Klei Aê Diê Blŭ: II Klei Yăl Dliê 35:1-19
Êlan kliăng: “Ară anei, Ơ Israel, ya klei Yêhôwa Aê Diê ih čiăng brei ih ngă, knŏng huĭ mpŭ kơ Yêhôwa Aê Diê ih, êbat hlăm jih jang êlan ñu, khăp kơ ñu, leh anăn mă bruă kơ Yêhôwa Aê Diê ih hŏng jih ai tiê leh anăn hŏng jih mngăt ih, djă pioh klei mtă leh anăn klei bhiăn Yêhôwa kâo mtă kơ ih hruê anei, jing klei jăk mơak kơ ih” (Klei Mtô Mñă Klei Bhiăn 10:12-13)
Klei êmuh ksiêm mĭn: Ya klei Mtao Jôsia mprăp kơ Knăm klei găn? Si ngă klei mkŏ mjing Knăm klei găn? Ya klei mñă kơ drei mơ̆ng bruă Mtao Jôsia ngă?
Leh mbĭt hŏng phung ƀuôn sang lŏ mkŏ mjing klei bi mguôp gưt asăp Aê Diê, Mtao Jôsia gưt hlue si klei čih leh hlăm hdruôm hră Klei Bhiăn mrâo lŏ ƀuh, djă pioh Knăm Klei Găn kơ Yêhôwa ti Yêrusalem, čiăng kơ phung ƀuôn sang lŏ hdơr kơ klei Aê Diê bi mtlaih diñu mơ̆ng čar Êjip. Amâo djŏ knŏng dŭm năn ôh, mtao lŏ djă pioh knăm djŏ hlăm hruê pluh pă mlan sa, jing wưng kčah hlăm klei bhiăn (Bruă Lêwi 23:5). Mtao mprăp jăk snăk kơ mnuih mă bruă, mbha bruă klam leh anăn mđĭ ai digơ̆ bi leh bruă pô. Mtao Jôsia lŏ mprăp djăp ênŭm mnơ̆ng myơr čuh kơ Knăm Klei Găn. Kyua mtao leh anăn phung khua prŏng, khua dlăng Sang yang, phung khua mnuih Lêwi mguôp leh lu snăk biăp leh anăn êmô čiăng pioh yua kơ Knăm Klei Găn.
Klei bhiăn Knăm Klei Găn mâo dua kdrêč: Myơr mnơ̆ng ngă yang (êlan 11-12), leh anăn huă ƀơ̆ng Knăm Klei Găn (êlan 13-15). Phung khua ngă yang, mnuih Lêwi, “Phung mmuñ, phung anak êkei Y-Asap”, grăp čô ngă djŏ bruă pô leh anăn ngă djŏ tui si “arăng čih leh hlăm hdruôm hră Y-Môis” (êlan 12). Phung kiă ƀăng jang ăt dôk ti anôk kiă “kyuadah phung ayŏng adei diñu phung Lêwi mkra brei kơ diñu” (êlan 15). Phung Israel ăt mâo ƀô̆ mta tinăn ăt pioh knăm Kpŭng amâo mâo kpei hlăm kjuh hruê hlue si klei bhiăn kčah leh (Klei Kbiă 23:14-17).
Trăn Klei Aê Diê Blŭ anei mñă klă Mtao Jôsia bi hmô kơ klei huĭ mpŭ leh anăn gưt kơ Klei Aê Diê Blŭ jih ai tiê mơ̆ng bruă mkŏ mjing Knăm Klei Găn jih ai tiê leh anăn prŏng, mơ̆ng bruă mprăp mnuih mă bruă truh kơ myơr ngăn drăp, leh anăn wăt hlăk mmông mkŏ mjing. Mtao ăt bi hmô hlăm klei myơr lu snăk, ênoh hlô mnơ̆ng điêt prŏng mtao myơr hŏng hnơ̆ng lu snăk (êlan 6-7). Mtao Jôsia amâo hơưi ôh ngăn drăp leh anăn ai tiê čiăng myơr kơ Aê Diê klei jăk hĭn kơ Knăm Klei Găn, tơl “amâo mâo sa čô mtao Israel tuôm hdơr mpŭ kơ knăm Klei Găn msĕ si Y-Jôsia…mkŏ mjing leh” (êlan 18).
Y-Yakơ mtô: “Ƀiădah brei diih ngă tui si klei blŭ, amâo djŏ knŏng hmư̆ leh anăn mplư diih pô ôh” (Y-Yakơ 1:22). Mơ̆ng klei Mtao Jôsia bi hmô, drei mâo mñă kơ klei huĭ mpŭ leh anăn gưt kơ Klei Aê Diê Blŭ. Tơdah hmư̆ klei mtô, tơdah dlăng, hriăm Klei Aê Diê Blŭ, drei hmư̆ klei Aê Diê blŭ mtă kơ pô. Klei yuôm bhăn jing drei đăm ôh hmư̆ hŏng klei ngơi mang ƀiădah brei ksiêm dlăng klei hdĭp pô čiăng hlue ngă Klei Aê Diê Blŭ mtô hŏng klei kluôm ênŭm. Anăn jing klei Aê Diê čiăng, leh anăn mơ̆ng klei drei gưt asăp, Aê Diê ăt hơêč hmưi (Klei Mtô Mñă Klei Bhiăn 10:12-13).
Drei dôk bi êdah klei gưt asăp Klei Aê Diê Blŭ hlăm ya bruă?
Wah lač: Ơ Khua Yang, akâo kơ Ih đru kâo jih ai tiê gưt asăp klei Ih mtô leh anăn jih ai tiê mă bruă kơ Ih. Akâo Ih đru kâo ăt mơak myơr kơ Ih ya klei jăk hĭn hlăm klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
