Klei Aê Diê Blŭ: Y-Mathiơ 11:29-30
Êlan kliăng: “Ƀiădah boh mơ̆ng Yang Mngăt Jăk jing klei khăp, klei hơ̆k mơak, klei êđăp ênang, klei thâo gĭr, klei jăk, klei êmhač, klei sĭt suôr, klei êdu êun, klei djŏ hnơ̆ng;” (Galati 5:22-23a).
Klei êmuh ksiêm mĭn: Si ngă, jing leh phung đăo ƀiădah ăt kăn ƀuh ôh êyui boh mơ̆ng Yang Mngăt Jăk? Si ngă čiăng dưi jing sa čô mnuih êdu êun? Si ngă drei mă yua gru kruak anei kơ klei hdĭp grăp hruê?
Êdu êun amâo djŏ jing knuih yang đar anak mnuih ôh, ƀiădah jing boh mơ̆ng Yang Mngăt Jăk (Galati 5:22). Êdu êun jing klei pap mơ̆ng Aê Diê brei leh anăn hŏng bruă mơ̆ng Yang Mngăt Jăk. Tơdah ăt nao kơ Sang Aê Diê leh anăn hur har mă bruă mơh ƀiădah amâo ƀuh ôh êyui boh mơ̆ng Yang Mngăt Jăk, snăn mjưh hĕ êjai čiăng lŏ ksiêm dlăng wĭt klei đăo pô. Tơdah ka đăo sĭt kơ Khua Yang Yêsu ôh, ka mâo ôh klei lŏ bi kkiêng mrâo snăn amâo tuôm dưi dôk hdĭp êdu êun ôh. Ƀiădah tơdah jing anak Aê Diê leh, snăn tơdah čiăng dưi mă tŭ knuih yuôm bhăn anei ăt brei bi ti gŭ pô ti anăp Aê Diê hŏng klei luă gŭ, thâo kral klei hơăi mang amâo mâo klei dưi pô, leh anăn kwưh akâo kơ Aê Diê brei klei êdu êun.
Kyuadah Klei Hơ̆k Mơak Sĭt hlăm Y-Mathiơ kdrêč 5 mâo klei bi mguôp mbĭt, kyuanăn čiăng dưi mâo knuih êdu êun, brei drei thâo kral klei ƀun ƀin hlăm mngăt ai tiê drei leh anăn čŏk hia kơ klei jing mngăt ai tiê drei pô. Sa čô amâo thâo kral ôh klei ƀun ƀin hlăm mngăt ai tiê leh anăn čŏk hia snăn srăng dôk dơ̆ng amâo mâo kpă ênô leh anăn êdu êun hŏng arăng ôh.
Tơdah sa čô kreh krêñ ăl, bi kdơ̆ng êgao hnơ̆ng đei lač kơ arăng amâo thâo mpŭ amâodah bi êka ai tiê ñu; tơdah sa čô dlăng kơ ñu pô yơh jing pô ti krah leh anăn amâo mđing uêñ ôh kơ klei bluh ai phung riêng gah; tơdah ăt kăn tŭ ư mơh jih mta klei ngă anăn kbiă hriê mơ̆ng mngăt ai tiê trŭn hrŏ leh anăn awăt êdu pô, snăn amâo srăng dưi mă tŭ ôh boh êdu êun hlăm klei hdĭp.
Khua Yang Yêsu yơh jing jar bi hmô kơ klei êdu êun, kyua anăn, tơdah čiăng mă tŭ klei êdu êun mơ̆ng Khua Yang Yêsu snăn brei “đua knông kâo leh anăn hriăm mơ̆ng kâo” (êlan 29). Blŭ mdê, brei klei hdĭp pô đuôm kjăp hŏng Khua Yang Yêsu hŏng klei čiêm rông klei bi mguôp hjăn pô hŏng Khua Yang leh anăn mă Khua Yang Pô yơh jing jar bi hmô kơ klei hdĭp pô. Lu phung đăo hruê anei ăt dôk hdĭp hlăm klei dluh lĕ, boh nik nak hlăm klei bi êdah klei êdu êun kyuadah bi msĕ nanao pô hŏng pô mkăn leh anăn amâo mă ôh Khua Yang Yêsu jing jar bi hmô leh anăn jing klei kñăm čiăng dưi jing msĕ si Khua Yang. Khua ƀĭng kna Y-Pêtrôs mtô: “Kyua kơ klei anăn Aê Diê iêu leh diih, kyuadah Krist msĕ mơh tŭ leh klei knap mñai kyua diih, čiăng brei kơ diih klei bi hmô, čiăng kơ diih tui hlue kru Ñu.” (I Y-Pêtrôs 2:21). Klei Khua Yang Yêsu bi hmô brei jing klei kñăm čiăng brei drei tui tiŏ, leh anăn tơdah drei ka dưi mâo ôh klei anei, brei drei ăt čŏk hia nanao kơ drei pô (Y-Mathiơ 5:3-4).
Si ngă drei ƀuh mơ̆ knuih êdu êun, luă gŭ hlăm klei hdĭp drei?
Ơ Khua Yang, akâo kơ Ih pap brei kơ klei amâo klă kluôm kâo, akâo kơ Ih mă bruă ktang nanao hlăm kâo, mkra mjuăt leh anăn bi mlih kâo čiăng kơ kâo ƀrư̆ hruê dưi jing msĕ si Khua Yang, dưi dôk hdĭp êdu êun hŏng phung riêng gah kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 18
Kênh Youtube BHKTHN:
