II Hơ’mon 6:12-39
“Tơdah kon pơlei pơla Inh, đe krao lu sư kon Inh, drap bon kơkuh, krao khan, chơchă Inh păng tơbral achăng lê̆ trong kơnê̆ lei Inh oei kơpal plĕnh ti gô mơ̆ng, mơnat ăn huay pă jô̆ yoch lu sư păng ăn teh lu sư thoi đêl.” (II Hơ’mon 7:14)
Nơ̆r jet tơchĕng pơwao:
– Pơtao Sôlômôn đei jơhngơ̆m krao khan thoi yơ?
– Nơ̆r sư krao khan wă pơma kơ tơdrong kiơ?
– Tơdrong mă gĭt kăl wă kơ Kră Yang kơtơ̆ng nơ̆r krao khan noh kiơ?
Lăm năr krao khan Pơyơ̆r hnam akŭm kơ Kră Yang, pơtao Sôlômôn kơkuh păng đĭ jơhngơ̆m krao khan hăm Kră Yang. Đei lơ ‘bai pơhrăm iŏk đơ̆ng tơdrong krao khan ‘nâu. Adrol hloh, pơtao drap kơkuh krao khan ‘bơ̆t anăp kon pơlei tơ’bôh sư bơngai iŏk đon ala, jur akâu kơdih kơplah tơ’bơ̆p hăm Yang Tih Hloh. Pơtao băt kơnăl Kră Yang păng kon pơlei Sư gĭt kăl hloh akâu jăn sư ưh kơ trŏ sư lăng kơdih sư gĭt kăl ôh. Păng sư kư̆m dai băt, mă khan Kră Yang đei khan hnam đơ̆ng inh man na anih Ih gô mơ̆t oei (II Hơ’mon 6:6-10; 20) Kră Yang ‘Bok Kei-Dei tih hloh hơtăl plĕnh (trong 18). Hnam akŭm âu bơih anih krao apinh, mơ̆ng kon pơlei Kră Yang apinh (trong 20b). Kră Yang dan “đon, măt” mơ̆ng păng lăng ‘bôh kon pơlei Sư (II Hơ’mon 7:15-16). Thoi noh, Pơtao băt ‘nâu bơih anih krao khan (Êsai 56:7; Markôs 11:17…) anih mă pơtao ‘măn jơ tơ’bưh hăm Kră Yang.
Mă-lei noh ưh kơ trŏ sư băt tơdrong tuch luch gah “anih krao khan”! Nơ̆r krao khan apinh hơđăl tơdrong gĭt mă pơtao băt: “Apinh Ih mơ̆ng lu đĭch đam Ih păng kon pơlei Ih Isơrael krao apinh Ih tơ gah anih ‘nâu, apinh Ih mơ̆ng đơ̆ng plĕnh anih mă Ih oei tơl tơwih nơ̆r apinh păng mơnat ăn.” (trong 21), yua kơ kiơ kăl kơ mơnat? Yua đĭ đăng kơ bơ̆n tă kơ yoch ngăl, tơdrong yoch ưh kơ weh wer đơ̆ng yoch (trong 36), păng lĕch đơ̆ng tơdrong yoch “pơlei đei tơdrong pơngot rơwĕt, jĭ hơbuh, phang ang…; păng lu ayăt wang dăr lu pơlei tih dah đei tơdrong gleh, jĭ jăn truh (trong 28). Tơdrong yoch bơih mă anat tih dêh hăm kon bơngai bơ̆n păng trong wă kơ gơh mơnat noh bơih “wih brŏk tơ Kră Yang, băt anăn Kră Yang, păng krao khan apinh Kră Yang oei lăm hnam âu” (trong 24).
Kon pơlei Kră Yang kăl kơ gơh klaih păng tơdrong lu sư kăl kơ gơh klaih noh tơbral yoch “wih brŏk tơ Kră Yang (trong 24) “achăng tŭk tơdrong yoch” (trong 26). Nơ̆r tơm blŭng a wă pơma pơđâu đơ̆ng lăm 95 pơma pơih blŭng Martin Luther “kơplah Kră Yang ‘Bok Kei-Dei păng Kră Yang Yêsu Krist khan, athei tơbral (Mathiơ 4:17). Kră Yang wă kơ đĭ đăng tơdrong arih lu bơngai lui kơ Kră Yang jơ̆ tơdrong arih băt tơbral”. Nơ̆r krao khan pơtao Sôlômôn păng pêng nơ̆r krao khan nai lăm pah so sơ̆ (Esơra 9; Nêhêmi 9 păng Đaniel 9) tă kơ nơ̆r ‘Bok Kei-Dei khan tơbral. Tơpă bơ̆n kăl pơhrăm iŏk kơplah lăm lơ nơ̆r krao khan ‘lơ̆ng dêh lăm Pah so sơ̆ tă kơ nơ̆r krao khan tơbral, roi tơdrong yoch păng krao khan apinh mơnat.
Lu bơ̆n athei băt krao khan bơih tơdrong Kră Yang ăn đĕch kơ lu bơngai pơm yoch ling lang, đei tơ’bưh hăm Kră Yang. Thoi noh, kăl kơ đĭ jơhngơ̆m tơbral, roi tơdrong yoch na Kră Yang mơnat păng kơtơ̆ng nơ̆r bơ̆n krao khan.
Ơ Kră Yang ‘mêm kơeng, lăm chăl arih inh ling lang pơm yoch hăm Ih, apinh Ih tơgŭm inh băt tơbral păng apinh Ih mơnat kơ inh. Apinh Ih tơgŭm inh đei jơhngơ̆m pran wă kơ inh weh đơ̆ng tơdrong kơnê̆ păng arih wă kơ Ih lăp đon. Krao khan yua anăn Kră Yang Yêsu Krist, Amen!
Lu bơ̆n juăt kơ krao khan hăm Kră Yang jơhngơ̆m thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 2
Kênh Youtube BHKTHN:
