II Xwmtxheej 35:1-19
Nqe cim:
“Ib tsoom Yixalayees, nej cia li ua tib zoo mloog saib tus TSWV uas yog nej tus Vajtswv hais kom nej ua dabtsi: nws xav kom nej hwm thiab ua raws li nws tej lus txhua lo. Nws kom nej muab siab npuab thiab ua nws tes haujlwm kawg siab kawg ntsws, thiab coj raws li nws tej kevcai txhua nqe. Tej kevcai uas hnub no kuv muab cob rau nej yuav muaj nqis rau nej.” (II Kevcai 10:12-13)
Lus nug xav:
– Vajntxwv Yauxiyas tau npaj dabtsi los ua Kevcai Hla Dhau?
– Lub rooj Kevcai Hla Dhau ntawd tau ua li cas?
– Peb tau txais kev qhuab ntuas dabtsi los ntawm Vajntxwv Yauxiyas tej haujlwm?
Tom qab uas nrog cov pejxeem coglus tias yuav mloog tus Tswv tej lus, Vajntxwv Yauxiyas ua raws nraim li tej uas sau tseg hauv phau ntawv Kevcai uas lawv nyuam qhuav nrhiav tau, thiab ua Kevcai Hla Dhau rau tus Tswv nyob hauv lub nroog Yeluxalees, kom cov pejxeem nco txog Vajtswv txojkev cawmdim uas Nws tau cawm lawv tawm hauv tebchaws Iziv los. Tsis tas li ntawd xwb, Vajntxwv tseem ua kevcai ncaj hnub tim kaum plaub ntawm thawj hlis, yog lub sijhawm raws li txoj Kevcai qhia tseg (Levis Kevcai 23:5). Vajntxwv tau npaj txhua yam huv tibsi txij li kev nrhiav cov neeg ua haujlwm, kev faib haujlwm, thiab kev txhawb kom lawv ua tiav lub luag haujlwm zoo. Vajntxwv Yauxiyas tseem npaj tej tsiaj fij hauv Kevcai Hla Dhau kom txaus nkaus. Vajntxwv tus kheej, tej nomtswv, cov povthawj saib xyuas lub Tuamtsev, thiab cov Levis sawvdaws tau fij tej yaj thiab nyuj ntau heev siv rau kev ua Kevcai Hla Dhau.
Kev ua Kevcai Hla Dhau muaj ob feem: Kev tua tsiaj hlawv fij (nqe 11–12), thiab kev noj mov ua Kevcai Hla Dhau (nqe 13–15). Cov povthawj, cov Levis, thiab “cov hu nkauj uas yog Axafes cov xeebntxwv”, txhua tus ua raws nraim li lawv lub luag haujlwm, thiab ua “raws li Mauxes txoj Kevcai qhia tseg” (nqe 12). Cov Levis uas zov lub Tuamtsev tej roojvag tseem sawv ntawm lawv tej chaw ua haujlwm, “rau qhov cov Levis twb npaj Kevcai Hla Dhau rau lawv lawm” (nqe 15). Cov Yixalayees uas tuaj koom ntawd kuj noj Ncuav tsis xyaw Keeb tau xya hnub raws li txoj kevcai (Khiavdim 23:14–17).
Ntu Vajluskub no qhia meej tias Vajntxwv Yauxiyas tau ua qauv zoo hauv kev hwm thiab ua raws li Vajtswv Txojlus kawg siab kawg ntsws dhau ntawm kev npaj rooj Kevcai Hla Dhau zoo thiab loj heev, txij li kev npaj cov neeg ua haujlwm mus rau kev fij tej khoom, thiab thaum ua Kevcai. Vajntxwv kuj ua qauv zoo hauv kev fij khoom siab dav, nws fij tej tsiaj loj tsiaj me coob heev (nqe 6–7). Vajntxwv Yauxiyas tsis khuv xim nws tej nyiaj txiag thiab lub zog, nws muab txhua yam zoo tshaj fij rau tus Tswv hauv Kevcai Hla Dhau, mus txog qib uas Vajluskub sau tseg hais tias: “Cov vajntxwv uas kav tas los lawm, tsis muaj ib tug ua Kevcai Hla Dhau loj npaum li Vajntxwv Yauxiyas” (nqe 18).
Yakaunpaus qhia hais tias: “Nej yuav tsum xyaum ua raws li Vajtswv Txojlus, tsis yog ua cov mloog xwb. Yog nej mloog xwb, tsis ua raws li, ces kuj yog nej rov dag nej” (Yakaunpaus 1:22). Los ntawm Vajntxwv Yauxiyas tus qauv, peb tau ceebtoom ntau yam txog kev hwm thiab kev ua raws Vajtswv Txojlus. Thaum peb mloog lus qhuab qhia, nyeem, lossis kawm Vajluskub, peb yeej hnov Vajtswv lub suab hais rau peb. Qhov tseemceeb yog peb tsis txhob mloog ua si tiamsis yuav tsum ntsuam xyuas tus kheej lub neej, kom peb ua tau raws li Vajtswv Txojlus qhia. Qhov ntawd yog yam uas Vajtswv xav kom peb ua, thiab los ntawm peb txojkev mloog lus ntawd, Vajtswv thiaj foom koob hmoov zoo rau peb (II Kevcai 10:12–13).
Thov Vajtswv,
Tus Tswv, thov pab nyuam yaus ua raws li Koj tej lus qhia thiab tas siab tas ntsws ua Koj tes haujlwm. Thov pab kom nyuam yaus kuj zoo siab fij tej yam zoo tshajplaws hauv lubneej rau Koj. Nyuam yaus tuav Yexus Khetos lub npe thov. Amees.
Peb tabtom qhia tshwm kev ua raws tus Tswv tej lus los ntawm yam dabtsi?
Vajluskub hauv peb lub xyoos: Tes Haujlwm 15
Kênh Youtube BHKTHN:
