Klei Aê Diê Blŭ: Klei Kbiă 29:38-46.
Êlan kliăng: “Nĕ anei mnơ̆ng brei ih myơr ti dlông knưl: dua drei êđai biăp mâo sa thŭn grăp hruê nanao hlŏng lar. Brei ih myơr sa drei êđai biăp anăn ti aguah, leh anăn sa drei mkăn ti tlam. (Klei Kbiă 29:38).
Klei êmuh ksiêm mĭn: Si Aê Diê lač kơ Y-Môis klei bhiăn myơr mnơ̆ng kkuh mpŭ kơ Aê Diê grăp hruê? Ya klei yuôm bhăn mnơ̆ng myơr grăp hruê? Ya klei ƀuăn brei kơ phung ƀuôn sang Aê Diê? Ya klei hriăm mñă kơ klei hdĭp drei kkuh mpŭ kơ Aê Diê?
Aê Diê lač kơ Y-Môis ƀhĭ klĭ kơ klei bhiăn kkuh mpŭ kơ Aê Diê. Grăp aguah ưm leh anăn tlam mmăt, phung khua ngă yang srăng nao ksiêm ti sang čhiăm myơr kơ Aê Diê sa mta mnơ̆ng myơr čuh mâo sa kdrêč hlăm pluh (hlăm brô 22 lĭt) hnơ̆ng kpŭng ƀhĭ kpit mmai hlăm sa kdrêč hlăm pă hin êa praĭ (hlăm brô 3,8 lít) mơ̆ng boh ôliwơ bi ƀhĭ leh, leh anăn sa kdrêč hlăm pă hin êa kpiê jing mnơ̆ng myơr tuh (êlan 38-41). Anei jing mnơ̆ng myơr čuh mâo mnâo ƀâo mngưi bi mơak kơ Aê Diê mơ̆ng phung ƀuôn sang Aê Diê ruah hlăm jih jang ênuk (êlan 42). Hdră kñăm Aê Diê bi hriăm myơr mnơ̆ng ngă yang snăn kyua Aê Diê čiăng kơ phung ƀuôn sang Ñu hdơr kơ ñu grăp hruê.
Bruă myơr êđai biăp jing mnơ̆ng myơr jing gru rup mơ̆ng Êđai Biăp Aê Diê, Khua Yang Yêsu srăng tŭ klei djiê msĕ si sa mta mnơ̆ng myơr čuh čiăng djiê hrô klei soh kơ jih anak mnuih, bruă ngă anei bi mơak kơ Aê Diê kyua djŏ si knuih Aê Diê kpă ênô, doh jăk, Pô amâo lăm lui ôh klei bi kmhal kơ klei soh anak mnuih. Mnơ̆ng myơr čuh brei dưi čuh jih, msĕ si klei bi hmô kơ klei hlue gưt kluôm ênŭm leh anăn myơr jih kơ Aê Diê. Mnơ̆ng myơr kpŭng ƀhĭ leh anăn mnơ̆ng myơr tuh mñă kơ phung ƀuôn sang Aê Diê ruah kơ klei čiăng mnơ̆ng ƀơ̆ng huă, êa mnăm jing mơ̆ng Aê Diê mkăp brei snăn diñu myơr kpŭng leh anăn kpiê boh kriăk ƀâo kơ Aê Diê hŏng ai tiê hdơr knga kơ Ñu. Aê Diê čiăng kơ phung ƀuôn sang Aê Diê hdơr nanao leh anăn hdơr knga kơ Aê Diê hlăm klei hdĭp.
Aê Diê ƀuăn srăng trŭn ti anôk sang čhiăm, lač kơ Y-Môis, bi êdah klei Ñu kiă kriê ti krah phung ƀuôn sang Aê Diê. Y-Arôn leh anăn phung anak êkei ñu srăng dưi pioh jing doh jăk čiăng mă bruă ti anăp Aê Diê. Boh nik, Aê Diê ƀuăn ti krah ƀuôn sang Israel leh anăn jing Aê Diê diñu. Diñu srăng thâo kral Aê Diê jing Yêhôwa, Aê Diê diñu, Pô ba leh diñu kbiă mơ̆ng čar Êjip. Klei anei jing yuôm bhăn hŏng phung ƀuôn sang Israel kyua Aê Diê ngă leh lu klei myang čiăng bi mtlaih diñu mơ̆ng phung Êjip ăt msĕ mơh mkăp mnơ̆ng ƀơ̆ng huă grăp hruê kơ diñu. “Jăk mơak yơh găp djuê mâo Yêhôwa jing Aê Diê diñu, jăk mơak yơh phung ƀuôn sang ñu ruah leh jing ngăn dưn ñu pô” (Klei Mmuñ Hđăp 33:12).
Hruê anei grăp čô drei ăt dưi mñă Aê Diê khăp kơ knuih hdĭp drei kkuh mpŭ grăp hruê. Mnơ̆ng drei myơr bi mơak kơ Aê Diê jing klei hơêč hmưi, ai tiê hdơr knga kơ klei bi mtlaih leh anăn klei Aê Diê pap brei, klei huĭ mpŭ leh anăn myơr jih klei hdĭp jing pô hưn bi sĭt kơ Aê Diê pô hlăm grăp hruê.
Ya klei drei myơr kơ Aê Diê čiăng bi mơak kơ Ñu grăp hruê?
Wah lač: Ơ Khua Yang, akâo kơ Ih đru kâo duah klei Ih čiăng hlăm grăp aguah ưm, mđing hmư̆ Klei Aê Diê Blŭ sĭt mlan truh, leh anăn gưt hlue kluôm dhuôm klei Ih iêô. Akâo kơ Aê Diê yua kâo jing pô hiu hưn klei khăp leh anăn klei Aê Diê bi mtlaih kơ mnuih ƀuôn sang, djuê ana kâo.
Dlăng Klei Aê Diê Blŭ hlăm tlâo thŭn: Y-Yôp 37
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
