Khiavdim 29:38-46
Nqe cim:
“Yuav tsum muab ob tug menyuam yaj uas muaj ib xyoo mus tua hlawv rau saum lub thaj, ib hnub dhau ib hnub tsis tu li” (Khiavdim 29:38).
Lus nug rau sawvdaws xav:
- Vajtswv taw qhia rau Mauxes hais txog tej kevcai pehawm tus Tswv txhua hnub zoo licas?
- Tej khoom fij txhua hnub muaj lub ntsiab licas?
- Muaj tej lus cogtseg twg pub rau tus Tswv haivneeg?
- Zaj kawm no muaj dabtsi dawm lossis sib txuas nrog peb lubneej pehawm tus Tswv?
Ib tsoom cov uas mloog txhua tus,
Tus Tswv taw qhia rau Mauxes meej heev txog tej kevcai pehawm tus Tswv. Txhua hnub thaum sawv ntxov thiab thaum tsaus ntuj, cov povthawj yuav tsum tuaj hauv lub Tsevntaub hlawv fij rau tus Tswv ib yam khoom fij tsiaj xyeem uas yog ib tug menyuam yaj muaj ib xyoos, ib yam khoom fij qoob loo uas yog ob choj tseem hmoov nplej zuaj xyaw ib lamhwj tseem roj txiv ntoo, ib lamhwj cawv txiv hmab (nqe 38-41). Ntawd yog tej khoom fij tsw qab ua rau tus Tswv txaus siab uas tus Tswv xav kom Nws haivneeg yuavtsum ua li ntawd txhua hnub mus ibtxhis (nqe 42). Lub homphiaj uas tus Tswv qhia fij tej khoom zoo li ntawd yog Nws xav kom Nws haivneeg nco ntsoov txog Nws txhua txhua hnub.
Qhov uas muab tus menyuam yaj hlawv ua khoom fij yog ua yamntxwv txog Vajtswv Tus Menyuam Yaj, Tswv Yexus yuav raug tuag ib yam li ib tug tsiaj theej txhoj los daws tibneeg qab ntuj tej kev txhaum, tes haujlwm no ua haum Vajtswv siab vim haum tus Tswv tus cwjpwm ncajncees, dawbhuv, Nws tsis xwbtim zam rau tibneeg tej kev txhaum. Tej khoom fij ntawd yuavtsum hlawv kom kub hnyiab tagnrho, xav hais txog txojkev mloog lus thiab ua haujlwm tas siab tas ntsws pub rau tus Tswv. Tej khoom fij qhuab ntuas tus Tswv haivneeg hais tias txhua yam cheemtsum tsis hais kev noj, kev haus puavleej yog Vajtswv ua tus pub thiaj muaj, yog li ntawd lawv thiaj fij ncuav thiab cawv txiv hmab rau tus Tswv ua Nws tsaug. Vajtswv xav kom Nws haivneeg yuav tsum nco ntsoov txog Nws thiab ua Nws tsaug nyob hauv lawv lubneej txhua hnub.
Tus Tswv coglus yuav los nrog Mauxes thiab tus Tswv haivneeg sib ntsib, sib tham hauv lub Tsevntaub. Aloos thiab nws cov tub yuav tau tus Tswv tsa ua povthawj ua tus Tswv tes haujlwm. Tshwjxeeb tshaj yog qhov uas, tus Tswv coglus yuav nrog cov Yixalayees nyob, thiab Nws yuav ua lawv tus Vajtswv. Lawv yuav paub hais tias Nws yog lawv tus TSWV lawv tus Vajtswv uas coj lawv tawm nram tebchaws Iziv los, thiab pub rau lawv muaj noj muaj haus txhua hnub. “Haivneeg uas muaj Vajtswv ua lawv tus TSWV muaj kev kaj siab, cov neeg uas nws xaiv ua nws tug lawm, lawv tau zoo nyob kaj siab lug!” (Ntawv Nkauj 33:12).
Niaj hnub nimno, peb txhua tus tau qhia kom nco ntsoov hais tias tus Tswv nyiam peb lubneej pehawm tus Tswv txhua hnub. Tej khoom fij uas haum tus Tswv siab yog tej lus qhuas, tej lus ua tus Tswv tsaug txog Nws txojkev cawmdim, tej koobhmoov uas Nws pub, thiab los ntawm kev ua lub neej mloog tus Tswv lus thiab timkhawv txog Nws txhua hnub.
Thov Vajtswv,
Tus Tswv, thov pub rau nyuam yaus nrhiav Koj lub siabnyiam txhua tagkis sawv ntxov, mloog Koj Txojlus qhia txhua hmo, thiab ua raws li Koj tej lus nqua hu. Thov Koj siv nyuam yaus ua timkhawv qhia txog Koj txojkev hlub thiab txojkev cawmdim pub rau nyuam yaus haivneeg. Amees.
Ib tsoom cov uas mloog hmov thiab tshua,
Peb fij tej khoom twg ua rau tus Tswv txaus siab txhua hnub?
Nyeem Vajluskub hauv peb lub xyoo: Yauj 37
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
