Yakaunpaus 1:1
Nqe cim:
“Kuv yog Yakaunpaus uas yog Vajtswv thiab tus Tswv Yexus Khetos tus tubtxib: Kuv xa tsab ntawv no tuaj rau Vajtswv haivneeg uas tsiv mus nyob thoob plaws qhov txhia chaw hauv qab ntuj no.” (Yakaunpaus 1:1)
Lus nug rau sawvdaws xav:
– Leejtwg yog tus sau tsab ntawv Yakaunpaus?
– Tsab ntawv no sau xa mus rau leejtwg thiab muaj homphiaj li cas?
– Peb kawm tau yam dabtsi ntawm cov lus nug xov moo no?
Tsab ntawv Yakaunpaus qhib thawj yog cov lus nug xov moo ntawm Yakaunpaus. Hauv Phau Vajluskub Tshiab muaj 4 tug neeg koom tib lub npe. Tus thib ib yog Timthawj Yakaunpaus uas yog Timthawj Yauhas tus tijlaug, raug tua vim txojkev ntseeg xyoo 44 T.Y (Tes Haujlwm 12:2). Tus thib ob yog Timthawj Yakaunpaus uas yog Alafais tus tub (Mathais 10:3). Tus thib peb yog Yakaunpaus uas yog Timthawj Yudas txiv (Lukas 6:16). Tus thib plaub yog Yakaunpaus uas yog Tswv Yexus tus kwv, thaum chivthawj nws tsis ntseeg tus Tswv tiamsis tom qab no los ntseeg Yexus hloov tshiab, thiab ua thawj xibhwb saib Pawg Ntseeg Yeluxalees (Malakaus 6:3; I Kauleethaus 15:7; Kalatias 2:9). Los ntawm cov lus qhia hauv tsab ntawv thiab keebkwm Pawg Ntseeg, peb hais tau tias Yakaunpaus tus uas yog Yexus tus kwv yog tus uas sau tsab ntawv Yakaunpaus hauv Phau Vajluskub Tshiab.
Yakaunpaus tsis khav txog nws tus kheej hais tias yog Tswv Yexus tus kwv lossis yog ib tug thawj xibhwb li. Nws txo hwjchim thiab hais tias kuv “yog Vajtswv thiab tus Tswv Yexus Khetos tus tubtxib”. Lo lus “tubtxib” hais txog neeg ua qhev, tsis muaj hwjchim, vamkhom tus tswv xwb. Yakaunpaus zeem paub Vajtswv thiab Tswv Yexus Khetos yog tus uas kav nws lub neej. Tagnrho peb txhua tus puavleej yog tubqhe rau tus Tswv, ua tus Tswv haujlwm yog qhov zoo thiab yog peb txhua tus qhov kev ua neej.
Tsab ntawv no xa mus rau “Vajtswv haivneeg uas tsiv mus nyob thoob plaws qhov txhia chaw hauv qab ntuj no.” Nqe lus no siv los hais txog cov neeg Yudais uas tsis nyob hauv lub tebchaws Vajtswv coglus tseg pub rau lawv. Lub neej uas nyob luag lub tebchaws ntsib ntau yam kev nyuaj, hais txog cov neeg Yudais ntseeg Yexus tseem ntsib ntau yam kev nyuaj thiab, rau qhov lawv cov kwvtij tsis lees yuav. Dhau tsab ntawv no, Yakaunpaus xav txhawb cov ntseeg uas tabtom ua neej nyob txhua qhov txhia chaw yeejmeem tuav kev ntseeg ruaj, nyob tso siab lug hauv tus Tswv, thiab hais kom cov ntseeg ua neej qhia tawm kev ntseeg nyob nrog tej kev sim siab.
Txawm yog ib lo lus nug xov moo xwb los Yakaunpaus thawj lo lus qhib thawj twb txhawb tau Vajtswv cov menyuam lub zog. Zoo ib yam li Yakaunpaus, peb kuj yog neeg tsis ntseeg, ua neej raws li siab nyiam. Tiamsis vim Vajtswv txojkev hlub, peb tau los paub thiab ntseeg Nws. Ua neej nrog txojkev ntseeg nyob ntiajteb no tsis yoojyim kiag li. Txawm yog li ntawd los, peb paub hais tias qhov tseemceeb tshaj yog kev ntseeg, yog txojkev sib raug zoo nrog Tswv Yexus, muaj tus Tswv kav, tau ua tus Tswv tubtxib. Thov Vajtswv pab kom peb txhua tus lub neej thaum ntsib tus Tswv lawm yuav txaus siab ua neej pub rau tus Tswv, ua tau Nws ib tug menyuam rau siab ntso ua haujlwm.
Thov Vajtswv,
Tus Tswv, nyob hauv lub ntiajteb no, nyuam yaus ua Koj tsaug. Txawm yog yuav ntsib ntau yam kev sim siab, los ntawm txojkev ntseeg nyuam yaus muaj kev kaj siab thiab zoo siab. Thov Koj pab kom nyuam yaus zeem paub tias Koj yog tus kav txhua yam, kom nyuam yaus muaj kev ntseeg, thiab siv txhua lub sijhawm ua Vajtswv tes haujlwm zoo li tus tubtxib ncaj ncees. Nyuam yaus tuav Tswv Yexus lub npe thov, Amees.
Peb twb ntsib tus Tswv zoo li cas thiab puas tabtom qhia tawm tias yus yog “tubtxib rau tus Tswv” lawm tau?
Nyeem Vajluskub hauv peb lub xyoo: Yauhas 17
Kênh Youtube BHKTHN:
