Pajlug 1:22-23
Nqe cim.
“Nej tsis totaub li los? Cia li tig qhovntsej mloog thaum kuv ntuas nej, kuv yuav qhia tej lus zoo rau nej thiab yuav faib kuv tej tswvyim rau nej.” (Pajlug 1:23)
Lus nug rau sawvdaws xav:
- Lub Tswvyim nqua hu txog yam dabtsi?
- Thaum teb Lub Tswvyim tej lus nqua hu yuav txais tau yam dabtsi?
- Qhov no txhawb peb lub zog licas rau kev nrhiav tus Tswv thiab ua raws li
Nws Txojlus?
Los ntawm lub siab hlub tshua thiab mob siab rau tibneeg txhaum, Lub Tswvyim tau cem hais tias – “Nej tseem yuav zoo siab ua neeg ruam li nej mus txog hnub twg?… Nej yuav thuam kev txawj ntse mus txog thaum twg thiab?” (nqe 22), tiamsis dhau ntawd yog lo lus nqua hu kawg siab – “Nej tsis totaub li los? Cia li tig qhovntsej mloog thaum kuv ntuas nej” (nqe 23a). Yam uas Vajtswv xav yog qhov uas cov neeg txhaum tso lub neej qub tseg, tig rov los cuag Nws, thiab ntawd yog lub ntsiab ntawm kev lees txim. Tus Tswv tsis nrhiav tus neeg uas zoo txaus txhua yam, “rau qhov txhua tus puavleej ua txhaum thiab tu ncua Vajtswv lub tshwjchim lawm” (Loos 3:23), tiamsis Nws nrhiav cov neeg uas paub lees txim, teb Nws lub suab nqua hu (Lukas 15:7). Lees kev txhaum tsis yog lees raws siab xav tiamsis yog ib yam kev txiavtxim siab hauv lub neej.
Muaj ob lo lus cogtseg pub rau tus uas ua tib zoo mloog Vajtswv Txojlus thiab tig los cuag tus Tswv. Lo lus cogtseg tim ib hais tias, “Cia li tig qhovntsej mloog thaum kuv ntuas nej, kuv…yuav faib kuv tej tswvyim rau nej”. Txais yuav tus Tswv “tej tswvyim” yog tau hloov ua tus neeg tshiab, tau yug dua tshiab (Chivkeeb 1:2), tau txais yam tshiab, tej ntawd hloov sab hauv tuaj (II Kauleethaus 5:17), thiab yog tau txais Vaj Ntsujplig Tus Uas Qhia Qhov Tseeb (Yauhas 14:16-17). Lo lus cogtseg tim ob yog: “Cia li tig qhovntsej mloog thaum kuv ntuas nej, kuv yuav qhia tej lus zoo rau nej”. Thaum peb los cuag tus Tswv, txo hwjchim, lees kev txhaum ces tus Tswv yuav qhia rau peb paub Vajtswv Txojlus. Lossis hais ua lwm seem lus, thaum peb txo hwjchim tig los cuag Vajtswv, Nws yuav ua rau Nws Txojlus tsis yog tej lus qhia, lus qhuab ntuas xwb tiamsis tseem ua rau Nws Txojlus nkag los rau hauv peb lub neej, thaum ntawd peb yuav paub tseeb Vajtswv Txojlus, thiab Vajtswv Txojlus yuav hloov peb lub neej.
Los ntawm yam dabtsi ua rau peb paub Vajtswv Txojlus? Yog los ntawm “tej tswvyim” lossis “Vaj Ntsujplig” uas Vajtswv pub rau peb. Nco ntsoov hais tias Vajtswv tus Ntsujplig thiab Nws Txojlus yeej mus ua ke nraim, tsis sib nrug ib zaug li (Efexus 5:18-19). Lossis hais ua lwm seem lus, yog tsis muaj Vaj Ntsujplig Tus Uas Qhia Qhov Tseeb ces tsis muaj leejtwg totaub txog Qhov Tseeb.
Thaum paub txog tus Tswv lub siab nyiam dhau ntawm Nws tej lus nqua hu kawg siab lawm, peb cia li los cuag Vajtswv thiab kawm Nws Txojlus los ntawm tus cwjpwm txo hwjchim, ua tib zoo mloog Vaj Ntsujplig tej lus qhia (I Thexalaunikes 5:19-21; Efexus 4:30). Ntawd thiaj yog kev nqis peev ntse hauv peb lub neej.
Thov Vajtswv,
Vajtswv, nyuam yaus ua Koj tsaug vim Koj hlub thiab ua siab ntev rau nyuam yaus. Thov pub nyuam yaus zeem paub Koj lub siab zoo thiab teb Koj tej lus nqua hu los ntawm tus cwjpwm txo hwjchim thiab mloog lus. Amees.
Peb teb tus Tswv tej lus nqua hu tig rov los cuag Nws lawm tau?
Nyeem Vajluskub hauv peb lub xyoos: Nkauj Quaj Ntsuag 3:58-4:15
Kênh Youtube BHKTHN:
