Klei Aê Diê Blŭ: Klei Bi Hriêng 13 :20-21.
Êlan kliăng: “Hlei pô dôk hŏng phung thâo mĭn srăng jing thâo mĭn, ƀiădah hlei pô jing găp hŏng phung mluk srăng tŭ klei jhat.” (Klei Bi Hriêng 13:20).
Klei êmuh ksiêm mĭn: Ya klei Mtao Y‑Salômôn bi hriăm anak ñu sĭt ruah ƀĭng găp? Ya klei Aê Diê čiăng drei ngă hŏng phung amâo đaŏ kơ Ñu? Si klei hdĭp drei hmăi leh hŏng phung riêng gah?
Mtao Y‑Salômôn brei anak ñu ƀuh klei mdê plah wah mnuih thâo mĭn hŏng mnuih mluk. Mnuih thâo mĭn jing huĭ mpŭ kơ Aê Diê leh anăn ruah nao hlăm êlan kpă ênô Aê Diê, bi mnuih mluk jing ruah êlan klei soh. Hlăm kdrêč êlâo anăn, Mtao Y‑Salômôn bi hriăm leh anak ñu, “Phung kpă atăt gai phung riêng gah diñu, ƀiădah êlan phung ƀai bi klah đuĕ digơ̆.” (Klei Bi Hriêng 12:26). Ară anei, hlăm klei bhiăn ruah găp nao mbĭt, ñu bi hriăm anak ñu brei duah găp thâo mĭn čiăng tui hriăm klei thâo leh anăn đăo digơ̆, mđĭ klei thâo leh anăn klei đăo pô. Êngao anăn, brei anak jih ai tiê ñĕ kơ phung găp mplư hluê ngă klei mĭn soh jhat, bruă ngă soh hŏng klei Aê Diê čiăng. Khua ƀĭng kna Y‑Pôl ăt mñă, “Đăm lĕ hlăm klei mplư: “Phung mah jiăng jhat bi rai knuih jăk.” (I Kôrantô 15:33). Leh anăn Mtao Y‑Salômôn mâo leh sa klei klah čŭn djŏ: phung ngă soh srăng tuôm hŏng klei dleh dlan, ƀiădah klei kpă ênô srăng dưi mâo klei pap mni jing jăk (êlan 21). Snăn sĭt bi hriăm anak ñu ăt mñă kơ anak brei hdĭp kpă ênô, sĭt nik čiăng pô mkăn blŭ hrăm hŏng pô. Anak leh anăn phung ƀĭng găp thâo mĭn srăng bi đru đĭ hriê kơ prŏng hlăm Aê Diê.
Khua Yang Yêsu trŭn ti lăn ala jing mnuih, hdĭp hŏng phung soh, leh anăn ba digơ̆ kmhal klei soh wĭt kơ Aê Diê. Khua Yang ăt dưm drei ti krah lăn ala čiăng ba Klei Mrâo Mrang Jăk kơ lu mnuih. Hlăm klei hdĭp, êngao kơ phung găp djuê hlăm gŏ sang, drei ăt čiăng mâo phung ƀĭng găp. Amâo djŏ knŏng jing phung ƀĭng găp hlăm Aê Diê đuč ôh ƀiădah ăt mâo phung găp hlăm klei hdĭp. Tơdah drei knŏng mâo phung găp jing phung hlăm Krist, snăn drei hiu hưn Klei Mrâo Mrang Jăk kơ hlei pô? Aê Diê čiăng drei jing klei mngač mtrang kơ anôk mmăt, jing phung kpă ênô ba klei khăp Aê Diê kơ lu mnuih. Brei drei tui hriăm leh anăn hluê ngă Klei Aê Diê Blŭ, hdĭp huĭ mpŭ kơ Aê Diê čiăng thâo mĭn, gưt kơ Aê Diê, čiăng mâo klei hdĭp kpă ênô, snăn kơh drei mâo lu mnuih ruah jing mah jiăng leh anăn blŭ hrăm hŏng drei. Anăn jing klei găl kơ drei jing mah jiăng thâo mĭn ktrâo kơ găp drei mâo klei hdĭp lă lar. Khădah, brei drei răng kyua klei kpă ênô leh anăn klei ƀai amâo dưi bi mguôp ôh, klei mngač leh anăn klei mmăt amâo dưi bi mguôp mbĭt ôh (II Kôrantô 6:14). Drei jing djăp hdră kơ jih jang mnuih čiăng dưi bi mtlaih đa đa mnuih (I Kôrantô 9:22) ƀiădah brei răng pô amâo bi mguôp ôh hŏng klei soh.
Drei jing mah jiăng kpă ênô ba klei hdĭp mơ̆ng Aê Diê kơ grăp čô mnuih leh mơ̆?
Wah lač: Ơ Khua Yang, kâo bi mni lač jăk kơ Ih kyua Klei Ih Blŭ mñă kơ kâo brei răng sĭt duah ƀĭng găp hrăm mbĭt. Akâo kơ Ih đru kâo hdĭp hluê si klei kpă ênô, sĭt nik Ih čiăng jing phung găp jăk ba Klei Mrâo Mrang Jăk kơ grăp čô mnuih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 22:25-23:7
Kênh Youtube BHKTHN:
