Klei Aê Diê Blŭ: Y‑Đaniel 11:36-45
Êlan kliăng: “Ơ phung anak điêt, diih jing dŏ Aê Diê leh anăn dưi hŏng diñu leh; kyuadah Pô dôk hlăm diih jing prŏng hĭn kơ pô dôk hlăm lăn ala.” (I Y‑Yôhan 4:4)
Klei êmuh ksiêm mĭn: Si klei hưn mdah kơ mtao tinei? Si knhuah hdĭp mtao anei hŏng Aê Diê? Truh ênuk knhal tuč, ya klei mtao anăn srăng ngă? Si boh tŭ ti knhal tuč kơ mtao anei? Si knhuah drei srăng dôk hdĭp tơdah thâo klă drei dôk tĭng mâo klei dưi hĭn?
Tơdah mơ̆ng êlan 1-35 kdrêč 11 lač kơ klei truh bi sĭt leh hlăm hƀuê ênuk ti lăn ala, snăn mơ̆ng êlan 36-45 lač kơ klei srăng truh hruê êdei anăp ka bi sĭt ôh. Tui si klei blŭ khua pô hưn êlâo hlăm Y‑Đaniel 9:24-27, snăn kdrêč Klei Aê Diê Blŭ hruê anei dôk hlăm hruê kăm knhal tuč hlăm kjuh pluh hruê kăm. Êlan 21-35 lač lu kơ Antiochus Epiphanes, pô ngă klei gao klei bhiăn, ngă bi rai Sang Yang leh anăn kơ phung anak ƀuôn sang Aê Diê, bi êlan 36-45 hruê anei lač kơ sa čô mtao leh anăn Antiochus jing rup bi hmô, jing pô bi kdơ̆ng hŏng Aê Diê. Jing sa čô mtao “mgao”, “mpŭ ñu pô ti dlông hĭn kơ jih jang yang” (êlan 36-37). Ñu jing sa čô mtao amâo djŏ knŏng mgao hŏng mnuih ôh ƀiădah wăt “amâo uêñ ôh kơ yang phung aê ñu”, “ñu amâo uêñ kơ yang mkăn ôh” (êlan 37), ñu “bi mđĭ ñu pô ti dlông hĭn kơ jih jang yang” leh anăn “blŭ mgao hŏng Aê Diê kơ jih jang yang” (êlan 36). Klă sĭt, ñu jing pô amâo mâo đăo kơ ya mta klei đăo ôh. Ñu tui hlue klei mĭn amâo mâo yang leh anăn mpŭ kơ ñu pô jing yang ti dlông hĭn.
Êlan 40-45 hưn mdah kơ Pô Bi Kdơ̆ng hŏng Aê Diê hlăm “ênuk knhal tuč” hŏng klei blŭ phung hdĭp hlăm ênuk khua pô hưn êlâo Y‑Đaniel dưi thâo săng: hŏng êdeh aseh, phung đĭ aseh, hŏng kŭmpăn, phung Êđôm, phung Môap,… Êlan 45 brei ƀuh ñu mdơ̆ng sang čhiăm čiăng mprăp kơ klei ba phung kahan nao bi blah klei bi blah knhal tuč ruê̆, kdrăn blah Harmagêdôn hlăm Klei Bi Êdah 16:13-16 hưn. Hlăm klei bi blah anei, Pô Bi Kdơ̆ng hŏng Aê Diê srăng “amâo mâo pô đru ñu ôh” (êlan 45). Hruê tuč ruê̆ kơ pô anăn truh leh hlăm klei bi blah prŏng ti krah klei jăk hŏng klei jhat.
Lŏ sa blư̆, drei ƀuh Khua Yang ăt lŏ bi êdah klei truh adôk kbưi snăk hŏng ênuk khua pô hưn êlâo Y‑Đaniel leh anăn phung ƀuôn sang čiăng bi kjăp ai tiê diñu. Tơdah hưn êlâo brei răng, phung đăo dôk mgei ai tiê kyua tlă anăp hŏng klei lông dlăng mơ̆ng Pô bi Kdơ̆ng hŏng Aê Diê, khua ƀĭng kna Y‑Yôhan đru phung đăo dôk hơĭt ênang hŏng klei kñăm: “Ơ phung anak điêt, diih jing dŏ Aê Diê leh anăn dưi hŏng diñu leh; kyuadah Pô dôk hlăm diih jing prŏng hĭn kơ pô dôk hlăm lăn ala” (I Y‑Yôhan 4:4). Hlăm klei hdĭp drei ƀuh kơ drei jing điêt mang, huĭ blao, kdŭn tluôn, kyuadah drei ktư̆ yơ̆ng ti anăp klei ktang myang klei jhat ƀai. Ƀiădah, wăt tơdah phung mtao jhŏng ktang jhat ƀai truh leh anăn đuĕ, wăt tơdah ya klei diñu ngă kơ Phung Sang Aê Diê leh anăn kơ phung anak ƀuôn sang Ñu, ăt knŏng jing bhiâo mơh, knhal tuč ruê̆ kơ diñu ăt jing klei dlưh lĕ. Bi drei jing tĭng nah klei ktang, tĭng nah dưi hĭn.
Si ngă drei dôk hdĭp hŏng ai tiê klei mĭn phung mâo klei dưi hĭn mơ̆?
Wah lač: Ơ Khua Yang, akâo Ih đru kâo hdơr nanao Ih dưi hĭn leh hŏng yang jhat leh anăn hŏng lăn ala ti kyâo bi kal, kyuanăn kâo jing tĭng nah dưi hĭn. Akâo Ih đru kâo jhŏng bi blah nanao kyua klei đăo leh anăn dôk sĭt suôr hŏng Khua Yang.
Dlăng Klei Aê Diê Blŭ hlăm tlâo thŭn: Y‑Yêrêmi 32:1-25
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
