Daniyees 11:36-45
Nqe cim:
“Cov menyuam, nej yog Vajtswv cov menyuam thiab nej twb tawmtsam yeej cov xibhwb cuav lawm, rau qhov Vaj Ntsujplig tus uas nyob hauv nej lub siab muaj hwjchim loj dua tus ntsujplig uas nyob hauv tej neeg ntiajteb lub siab.” (I-Yauhas 4:4).
Lus nug rau sawvdaws xav:
- Tus vajntxwv no zoo li cas?
- Tus vajntxwv ntawd muaj cwjpwm li cas rau Vajtswv?
- Txog lub sijhawm kawg, tus vajntxwv ntawd yuav ua dabtsi?
- Tus vajntxwv ntawd lub neej xaus li cas?
- Peb yuav ua lub neej zoo li cas thaum paub tseeb hais tias yus yog tus uas kovyeej lawm?
Yog txij 1-35 hauv tshooj 11 hais txog tej xwmtxheej muaj tiav nyob hauv keebkwm, ces txij nqe 36-45 hais txog tej uas yav tom ntej yuav muaj. Raws li tus cevlus Daniyees hais hauv Daniyees 9:24-27, ces ntu Vajluskub hnub no yog ncaj rau lub limtiam kawg ntawm xya caum lub limtiam. Nqe 21-35 hais ntau yam txog Antiochus Epiphanes, ua tej kev phem tawmtsam Vajtswv, ua qias Vajtswv lub Tuamtsev thiab Nws haivneeg, nqe 36-45 hnub no hais txog tus vajntxwv uas tawmtsam tus Tswv. Tus vajntxwv no “khav hais tias nws muaj hwjchim loj dua tej vajntxwv” (nqe 36-37). Yog ib tug vajntxwv uas tsis yog saib tsis taus tibneeg xwb, tseem “tsis quavntsej tus vajtswv uas nws cov yawgkoob ib txwm teev los”, “tsis quavntsej txog ib tug vajtswv twg hlo li” (nqe 37), nws “khav hais tias nws muaj hwjchim loj dua tej vajtswv” thiab “loj dua Vajtswv tus uas muaj Hwjchim Loj kawg nkaus.” (nqe 36). Tseeb tiag, nws yog ib tug uas tsis muaj kev ntseeg. Nws ntseeg hais tias tsis muaj ib tug vajtswv twg hlo li thiab tsa nws ua tus loj dua tej vajtswv.
Nqe 40-45 hais txog tus tawmtsam Vajtswv “thaum yuav kawg lub sijhawm”, thiab siv cov lus hais uas tiam Daniyees nyob thiaj totaub: tej tsheb ua rog, tubrog caij nees, nkoj, neeg Edoos, Mau-am,… Nqe 45 qhia paub nws rub tsevntaub npaj tubrog mus ntaus kob rog thaum kawg, uas yog kob rog Amankedoos hauv Tshwmsim 16:13-16 hais. Kob rog no, tus uas tawmtsam tus Tswv yuav “tsis muaj leejtwg pab nws li” (nqe 45). Nws lub neej yuav xaus rau kob rog kawg ntawm qhov zoo thiab qhov phem.
Ib zaug ntxiv, peb pom tus Tswv qhia paub yav tom ntej rau Daniyees thiab Nws haivneeg kom lawv muaj kev cia siab ruaj khov. Thaum ceebtom cov ntseeg uas tabtom qaug zog vim ntsib tej kev sim siab ntawm tus uas tawmtsam tus Tswv, Timthawj Yauhas hais tias: “Cov menyuam, nej yog Vajtswv cov menyuam thiab nej twb tawmtsam yeej cov xibhwb cuav lawm, rau qhov Vaj Ntsujplig tus uas nyob hauv nej lub siab muaj hwjchim loj dua tus ntsujplig uas nyob hauv tej neeg ntiajteb lub siab.” (I-Yauhas 4:4). Qhov peb pom yus lub neej me, ntshai, thim rov qab twb yog vim lub zog ntawm tej kev phem ua rau peb sawv tsis ruaj. Txawm yog cov vajntxwv phem sawv thiab ploj mus, lawv yuav ua li cas rau tus Tswv lub Tuamtsev thiab Nws haivneeg los tsuas yog ib vuag xwb, thaum xaus lawv kuj yog tus tsis muaj zog, swb. Peb yog cov uas tuaj tus muaj zog tog, peb yuav kovyeej.
Thov Vajtswv
Tus Tswv, Koj yog tus uas kovyeej Ntxwgnyoog thiab lub ntiajteb saum ntoo khaublig. Thov Koj pab kom nyuam yaus ua siab tawv qhawv ntseeg thiab ua siab ntev nrog Koj mus. Amees.
Peb puas tabtom ua neej zoo li tus neeg muaj yeej lawm tau?
Nyeem Vajluskub hauv peb lub xyoos: Yelemis 32:1-25
Kênh Youtube BHKTHN:
