Klei Aê Diê Blŭ: Y-Luk 19:1-10
Êlan kliăng: “Ơ Khua Yang, nĕ anei kâo brei kơ phung ƀun ƀin sa mkrah dŏ dô kâo, leh anăn tơdah kâo tuôm mplư ƀơ̆ng ngăn arăng, kâo lŏ bi wĭt pă blư̆ lu hĭn” (Y-Luk 19:8)
Klei êmuh ksiêm mĭn: Si mnuih Y-Sačê jing? Si bruă ñu ngă bi êdah klei ñu êpa mhao čiăng bi tuôm hŏng Khua Yang leh anăn kmhal sĭt hŏng jih ai tiê? Ya mta bruă drei ngă čiăng bi êdah ai tiê kmhal sĭt?
Y-Sačê jing sa čô mnuih mâo awan biêr, “jing sa čô khua phung rĭng jia leh anăn jing mdrŏng” (êlan 2). Anăn “Y-Sačê ” mblang jing “mnuih kpă ênô” ƀiădah klei ñu hdĭp bi mklăk hŏng anăn iêô kơ ñu. Phung ngă bruă rĭng jia ênuk anăn khăng hrui jia êbeh hĭn kơ ênoh bi kčah čiăng bi mdrŏng pô, kyuanăn ƀuôn sang bi êmut leh anăn ñĕ kbưi. Kyuanăn, wăt tơdah mdrŏng sah dưn ƀiădah Y-Sačê ăt kăn mâo klei mơak rei.
Y-Sačê hmư̆ hing kơ Khua Yang Yêsu, Pô mâo klei myang dưi bi mlih leh anăn đru bi mtlaih lu mnuih, hlăm anăn mâo wăt phung mnuih soh jhat, kyua čiăng thâo klă ñu duah djăp êlan čiăng thâo hlei Khua Yang jing. Wăt tơdah ñu luă mŭt hlăm phung lu, ñu ăt kăn dưi ƀuh Khua Yang Yêsu rei kyua awan ñu đŭt biêr. Ƀiădah ñu amâo kdŭn ôh. “Snăn ñu êran nao êlâo leh anăn đĭ sa ƀĕ ana kyâo Sikamôr” čiăng dlăng Khua Yang Yêsu, kyuadah Khua Yang Yêsu srăng găn tinăn.
Khua Yang Yêsu thâo klă klei Y-Sačê gĭr ktĭr leh anăn ai tiê ñu hmăng hmưi čiăng bi tuôm hŏng Khua Yang. Kyuanăn, hlăk găn anôk ana kyâo Sikamôr Khua Yang angưi dlăng kơ ñu leh anăn lač kơ Y-Sačê trŭn bĕ bi djăl, kyuadah hruê anei Khua Yang srăng dôk hlăm sang ñu yơh. Amâo lŏ mâo klei mkăn mơak hĭn kơ Y-Sačê ôh! Ñu trŭn mtam leh anăn jum Khua Yang hŏng klei hơ̆k. Tơdah dưi bi tuôm hŏng Pô Bi Mtlaih, mngăt ai tiê ñu pŏk mngač leh anăn ai tiê ñu mčah ti anăp klei soh jhat ñu tuôm ngă leh. Mmông anei, ñu thâo kral klei yuôm hĭn jing amâo djŏ ngăn dŏ, anôk bruă ñu dôk djă ôh, ƀiădah jing klei bi mtlaih, klei hơ̆k mơak sĭt hlăm Yang Krist. Ai mĭn kmhal sĭt Y-Sačê bi êdah hŏng klei ngă sĭt êmĭt, ñu amâo kĭ kơ̆ ƀuăn srăng mbha ya mnơ̆ng ñu mâo kơ phung mnuih ƀun ƀin. Kdlưn hĭn kơnăn mơh, ñu hmiêt mkăp lŏ bi wĭt amâo djŏ dua blư̆, tlâo blư̆ ôh, ƀiădah pă blư̆ lu hĭn ngăn arăng ñu tuôm mplư ƀơ̆ng leh. Anei jing sa klei năng čiăng ngă mơ̆ng ai tiê kmhal sĭt amâo djŏ kmhal mkrah dưh ôh.
Khua Yang Yêsu ƀuh klă ai tiê kmhal sĭt Y-Sačê, Khua Yang lač: “Hruê anei klei bi mtlaih truh leh kơ sang anei” kñăm čiăng bi klă Y-Sačê mâo klei bi mlih sĭt. Leh anăn anei yơh jing klei kñăm čiăng Ñu hriê ti lăn ala “čiăng duah leh anăn bi mtlaih pô luč leh”. Tơdah sa čô mnuuih kmhal sĭt, brei mnuih anăn kăp hưn klei soh leh anăn lui jih klei soh jhat pô tuôm ngă leh, amâo djŏ knŏng hŏng klei blŭ ƀiădah brei mâo bruă ngă sĭt êmĭt. Klei mrâo mrang mơ̆ng khua ƀĭng kna Y-Pôl tuôm mtô mblang kơ jih jang mnuih jing “brei diñu kmhal kơ klei soh leh anăn wĭt kơ Aê Diê, leh anăn bi êdah bruă năng hŏng klei diñu kmhal kơ klei soh.” (Bruă Phung Khua Ƀĭng Kna 26:20). Klei kmhal sĭt brei mâo bruă năng hŏng klei kmhal hrăm mbĭt.
Si ngă drei hmiêt mkăp bi mlih mnơ̆ng drei mâo čiăng tŭ jum Khua Yang Yêsu Pô Bi Mtlaih mơ̆?
Wah lač: Ơ Khua Yang, bi mni lač jăk kơ Khua Yang hriê leh čiăng duah leh anăn bi mtlaih kâo. Akâo Khua Yang pap brei kơ jih klei soh adôk hlăm kâo. Akâo Khua Yang đru kâo thâo kral klei soh kâo, hŏng jih ai tiê kmhal sĭt leh anăn bi êdah mbĭt bruă năng hŏng klei kmhal kơ klei soh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
