Mathais 9:36
Nqe cim:
“Tsimnyog nej muaj lub siab zoo ib yam li Yexus Khetos lub.” (Filipis 2:5).
Lus nug rau sawvdaws xav:
- Tswv Yexus zoo licas thaum saib pom cov neeg coob coob?
- Vim licas Tswv Yexus hnov zoo li ntawd?
- Pawg Ntseeg thiab koj tus kheej “muaj lub siab ib yam li Tswv Yexus lub” licas?
Ib tsoom cov uas mloog txhua tus,
Mathais 9:35-38 hais sau zog txog Tswv Yexus tes haujlwm nyob hauv Kalilais. Timthawj Mathais ib ke sau qhia luv luv txog tej uas Tswv Yexus tau ua, ib ke sau qhia txog Tswv Yexus tej kev xav tshwjxeeb rau cov neeg coob coob uas nyob ntawm no. Thaum Tswv Yexus pom cov neeg coob coob raws Nws qab, Tswv Yexus tau qhia tshwm nws txojkev hlub pub rau lawv (nqe 36). Lo lus “nws hlub lawv kawg li” xav hais txog txojkev hlub tawm puag hauv nruab siab tuaj. Tswv Yexus qhia tshwm txojkev hlub loj kawg nkaus pub rau cov neeg coob coob, Nws saib pom lawv tej kev txhaum thiab lawv txojkev tsaus ntuj nti, Nws kuj saib pom lawv tej kev ntxhov siab thiab lawv tej kev txomnyem sab ntsujplig uas tsis muaj tus pab. Tsis yog tsuas muaj pab neeg coob coob no xwb, plaub Phau Moo Zoo sau ntau zaug txog qhov uas Tswv Yexus “hlub” cov neeg raug mob, cov neeg dig muag, cov neeg raug dab, hlub Laxalus thaum tseem nyob hauv lub qhov ntxa,… Nws nkag siab tej kev mob uas tibneeg tabtom raug vim tej kev txhaum. Twb yog vim txojkev hlub loj li ntawd thiaj ua rau Vajtswv Leej Tub los hauv ntiajteb tshajtawm txog Vajtswv Lub Tebchaws thiab raug tuag saum tus ntoo khaublig kho tau txhua tus tibneeg sab ntsujplig.
Qhov uas ua rau Tswv Yexus “hlub lawv kawg li”, twb yog vim “lawv ntxhov siab thiab tsis muaj leejtwg pab lawv, lawv zoo ib yam li pab yaj uas tsis muaj tus tswv yug.” Pab neeg coob coob tabtom nyob rau lub tsamthawj uas muaj kev ntxhov siab, tag kev vam ib yam li pab yaj uas tsis muaj tus tswv yug. Ntawm no kuj yog Vajtswv lub siab xav thaum hais txog Nws haivneeg, uas sau nyob rau hauv Exekees 34:6 hais tias: “Yog li ntawd, kuv pab yaj thiaj mus mus los los saum tej laj roob thiab saum tej roob siab. Lawv tawg mus nyob thoob ntiajteb los tsis muaj leejtwg nrhiav thiab coj lawv rov qab los.” Tsis yog tus Tswv haivneeg tsis muaj tus Tswv Txojlus tiamsis twb yog vim cov thawj uas coj lawv tsis mob siab rau tes haujlwm qhuab qhia, lawv ua rau Vajtswv Txojlus poob mus rau qhov uas ua raws cai thiab ua hnyav rau sawvdaws. Tswv Yexus tau cem cov Falixais thiab cov xibhwb qhia Vajtswv txoj kevcai nyob hauv Mathais 23:15 hais tias: “Cov xibhwb uas qhia Vajtswv txoj Kevcai thiab cov Falixais uas ntsejmuag ncaj siab nkhaus, nej yuav raug kev puastsuaj! Nej caij nkoj hla dej Hiavtxwv mus thoob tebchaws nrhiav kom tau ib tug los coj nej txoj kevcai; tiamsis thaum nej nrhiav tau lawm, nej ua rau tus ntawd tsimnyog poob rau hauv ntujtawg tshaj nej ob npaug!.”
Nyob rau tiam tshiab no, tibneeg tsuas xav txog lawv tus tus kheej lawm xwb, kev sib hlub zoo li ploj zuj zus mus lawm; tiamsis tus Tswv haivneeg yuav tsum muaj Vajtswv cov txiv nyob rau hauv lawv lubneej. Peb yuav tsum paub mob siab, khuv leej thaum pom coob leej nyob ibncig ntawm peb tseem tsis tau zoo mob sab ntsujplig, peb yuav tsum ua tej haujlwm qhia txojkev cawmdim pub rau lawv. Peb tsuas hlub taus cov uas tsis tau txais kev cawmdim thaum peb hlub tus Tswv tas siab tas ntsws thiab muaj lub siab xav yim hnub yim zoo thooj tus Tswv. Twb yog vim li ntawd peb yuav tsum “muaj lub siab zoo ib yam li Yexus Khetos lub.”
Thov Vajtswv,
Tus Tswv uas muaj txojkev hlub, thov koj pab nyuam yaus paub hlub cov tsis tau ntseeg los ntawm Koj txoj kev hlub, paub khuv leej cov nyob ibncig nyuam yaus uas yuav raug kev puastsuaj kom nyuam yaus maj nroos coj koj txoj kev hlub pub mus pub rau lawv. Amees.
Ib tsoom cov uas mloog hmov thiab tshua,
Peb puas hlub cov neeg uas tsis tau paub Vajtswv nyob ibncig peb?
Nyeem Vajluskub hauv peb lub xyoo: Yauj 28
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
