Klei Aê Diê Blŭ: Y‑Yakơ 1:1
Êlan kliăng: “Kâo gơ̆ Y‑Yakơ, sa čô dĭng buăl Aê Diê leh anăn Khua Yang Yêsu Krist, čih mơĭt kơ phung pluh dua găp djuê bra đuĕ tar ƀar lăn ala. Kkuh kơ diih” (Y‑Yakơ 1:1)
Klei êmuh ksiêm mĭn: Hlei pô čih hră Y‑Yakơ? Hră anei čih mơĭt kơ hlei pô leh anăn ya klei kñăm čiăng? Ya klei hriăm drei mâo mơ̆ng klei kkuh čhưn anei?
Hră Y‑Yakơ pŏk kŏ hŏng klei kkuh čhưn mơ̆ng sa čô mnuih anăn gơ̆ Y‑Yakơ. Hlăm hdruôm hră Klei Bi Mguôp Mrâo mâo pă čô mnuih mâo anăn anei. Pô tal sa jing Khua ƀĭng kna Y‑Yakơ, ayŏng Khua ƀĭng kna Y‑Yôhan, djiê kyua klei đăo hlăm thŭn 44 Êdei kơ Krist (Bruă Phung Khua Ƀĭng Kna 12:2). Pô tal dua jing Khua ƀĭng kna Y‑Yakơ, anak êkei Y‑Alphê (Y‑Mathiơ 10:3). Pô tal tlâo jing Y‑Yakơ ama Khua ƀĭng kna Y‑Yut (Y‑Luk 6:16). Pô tal pă jing Y‑Yakơ, adei Khua Yang Yêsu, jing pô tal êlâo amâo đăo ôh kơ Khua Yang Yêsu, ƀiădah leh ñu bi tuôm hŏng Khua Yang Pô kbiă lŏ hdĭp ñu mâo klei bi mlih kluôm dhuôm, leh anăn kơ êdei ñu jing sa čô gĭt gai Phung Sang Aê Diê ti ƀuôn Yêrusalem (Y‑Markôs 6:3; I Kôrantô 15:7; Galati 2:9). Kna ti klei mtô hlăm hră Y‑Yakơ wăt klei yăl dliê kơ Phung Sang Aê Diê, drei dưi lač, Y‑Yakơ adei Khua Yang Yêsu yơh jing pô čih hră Y‑Yakơ hlăm hdruôm hră Klei Bi Mguôp Mrâo.
Y‑Yakơ amâo hưn ktưn kơ ñu pô jing adei Khua Yang Yêsu amâodah jing sa čô pô gĭt gai ôh. Hrô kơ klei anăn, ñu luă gŭ hưn kơ ñu pô jing “sa čô dĭng buăl Aê Diê leh anăn Khua Yang Yêsu Krist.” Boh blŭ “dĭng buăl” čiăng lač kơ hlŭn, pô amâo mâo sa klei dưi ôh, jing dŏ khua ñu kluôm ênŭm. Y‑Yakơ thâo Aê Diê leh anăn Khua Yang Yêsu Krist yơh jing Khua kiă kriê klei hdĭp ñu. Jih jang phung drei jing dĭng buăl Aê Diê sơăi, dưi mă bruă kơ Khua Yang yơh jing klei mơak leh anăn klei kñăm čiăng kơ klei hdĭp grăp čô drei.
Hră anei čih mơĭt kơ “pluh dua găp djuê bra đuĕ tar ƀar lăn ala”. Pruê̆ blŭ anei čiăng lač kơ jih jang phung Yuđa amâo dôk hlăm Lăn Aê Diê Ƀuăn brei kơ phung aê diñu ôh. Klei hdĭp hlăm čar tue bŏ hŏng klei dleh dlan, bi phung Yuđa đăo kơ Khua Yang Yêsu ƀai êjai hĭn dleh dlan kyuadah digơ̆ tŭ klei phung ƀuôn sang digơ̆ hngah. Hŏng hră mơĭt anei, Y‑Yakơ čiăng bi mđĭ ai phung đăo bra đuĕ dôk kjăp hlăm klei đăo, dôk êđăp ênang hlăm Khua Yang, mbĭt hŏng klei anăn ñu ăt mtô mơh kơ digơ̆ êlan dôk dơ̆ng ƀơ̆ng huă bi êdah klei đăo ti krah klei lông dlăng.
Wăt tơdah anei jing klei hưn mdah đŭt, klei kkuh čhưn êđal, ƀiădah pruê̆ blŭ pŏk kŏ kơ hră Y‑Yakơ ba hriê lu klei bi mđĭ ai leh anăn klei bi juh kơ phung anak čô Khua Yang. Msĕ si Y‑Yakơ mơh, drei tuôm jing leh phung amâo mâo đăo, hdĭp knŏng kơ drei pô. Ƀiădah kyua klei pap Khua Yang, drei bi tuôm leh hŏng Ñu leh anăn đăo kơ Ñu. Hdĭp hŏng klei đăo ti krah lăn ala anei amâo mâo ênưih ôh. Wăt snăn dưn mơh, drei thâo mnơ̆ng yuôm hĭn jing klei đăo yơh, jing klei bi mguôp sĭt suôr hŏng Khua Yang Yêsu, mâo Ñu jing Khua kơ klei hdĭp, dưi jing dĭng buăl Ñu. Brei klei hdĭp grăp čô drei tơdah bi tuôm leh hŏng Ñu čuăn hdĭp kơ Ñu, jing dĭng buăl êkei, mniê mă bruă kơ Ñu hŏng jih ai tiê.
Si ngă drei bi tuôm leh hŏng Khua Yang leh anăn si drei dôk bi êdah kơ drei jing “dĭng buăl Khua Yang”?
Wah lač: Ơ Khua Yang, hlăm lăn ala anei, kâo lač jăk kơ Ih wăt tơdah kâo tuôm hŏng lu klei lông dlăng, ƀiădah kyua đăo kơ Ih, kâo mâo klei êđăp ênang leh anăn klei hơ̆k mơak. Đru kâo thâo kral klei myang Ih kiă kriê čiăng kâo dôk kjăp hlăm klei đăo nanao, leh anăn yua jih jang mmông găl mă bruă kơ Ih msĕ si sa čô dĭng buăl sĭt suôr. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Yôhan 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
