Klei Aê Diê Blŭ: Y‑Yêrêmi 27:5-8, 12-13.
Êlan kliăng: “…Đua bĕ knông mtao Ƀaƀilôn, leh anăn mă bruă kơ ñu leh anăn kơ phung ƀuôn sang ñu, leh anăn dôk hdĭp. Si ngă ih leh anăn phung ƀuôn sang ih srăng djiê hŏng đao gưm, klei ư̆ êpa, leh anăn klei ruă tưp, tui si Yêhôwa blŭ leh djŏ kơ găp djuê mnuih amâo srăng mă bruă ôh kơ mtao Ƀaƀilôn?” (Y‑Yêrêmi 27:12b-13).
Klei êmuh ksiêm mĭn: Ya klei Yêhôwa bi mklă jao kơ Mtao Y‑Nebukatnetsar? Ya êlan phung ƀuôn sang Aê Diê ruah Israel bi mĭn srăng ba kơ diñu klei hdĭp? Ƀiădah si ngă klei mĭn Yêhôwa? Si ngă drei tuôm thâo kơ klei anei?
Yêhôwa bi mklă brei klei dưi kiă kriê Yuđa kơ Mtao Y‑Nebukatnetsar leh anăn phung anak čô ñu. “Jih jang găp djuê mnuih srăng mă bruă kơ ñu leh anăn kơ anak êkei ñu leh anăn kơ čô ñu, tơl ênuk knhal tuč truh kơ čar ñu…” (êlan 7a). Anei jing klei Yêhôwa mtă kơ phung ƀuôn sang dŭm ala čar riêng gah brei hluê gưt. Diñu amâo dưi hngah ôh klei Aê Diê mtă, kyua Ñu hưn êlâo leh klei bi kmhal kjham hĭn srăng truh kơ hlei pô amâo gưt asăp Ñu mtă anei (êlan 8).
Leh tlă anăp hŏng klei ksŭng ngă mơ̆ng ala čar nah Dưr, hŏng klei mĭn leh anăn klei pô dlăng, phung ƀuôn sang Aê Diê ruah Israel lač êlan čiăng kơ diñu rơ̆ng klei hdĭp jing brei bi kdơ̆ng hŏng klei ksŭng blah anei, hngah kơ klei tŭ ư jing hlŭn kơ phung roh hriê blah. Ƀiădah hlăm klei Yêhôwa čiăng snăn anei jing klei brei diñu lông găn msĕ si sa klei năng kơ bruă diñu ruah amâo gưt asăp Aê Diê. Tơdah phung ƀuôn sang Aê Diê lač dah hdră diñu mĭn srăng dưi bi mtlaih diñu snăn Yêhôwa brei diñu thâo klă jing đao gưm, ư̆ êpa, klei ruă tưp jing klei diñu srăng tŭ êla truh kơ rai tuč. Kyua anăn, êlan gĭr tŭ ư jing hlŭn ti gŭ klei Mtao Y‑Nebukatnetsar diñu mĭndah srăng djiê ƀiădah boh sĭt anăn jing êlan sa anăn srăng ba klei hdĭp leh anăn klei bi mrâo sĭr ñu kluôm ênŭm gưt asăp Aê Diê.
Yêhôwa jing Pô kiă kriê lăn adiê, Ñu brei klei mtă leh anăn mâo djăp klei dưi čiăng brei klei hdĭp kơ phung gưt Klei Aê Diê Blŭ. Msĕ snăn mơh, hlăm klei hdĭp lu blư̆ drei bi mĭn ngă msĕ snei, msĕ si adih tui si klei drei bi mĭn snăn anăn jing klei jăk hĭn kơ drei, kyua anăn drei knŏng akâo kơ Aê Diê bi sĭt klei drei čiăng. Brei drei hdơr klei mĭn leh anăn êlan Aê Diê amâo msĕ hŏng drei ôh (Y‑Êsai 55:8-9). Aê Diê mprăp leh hdră bi mtlaih jăk hĭn kơ phung ƀuôn sang Aê Diê dưm dih, msĕ snăn mơh Ñu mâo hdră kơ klei hdĭp drei. Klei yuôm bhăn hĭn jing drei gưt asăp leh anăn êbat tui si Klei Aê Diê Blŭ, wăt tơdah klei anăn msĕ si bi mklăk hŏng klei mĭn drei ƀiădah hdră êlan Aê Diê jing klei jăk hĭn ba kơ klei mâo klei hdĭp leh anăn klei bi mrâo mơ̆ng Aê Diê.
Ti krah klei mĭn jăk siam mơ̆ng Aê Diê hlăm Klei Ñu mtă leh anăn klei thâo mơ̆ng drei pô, ya klei drei srăng ruah?
Wah lač: Ơ Khua Yang jing Aê Diê Pô kiă kriê jih jang mnơ̆ng! Kâo bi mni lač jăk kơ Ih kyua hdră jăk hĭn Ih mprăp leh kơ kâo tơdah kâo kluôm ênŭm gưt asăp Ih, akâo kơ Ih đru kâo đaŏ kjăp leh anăn gưt Klei Aê Diê Blŭ čiăng tŭ mă klei jăk hĭn mơ̆ng Ih brei kơ kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 8:10-9:17
Kênh Youtube BHKTHN:
