Klei Aê Diê Blŭ: Galati 3:1-14
Êlan kliăng: “Si ngă diih jing mluk mgu msĕ snăn lĕ? Leh diih dơ̆ng hŏng Yang Mngăt Jăk, ară anei diih čiăng bi leh hŏng klei knang kơ kđeh lĕ?” (Galati 3:3)
Klei êmuh ksiêm mĭn: Ya boh blŭ Khua ƀĭng kna Y‑Pôl yua čiăng bi êdah kơ klei jing phung Galati? Ya ngă ñu blŭ ktrŏ msĕ snăn hŏng digơ̆ lĕ? Ya klei bi hriăm drei mâo mơ̆ng klei hriăm anei?
Ti akŏ hră mơĭt mtam, Khua ƀĭng kna Y‑Pôl ƀuah phung Galati ruăt lui klei Mrâo Mrang Jăk Krist čiăng tui hlue Klei Mrâo Mrang Jăk mkăn, leh anăn tinei ñu amâo huĭ ôh dua blư̆ lač kơ digơ̆ “mluk mgu” (êlan 1, 3), ñu bi êdah dua klei hưn bi sĭt: Klei hưn bi sĭt mơ̆ng digơ̆ pô (êlan 1-5) leh anăn klei hưn bi sĭt mơ̆ng aê digơ̆ Y‑Abraham (êlan 6-14).
Hlăm klei ñu pô hưn bi sĭt, Khua ƀĭng kna Y‑Pôl êmuh lu klei êmuh amâo čiăng klei lŏ wĭt lač ôh čiăng kơ digơ̆ ƀuh klă hĭn kơ klei digơ̆ jing.
Digơ̆ mâo klei thâo săng mngač leh kơ klei Yang Krist djiê ti kyâo bi kal, digơ̆ mă tŭ leh Yang Mngăt Jăk hŏng klei digơ̆ hmư̆ leh anăn đăo, digơ̆ tuôm bi knal leh klei Aê Diê brei Yang Mngăt Jăk kơ digơ̆, klei amâo djŏ ôh digơ̆ ngă leh jing: “Leh diih dơ̆ng hŏng Yang Mngăt Jăk, ară anei diih čiăng bi leh hŏng klei knang kơ kđeh lĕ?” (êlan 3). Hlăm klei hưn bi sĭt tal dua, Khua ƀĭng kna Y‑Pôl brei ƀuh amâo djŏ knŏng hjăn Y‑Abraham ôh jing mnuih mâo klei bi mtlaih hŏng klei đăo, ƀiădah “Klei Aê Diê Blŭ hưn leh êlâo kơ Aê Diê srăng yap kpă phung tue hŏng klei đăo” (êlan 8).
Klei jăk snăk jing mơ̆ng dua klei hưn bi sĭt anei, Khua ƀĭng kna Y‑Pôl amâo lŏ kñăm lu kơ pruê̆ blŭ “dưi mâo klei yap kpă hŏng klei đăo” ôh, ƀiădah ñu lač “diih mă tŭ leh Yang Mngăt Jăk” (êlan 2, 3, 5, 14) leh anăn pruê̆ blŭ “mâo klei jăk jĭn” amâodah “amâo lŏ mâo klei tăm pah ôh” (êlan 8, 9, 10, 13, 14). Mbĭt hŏng klei anăn, Khua ƀĭng kna Y‑Pôl brei ƀuh klei dưi mâo klei yap kpă hŏng klei đăo jing klei jăk hĭn. Klei anăn brei klei hdĭp phung đăo mâo klei ktang mơ̆ng lam čiăng kơ digơ̆ hdĭp hlăm klei jăk jĭn amâo djŏ hlăm klei knap mñai mơ̆ng klei gưt kơ klei bhiăn ôh. Kyuanăn yơh, hlei pô mă tŭ leh Yang Mngăt Jăk hŏng klei đăo srăng knang kơ Yang Mngăt Jăk mơh, amâo djŏ bi leh hŏng klei knang kơ kđeh ôh.
Lu mnuih hlăm phung drei mă tŭ hŏng klei hơ̆k mơak leh anăn mŭt hlăm klei đăo kơ Krist kyuadah thâo anăn jing klei Khua Yang brei, amâo djŏ kbiă hriê mơ̆ng klei drei gĭr hŏng klei suăi êmăn ôh. Ƀiădah lĕ, bi kngăr snăk tơdah leh mă tŭ klei brei hŏng klei pap anăn, drei lŏ ksŭng ngă lu “bruă myang” čiăng kơ drei mâo klei bi mtlaih sĭt nik. Drei “srăng” nao kơ sang Aê Diê, “srăng” dlăng Klei Aê Diê Blŭ, “srăng” mă bruă, “srăng” ngă tui si klei bhiăn, tơdah amâo ngă msĕ snăn ôh, drei “huĭ” tŭ klei tăm pah, tŭ klei Aê Diê bi kmhal. Sĭt nik sa čô đăo kơ Krist sĭt srăng ngă jih jang klei anăn, ƀiădah drei ngă kyua Yang Mngăt Jăk dôk hlăm ai tiê drei mtrŭt, kyuadah anăn jing klei jăk jĭn amâo djŏ klei tăm pah ôh tơdah amâo ngă. Akâo Khua Yang đru grăp čô drei mă tŭ klei ktang mơ̆ng Yang Mngăt Jăk čiăng kơ drei dưi êbat nanao hlăm klei Yang Mngăt Jăk atăt gai.
Ya mnơ̆ng drei mă tŭ leh mơ̆ng Khua Yang? Si drei dôk êbat mbĭt hŏng Khua Yang?
Wah lač: Ơ Khua Yang, kâo lač jăk kơ Ih kyuadah amâo djŏ kâo knŏng mâo klei bi mtlaih hŏng klei pap ôh ƀiădah wăt kâo dưi hdĭp hŏng knhuah hdĭp phung đăo kơ Krist kyua klei pap mơh. Đru kâo knang kơ Yang Mngăt Jăk čiăng êbat mbĭt hŏng Ih grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Bruă Mtao 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
