mñă hlăm klei myơr kơ Sang Aê Diê, đru kah mbha kơ phung djiê ung, hđeh êrĭt amĭ ama leh anăn phung ƀun ƀin?
Ơ Khua Yang, kâo bi mni lač jăk kơ Ih kơ klei Ih mkăp brei êbeh dlai! Kâo thâo săng djăp klei jăk siam kâo mâo kbiă hriê mơ̆ng Ih. Akâo kơ Ih đru kơ kâo bi êdah klei hdơr knga leh anăn gưt asăp Khua Yang hlăm klei myơr bi mơak kơ Ih čiăng kơ klei khăp Aê Diê dưi bi êdah hlăm klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
https://www.youtube.com/channel/UCaSY8ebjVfMKhPups5jZ9yw
