Klei Aê Diê Blŭ: I Y‑Pêtrôs 4:7-11
Êlan kliăng: “Hlei pô đru bruă arăng, brei ñu mă bruă anăn hŏng klei ktang Aê Diê brei; čiăng kơ hlăm jih jang klei Aê Diê dưi mâo klei guh kơang hlăm Yêsu Krist.” (I Y‑Pêtrôs 4:11b).
Klei êmuh ksiêm mĭn: Ya klei khua ƀĭng kna Y‑Pêtrôs hưn êlâo brei răng mbĭt hŏng klei iêô mthưr? Hŏng ya klei ktang phung đăo mă bruă? Hlăm klei mă bruă, ya jing klei kñăm mrô sa? Drei dôk mă bruă kơ Khua Yang hŏng klei ktang pô amâodah hŏng klei ktang Khua Yang?
Kčưm mŭt hlăm trăn anei jing klei hưn êlâo brei răng: “Klei knhal tuč kơ jih jang mnơ̆ng giăm truh leh” msĕ si sa ênai tiêng liêng mñă kơ phung anak Aê Diê “brei răng mă bruă bi djăl mlam truh yơh”. Tơdah ktang thâo săng kơ hruê mmông drei ti lăn ala jing đŭt dhŭt, snăn ktang hĭn mơh brei drei thâo yua hrue mmông leh anăn klei brei hŏng klei thâo mĭn. Đăm mâo ôh pô yua klei Aê Diê brei hmăng mkăm pioh kơ bruă knuă pô ƀiădah brei mkăm pioh kơ Ƀuôn Ala Mtao Adiê tui si klei ktrâo atăt mơ̆ng Yang Mngăt Jăk.
Tui tluôn klei hưn êlâo brei răng kơ hruê mmông, khua ƀĭng kna Y‑Pêtrôs bi êdah dŭm klei iêô mthưr snei: “brei diih jing djŏ hnơ̆ng leh anăn thâo răng kơ klei wah lač”; “brei diih bi khăp hdơ̆ng diih nanao”; “bi jum bĕ hdơ̆ng diih”; “tui si grăp čô mă tŭ leh klei brei mơ̆ng Aê Diê, yua klei anăn bi đru hdơ̆ng găp” (êlan 7-10). Leh anăn ti knhal tuč jing klei mtă mtăn, ya mta bruă ngă kơ Khua Yang brei ngă jih ai tiê hŏng klei ktang Aê Diê brei “čiăng kơ hlăm jih jang klei Aê Diê dưi mâo klei guh kơang hlăm Yêsu Krist” (êlan 11). Djăp mta bruă drei ngă brei kñăm knŏng hjăn sa klei, anăn jing ba klei guh kơang kơ Khua Yang. Čiăng dưi ngă klei anei, drei amâo dưi mă bruă hŏng klei ktang drei pô ôh ƀiădah brei knang kơ Khua Yang leh anăn tui duah nanao klei Ñu čiăng. Sa čô thâo luă gŭ ñu pô tui duah Khua Yang srăng čiăng myơr kơ Khua Yang klei guh kơang mơ̆ng bruă ñu mă.
Mă bruă jing sa klei bi mjuăt klei hdĭp mngăt myang hlăm knhuah hdĭp klei đăo drei grăp hruê. Mă bruă jing ngă bruă (Êphêsô 4:12), bi asei mlei kđeh êdu awăt drei hung mĭn kơ klei čiăng dêč đuê̆ nanao yơh. Kyuanăn yơh, brei drei bi klă klei Khua Yang čiăng kơ klei hdĭp drei jing “mâo klei bi mtlaih pioh mă bruă”. Sĭt nik Khua Yang thâo kơ klei drei jing awăt snăn Ñu ƀuăn srăng brei klei ktang pioh drei mă bruă. Mơ̆ng anăn, drei dưi lač msĕ si khua ƀĭng kna Y‑Pôl: “Kâo dưi ngă jih jang klei hlăm Krist, Pô bi ktang kâo” (Philip 4:13).
Tơdah phung anak Aê Diê mâo Yang Mngăt Jăk kiă kriê snăn ai tiê klei mĭn mă bruă srăng jing sa kdrêč yuôm hlăm klei hdĭp. Drei duah nanao mmông găl mă bruă kơ Aê Diê hŏng bruă čiăng đru arăng hrô kơ klei knŏng mĭn kơ asei drei pô. Drei srăng uêñ mĭn kơ bruă Phung Sang Aê Diê leh anăn srăng kăp pioh mmông, yua klei Aê Diê brei čiăng mă bruă kơ Khua Yang hŏng lu mta bruă mdê mdê. Drei amâo knang ôh kơ klei ktang drei pô mă bruă leh anăn čiăng kơ arăng tŭ, ƀiădah drei mă bruă hŏng klei ktang Aê Diê brei leh anăn hmăng hmưi kơ Anăn Khua Yang mâo klei guh kơang. Jih jang bruă drei mă brei kbiă hriê mơ̆ng ai tiê khăp kơ Khua Yang leh anăn hŏng klei ktang Khua Yang brei.
Si ngă drei dôk mă bruă hŏng klei ktang Aê Diê brei mơ̆?
Wah lač: Ơ Khua Yang, akâo Ih mñă kâo brei mă bruă kơ Ih hŏng klei ktang Khua Yang brei, amâo knang kơ klei ktang amâodah klei thâo kâo pô ôh. Brei Khua Yang mâo klei guh kơang hlăm bruă kâo mă hŏng ai tiê klei mĭn kâo.
Dlăng Klei Aê Diê Blŭ hlăm tlâo thŭn: Y‑Yôp 42
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
