Klei Aê Diê Blŭ: Y-Mathiơ 9:36.
Êlan kliăng: “Brei diih mâo klei mĭn msĕ si Krist Yêsu mâo leh”(Philip 2:5).
Klei êmuh ksiêm mĭn: Si Khua Yang Yêsu bi êdah ai tiê leh ƀuh phung ƀuôn sang lu? Ya ngă Ñu mâo ai tiê snăn? Si Sang Aê Diê diih leh anăn diih pô mâo sa klei mĭn msĕ si Khua Yang Yêsu?
Y-Mathiơ 9:35-38 klah čŭn bruă Khua Yang Yêsu ngă ti Galilê. Khua ƀĭng kna Y-Mathiơ hưn mdah kluôm dhuôm kơ bruă Khua Yang ngă leh leh anăn ăt lač kơ klei mĭn yuôm bhăn Ñu mâo hŏng phung ƀuôn sang tinei. Leh ƀuh phung ƀuôn sang lu tui hluê Khua Yang, Ñu bi êdah klei Ñu Pap hŏng digơ̆ (êlan 36). Boh blŭ “mâo klei pap kơ digơ̆” lač kơ klei mgei ai tiê. Khua Yang Yêsu mâo kei pap snăk kơ phung ƀuôn sang, Ñu ƀuh kơ klei soh leh anăn êlan digơ̆ êbat hlăm klei soh mmăt tĭt, Ñu ăt ƀuh klei knap mñai leh anăn mngăt digơ̆ klah đuĕ. Amâo djŏ knŏng hŏng êpul ƀuôn sang anei ôh, dŭm hdruôm hră Klei Mrâo Mrang Jăk čih lu blư̆ Khua Yang Yêsu “mâo klei pap” hŏng phung ruă duam, phung bum ală, phung yang jhat ngă, hŏng Y-Lazar hlăk ñu dôk hlăm msat… Ñu sa klei mĭn hŏng klei ruă duam anak mnuih dôk tŭ kyua klei soh. Kyua klei khăp anăn mtrŭt Anak Aê Diê hriê ti lăn ala čiăng hiu hưn kơ Ƀuôn Ala Mtao Aê Diê leh anăn djiê hrô ti kyâo bi kal čiăng mdrao mngăt ai tiê kơ jih jang mnuih.
Mta phŭn Khua Yang “mâo klei pap kơ digơ̆, kyuadah digơ̆ jing knap mñai leh anăn klah đuĕ mdê mdê msĕ si biăp amâo mâo mgăt ôh”. Êpul ƀuôn sang dôk hlăm boh klei knap mñai, luč klei čang hmăng leh anăn bŏ hŏng klei huĭ hyưt jŭm dar msĕ si êpul biăp amâo mâo pô mgăt. Anei ăt jing klei mĭn Aê Diê sĭt lač kơ phung ƀuôn sang Ñu hlăm Y-Êsêkiêl 34:6 “Biăp kâo bra đuĕ leh, digơ̆ hiu rưng ti dlông jih jang čư̆ leh anăn ti dlông jih jang kbuôn dlông; biăp kâo bra đuĕ leh tar ƀar lăn ala, amâo mâo sa čô tui duah digơ̆ ôh”. Amâo djŏ ôh phung ƀuôn sang Aê Diê amâo mâo Klei Aê Diê Blŭ ƀiădah kyua phung khua kiă kriê amâo bi leh bruă bi hriăm, diñu mjing klei bhiăn knŏng jing klei brei ngă leh anăn ktrŏ snăk. Khua Yang Yêsu ƀuah ăl kơ phung Pharisi leh anăn phung khua čih hră hlăm Y-Mathiơ 23:15 “Knap mñai yơh kơ diih, Ơ phung khua čih hră leh anăn phung Pharisi, phung ai ngăm! Kyuadah diih đuĕ hiu tar ƀar êa ksĭ leh anăn lăn ala čiăng brei sa čô tue mlih klei đăo, leh anăn tơdah gơ̆ mŭt phung diih leh, diih mjing gơ̆ sa čô anak war pui dua bliư̆ jhat hĭn kơ diih pô.”
Hlăm boh klei ala ƀuôn mrâo mrang, klei mĭn knŏng mĭn kơ pô dưi mđĭ, kƀah ai tiê thâo pap; ƀiădah phung ƀuôn sang Aê Diê hdĭp hlăm boh Yang Mngăt Jăk čuh mblang hlăm klei hdĭp pô. Drei thâo klei ruă knap sĭt ƀuh lu phung riêng gah pô ka dưi bi hlao hlăm mngăt, mđĭ ai tiê phung drei brei mâo bruă ngă klă klơ̆ng čiăng hưn klei bi mtlaih kơ digơ̆. Drei knŏng dưi khăp kơ phung mkăn sĭt drei jih ai tiê khăp kơ Aê Diê leh anăn čiăng jing msĕ si Khua Yang hĭn. Kyua anăn “Brei diih mâo klei mĭn msĕ si Krist Yêsu mâo leh”.
Si ngă drei mđing uêñ kơ phung ka thâo kral Aê Diê riêng gah pô?
Wah lač: Ơ Khua Yang jing Pô bŏ hŏng klei khăp, akâo kơ Ih đru kâo khăp kơ phung mkăn hŏng klei khăp Khua Yang, thâo mgei ai tiê ti anăp phung luč ram riêng gah kâo čiăng hur har ba klei khăp Khua Yang kơ digơ̆.
Dlăng Klei Aê Diê Blŭ hlăm tlâo thŭn: Y-Yôp 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
