I Petus 4:7-11
Nqe cim
“Tus uas pab ua haujlwm, nws yuav tsum siv nws lub dag lub zog uas Vajtswv pub rau nws, yog nej cov uas ntseeg Yexus Khetos ua li ntawd, nej yuav ua rau Vajtswv tau ntsejmuag” (I Petus 4:11b).
Lus nug rau sawvdaws xav:
- Timthawj Petus muaj lus ceebtoom thiab lus nqua hu licas?
- Cov ntseeg ua haujlwm los ntawm lub zog twg?
- Lub homphiaj ntawm kev ua haujlwm yog dabtsi?
- Peb tabtom ua haujlwm rau tus Tswv los ntawm peb tus kheej lub zog lossis tus Tswv lub zog?
Tej lus qhib thawj ntawm ntu Vajluskub no yog tej lus ceebtoom hais tias: “twb yuav txog lub sijhawm uas ib puas tsav yam hauv ntiajteb no puastsuaj”, tej lus ntawd zoo li ib lub suab qhuab ntuas tus Tswv cov menyuam “maj nroos ua haujlwm ua ntej tsaus ntuj”. Thaum paub meej hais tias lub sijhawm uas peb ua neej nyob hauv ntiajteb no luv npaum licas, ces yuav ua rau peb paub siv lub sijhawm thiab tej koobhmoov uas tus Tswv pub muaj nqis npaum ntawd. Tsis txhob muaj leejtwg siv tej koobhmoov tus Tswv pub los ua kom muaj nqis rau yus tiamsis yuav tsum siv kom muaj nqis rau Tebchaws Ceebtsheej raws li Vaj Ntsujplig coj.
Tomqab tej lus ceebtoom hais txog lub sijhawm, Timthawj Petus tau nqua hu: “yuav tsum tswj nej lub siab, ceevfaj thiab nquag thov Vajtswv”; “yuav tsum hlub ib leeg tiag tiag”; “yuav tsum zoo siab hlo hu ib leeg los tsev”; “yuav tsum siv tej koob hmoov uas nej tau ntawd kom muaj nqis rau lwm tus” (nqe 7-10). Thiab qhov kawg yog lo lus qhuab ntuas hais tias txawm yuav ua tes haujlwm twg los yuav tsum rau siab ntso ua los ntawm lub zog tus Tswv pub, yog ua li ntawd “yuav ua rau Vajtswv tau ntsejmuag” (nqe 11). Peb txhua tes haujlwm yuav tsum muaj tib lub homphiaj xwb ntawd yog ua rau tus Tswv tau ntsejmuag. Yuav ua tau qhov ntawd, peb tsis txhob siv peb lub zog los ua haujlwm tiamsis yuav tsum vamkhom tus Tswv thiab nrhiav ua raws li Nws lub siabnyiam. Ib tug neeg uas kam txo hwjchim los nrhiav tus Tswv thiaj yog tus uas xav ua rau tus Tswv tau ntsejmuag dhau los ntawm nws kev ua haujlwm pab lwm tus.
Kev ua haujlwm yog ib yam nyob hauv tej kevcai tswj sab ntsujplig uas peb yuav tsum kawm xyaum txhua hnub nyob hauv lubneej ntseeg. Ua haujlwm yuav tsum siv lub zog ua (Efexus 4:12), thiaj ua rau sab nqaij tawv uas txawj qaug zog tsis xav ua. Twb yog vim li ntawd, peb yuav tsum xam pom hais tias tus Tswv dej siab rau peb lubneej yog “tau cawmdim los ua haujlwm”. Tseeb tiag, tus Tswv yeej paub hais tias peb tsis muaj zog, Nws thiaj cog lus pub dag zog rau peb ua Nws tes haujlwm. Dhau qhov ntawd, peb thiaj hais tau li Timthawj Paulus hais tias: “Vim Yexus Khetos txhawb kuv lub zog, kuv thiaj tiv taus txhua tsav yam huv tibsi.” (Filipis 4:13).
Thaum tus Tswv cov menyuam tau Vaj Ntsujplig tswjkav ces nplooj siab xav ua tus Tswv haujlwm yuav dhau los ua ib feem tseemceeb nyob hauv lubneej. Peb yuav siv zias sijhawm los ua tus Tswv haujlwm dhau los ntawm kev ua haujlwm pab lwm tus tsis yog tsuas txhawj txog peb tus kheej. Peb yuav txhawjxeeb txog tej haujlwm hauv Pawg Ntseeg thiab txaus siab siv sijhawm thiab tej koobhmoov uas peb tau los ua tus Tswv tes haujlwm. Peb yuav tsis siv tus kheej lub dag zog los ua haujlwm thiab tos lwm tus lees paub, tiamsis peb yuav ua tus Tswv tes haujlwm los ntawm lub dag zog tus Tswv pub thiab peb xav kom Vajtswv tau ntsejmuag. Peb ua txhua tes haujlwm yuav tsum tawm hauv peb txojkev hlub pub rau tus Tswv tuaj thiab los ntawm lub dag zog uas tus Tswv pub.
Peb puas tabtom ua haujlwm rau tus Tswv los ntawm lub dag zog Nws pub?
Thov Vajtswv
Tus Tswv, thov Koj qhia nyuam yaus paub ua Koj tes haujlwm los ntawm lub dag zog uas Koj pub, tsis yog los ntawm nyuam yaus lub dag zog lossis nyuam yaus tej kev txawjntse. Thov kom Koj tau ntsejmuag dhau los ntawm nyuam yaus kev ua haujlwm. Amees.
Nyeem Vajluskub peb lub xyoos: Yauj 42
Tshooj Youtube BHKTHN: https://www.youtube.com/c/bhkthn
