Tơdrong Pơđơ̆k 23:19-21
“Mơ̆ng bĕ ơ dăm! Na ih gô gơh hơgei; Wei ba jơhngơ̆m ih lăm trong tơpăt.”(Tơdrong Pơđơ̆k 23:19)
Nơ̆r jet tơchĕng pơwao:
– Pơtao Sôlômôn bơtho pơlung kon sư thoi yơ?
– Sư bơtho kon sư wer weh đơ̆ng lu tơdrong kiơ?
– Bơ̆n oei adrin pơhrăm pơjuăt wă kơ tơdrong arih hơgei kiơ̆ nơ̆r Kră Yang bơtho thoi yơ?
Pơtao Sôlômôn pơma hơđăl gah tơdrong bơtho kon hơ’lơ̆p, đơ̆ng nơ̆r bơtho ih athei mơ̆ng bĕ, iŏk bĕ tơdrong bơtho wă kơ jing bơngai gơh hơgei. Đơ̆ng ‘lơ̆p ih athei hŏk pơhrăm wă kơ jơhngơ̆m ih kiơ̆ trong tơpăt, trŏ. Tơdrong hli yom kơ Kră Yang noh pơtơm blŭng a lăm tơdrong hlôh băt, kơlih kơ thoi noh wă kơ jing gơh hơgei, blŭng a athei băt hli yom kơ Kră Yang, arih mă tơpăt. tơdrong ưh kơ keh jing lăm tơdrong bơtho kon hơ’lơ̆p ba ăn tơdrong ơh sơ’ngon kơ mĕ ‘bă, kon hơ’lơ̆p păng khul tơpôl. Kiơ̆ kơ tơdrong juăt Pah so sơ̆, tơdah minh ‘nu kon hơ’lơ̆p ưh kơ chu, arăng kơ̆l ưh kơ mơ̆ng nơ̆r mĕ ‘bă, bơngai chă thông mang huang đai suai sik, lei na klơ̆m sư păng tơmo tơ̆p mă lôch wă hŭt lê̆ bơngai kơnê̆ đơ̆ng lăm khul tơpôl (Bơtho Khôi juăt 21:18-21), tơdrong juăt ‘nâu pơm kơ đĭ đăng kon pơlei Isơrael hli dêh.
Nơ̆r athei “mơ̆ng bĕ” pơma hơđăl kơ tơdrong mơ̆ng pơ’lơ̆ng, tơgŭm kơ jơhngơ̆m ih lăng tơ tơdrong arih tơpăt. Đơ̆ng tơdrong tơchĕng trŏ gô tơ’bôh kơ ih dôm tơdrong jang trŏ, glăi. Pơtao Sôlômôn tơ’bôh hơđăl kơ kon hơ’lơ̆p sư tơdrong pơtih gia đơ̆ng lu bơngai yak năm lăm tơdrong glăi wă kơ ih “’nĕ kơ pơm buăl juăt hăm lu sư’. ‘Noh bơngai suai sik, lu bơngai sa dư kơhô, lu bơngai sa ĭch ‘bĭch tep. Lu bơngai thoi ‘nâu tơ’bôh kơ tơdrong arih kiơ̆ kơdih, ưh kơ ‘maih adrin păng ưh kơ hiơ̆k tơgŭm kơ lu bơngai nai. Hloh kơ noh dơ̆ng, lu bơngai arih pơm kư̆ kă thoi noh gô ưh pă đei gơh hơgei păng krăng kơchăng bơwei tơmam kơdih, hăm thim tơdrong sa dư kơhô, alah, lu sư gô kơ’bah, dơnuh hoh, bơngai lăm teh đak ‘nâu gô pơchê pơjăm.
Teh đak ‘nâu gô rai wơ̆ pran tôm tơdrong, dôm tơdrong tơmam kư̆m ưh kơ pơdơh lăm tơdrong kăl wă lăm tơdrong arih rim năr rai tŏk, wă kơ lu bơngai ‘lơ̆p hơmuh hơmŏng, athei adrin mă hloh dơ̆ng wă bơwei tơdrong arih pơm ‘lơ̆ng păng wơ̆ pran gah tơdrong arih sa lăm hnam dơnŏ. ‘Bơ̆t tơdrong noh, dah mĕ ‘bă ưh kơ hiơ̆k tơgŭm kơ kon sâu bơ̆n mơ̆ng Kră Yang bơtho đơ̆ng hnam dơnŏ păng khul bơngai lui, lei na ‘bônh dêh pơm kơ kon sâu arih kiơ̆ kơ teh đak wă, yak năm ưh kơ trŏ thoi Kră Yang wă, ‘bônh dêh huŏng lăm tơdrong yoch. ‘Nguaih kơ ‘noh, tơdah kon hơ’lơ̆p arih sa chă tơdrong chơt hiôk, sa et, dư kơhô dah mă khan băt ră ưh kơ ‘maih pơm, ngôi minh ‘bôt yua kơ alah kơ jang dah ưh kơ lăp đon, lei na ưh tam mă tôm ôh tơdrong wơ̆ pran tơdrong pơih să lăm teh đak, lu bơngai chă hơlen pơnhen thoi noh anat dêh wă chă tơdrong ‘lơ̆ng, ưh kơ đei tơdrong arih jang sa kơjăp. Bơngai lui yak năm kiơ̆ trong Kră Yang bơtho, ling lang tơ’bơ̆p tơdrong pơmat, pơlong yua kơ năm tơplơ̆ đơ̆ng teh đak, mălei ba truh tơ tơdrong hiôk hơđơ̆ng, pŭn hiôk păng hiôk hian kiơ̆ kơ Kră Yang ăn. Apinh Kră Yang ăn kơ jơhngơ̆m bơ̆n kơjăp kiơ̆ trong trŏ noh.
Kơkuh kơ Ih Kră Yang, inh bơnê kơ Ih tơ’blŏk kơ inh arih gơh hơgei kiơ̆ nơ̆r Ih. Apinh Ih tơgŭm kơ hnam dơnŏ nhôn wă pơhrăm pơjuăt akâu kơdih, arih ‘lơ̆ng rơgoh wă kơ hnam dơnŏ nhôn arih pơm hơdah kơ anăn Ih. Krao khan yua anăn Yêsu Krist, Amen!
Bơ̆n hăm apinh Kră Yang ăn kơ bơ̆n gơh hơgei weh wer đơ̆ng tơdrong arih kiơ̆ thoi teh đak ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 19
Kênh Youtube BHKTHN:
