Klei Aê Diê Blŭ: I Kôrantô 16:15-18
Êlan kliăng: “Kâo mtrŭt diih brei diih mpŭ kơ phung mnuih msĕ snăn, leh anăn kơ grăp čô găp mă bruă mbĭt hŏng diñu” (I Kôrantô 16:16)
Klei êmuh ksiêm mĭn: Hlei jing sang Y‑Sêphanas? Ya bruă diñu ngă leh? Si knuih khua ƀĭng kna Y‑Pôl mtă kơ phung đăo Kôrantô brei mâo hŏng phung sang Y‑Sêphanas leh anăn hŏng phung suăi êmăn hŏng digơ̆? Si drei hlue ngă klei Khua ƀĭng kna Y‑Pôl mtă?
Khua ƀĭng kna Y‑Pôl hưn kơ Y‑Sêphanas leh anăn gŏ sang ñu jing “boh hlâo hlang hlăm čar Akai”. Čar Akai dưi thâo jing sa krĭng lăn điêt mơ̆ng Grek, hlăm hang ksĭ nah Dhŭng krĭng kplang Kôrantô, anăn anei dưi yua čiăng lač kơ kluôm čar. Kyua jing phung đaŏ kơ Krist tal êlâo ti krĭng wăl anăn gŏ sang Y‑Sêphanas mâo Khua ƀĭng kna Y‑Pôl ngă ƀaptem (I Kôrantô 1:6), leh anăn ăt jing phung hrăm mbĭt suăi êmăn hŏng Khua ƀĭng kna Y‑Pôl hlăm bruă hiu hưn Klei Mrâo Mrang Jăk ti krĭng wăl anei (êlan 15). Êngao anăn, hlăk êjai Khua ƀĭng kna Y‑Pôl arăng dôk hlăm sang mnă snăn Y‑Sêphanas hŏng Y‑Pôrtunatus, leh anăn Y‑Akaikus truh nao čuă. Klei nao čuă čhưn anei mđĭ ai Khua ƀĭng kna Y‑Pôl lu snăk (êlan 17-18). Ñu mtă kơ phung đaŏ Kôrantô brei tui hlue leh anăn mpŭ kơ phung mâo ai tiê mă bruă leh anăn gĭr msĕ snăn.
Gŏ sang Y‑Sêphanas leh anăn phung mă bruă hŏng ñu hlăm Sang Aê Diê tal êlâo ti krĭng Akai, năng ai dưi lač diñu jing phung khua kiă kriê Sang Aê Diê hlăm ênuk tal êlâo. Klei Khua ƀĭng kna Y‑Pôl mtô brei ƀuh klei bhiăn mă bruă leh anăn blŭ tlao nao hriê hdơ̆ng ayŏng adei leh anăn phung kiă kriê Sang Aê Diê hlăm klei bi mguôp dua tĭng. Kơtĭng phung mă bruă kơ Aê Diê brei mâo klei hur har mă bruă kơ phung biăp Aê Diê leh anăn mâo sa ai tiê găn klei dleh dlan hŏng phung ƀuôn sang Aê Diê. Brei hdơ̆ng mđing dlăng hŏng bruă ngă klă sĭt hlăm klei dleh dlan čiăng “bi mđĭ ai tiê”, jing ngă hŏng ai tiê hơ̆k mơak, êđăp ênang leh anăn jăk mơak kyua klei bi hdơ̆ng kriê dlăng hlăm klei khăp. Hŏng phung đaŏ brei mâo klei gưt hlue leh anăn mpŭ “phung msĕ snăn”. Anei jing klei bhiăn čiăng kơ Sang Aê Diê krơ̆ng kjăp klei bhiăn, mjing klei găl kơ bruă mkŏ mjing leh anăn mđĭ kyar Sang Aê Diê.
Msĕ si Sang Aê Diê Kôrantô đưm dih, Sang Aê Diê hruê anei ƀiă lu ăt adôk mâo mơh klei bi êka ai tiê, klei bi keh nač ngă kơ drei ƀrư̆ ƀuh bruă klam yuôm bhăn Aê Diê jao. Klei Aê Diê Blŭ hruê anei ăt jing klei mđĭ ai, ktrâo lač grăp čô drei jing phung dôk bi blah hlăm klei bi blah hlăm mngăt, brei drei hdơ̆ng bi đru hŏng jih ai tiê, amâo dưi kƀah ôh sĭt mâo klei čiăng, brei mđing dlăng bi juh, leh anăn hdơ̆ng bi mđĭ ai tiê čiăng hgao klei dleh dlan sĭt hrăm mbĭt mă bruă kơ Aê Diê.
Si drei jing leh phung hdơ̆ng bi mđĭ ai?
Wah lač: Ơ Khua Yang khăp hơiêng! Kâo bi mni lač jăk kơ Ih kyua mâo klei mñă kơ knuih mă bruă, mpŭ kơ phung kiă kriê hlăm mngăt ăt msĕ mơh phung hrăm mbĭt tŭ klei dleh dlan hlăm klei mă bruă kơ Aê Diê, akâo Ih đru kâo jing phŭn bi juh ayŏng adei sĭt tuôm hŏng klei dleh dlan čiăng hdơ̆ng bi mđĭ ai hlăm klei mă bruă kơ Ƀuôn Jăk hlăm adiê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 31:2-21
Kênh Youtube BHKTHN:
