Lukas 19:1-10
Nqe cim:
“Xakhais sawv ntsug thiab hais rau Yexus hais tias, “Tus Tswv, koj mloog kuv hais! Kuv yuav muab tej uas kuv muaj ib nrab faib rau cov neeg pluag. Thiab yog kuv tau muab leejtwg ib yam dabtsi los yuav lawm, kuv yuav them plaub npaug rov qab rau tus ntawd” (Lukas 19:8)
Lus nug rau sawvdaws xav:
– Xakhais yog tus neeg zoo li cas?
– Tes haujlwm twg qhia tshwm Xakhais muaj lub siab xav tau ntsib Tswv Yexus thiab tso kev txhaum tseg tiag tiag?
– Peb muaj tes haujlwm meej dab tsi kom qhia tshwm lub siab tso kev txhaum tiag tiag?
Xakhais yog neeg qigtaub, “nws yog cov sau se tus thawj thiab nws muaj nyiaj heev” (nqe 2). Lub npe “Xakhais” muaj lub ntsiab yog “neeg ncaj ncees” tiamsis nws ua neej tsis thooj li nws lub npe. Cov neeg sau se hnub thaud pheej sau ntau tshaj txoj kevcai, los ua rau yus npluanuj, thiaj li raug tebchaws ntxub thiab tsis muaj leejtwg xav nyob ze lawv. Vim li ntawd, txawm yog npluanuj los Xakhais yeej tseem tsis tau txaus siab.
Xakhais hnov xov txog Tswv Yexus, tus uas muaj hwjchim hloov thiab cawm tau coob tug tibneeg, hauv ntawd muaj tagnrho cov neeg txhaum thiab, vim xav paub nws thiaj nrhiav txhua txoj kev kom ntsia pom saib Tswv Yexus yog leejtwg. Txawm yog nws siv zog txiv mus hauv pab neeg coob coob los nws yeej ntsia tsis pom Tswv Yexus vim nws qigtaub. Tiamsis nws tsis tso tseg. Nws maj nroos “khiav huas sawvdaws ntej mus nce ib tsob ntoo xikamaus” kom saib pom Tswv Yexus mus dhau ntu kev ntawd.
Tswv Yexus paub zoo txog Xakhais txoj kev siv zog thiab lub siab uas xav pom Nws. Yog li ntawd, thaum hla dhau tsob ntoo xikamaus, Nws tig mus ntsia thiab hais kom Xakhais nqis los sai sai, rau qhov Nws yuav mus so hauv Xakhais tsev. Xakhais zoo siab tshaj! Nws txawm nqis nrawm nroos los txais tos tus Tswv. Thaum ntsib tus Cawmseej, nws sab ntsujplig pom kev thiab nws lub siab mob rau tej yam uas yuam kev thiab tau ua txhaum lawm. Nim no, nws zeem paub hais tias yam uas muaj nqis tshaj plaws tsis yog tej khoom qhov txhia chaw lossis txoj hauj lwm uas nws tuav, tiamsis yog txoj kev cawmdim thiab txoj kev zoo siab tseeb hauv Tswv Yexus. Xakhais lub siab uas tso kev txhaum tseg tiag tiag qhia tshwm ntawm ib tes haujlwm meej meej, nws tsis khuv xim yuav muab tej uas nws muaj pub rau cov neeg pluag. Thiab tsis tas li ntawd, nws txaus siab them nyiaj rov rau cov uas nws muab luag tug los yuav lawm tsis yog ob npaug, peb npaug tiamsis yog plaub npaug rov rau. No yog ib tes haujlwm ntawm lub siab uas tso kev txhaum tiag tiag.
Tswv Yexus pom tseeb Xakhais lub siab uas tso kev txhaum tseg, Nws thiaj hais tias: “Hnub no txojkev cawm dim twb los rau hauv tus txivneej no lub tsev lawm” qhia meej hais tias Xakhais twb hloov lawm tiag tiag. Thiab qhov no kuj yog lub hompliaj uas Tswv Yexus los rau hauv ntiajteb “los nrhiav cov neeg uas yuam kev lawm, thiab cawm kom lawv dim”. Thaum ib tug tibneeg tso kev txhaum tiag tiag, tus ntawd yuavtsum lees kev txhaum thiab tso tej yam uas yus tau ua yuam kev tseg, tsis yog los ntawm lolus hais xwb tiamsis yuavtsum muaj ib tes haujlwm meej meej qhia tshwm. Timthawj Paulus tau qhia rau “sawvdaws nyias tso nyias tej kev txhaum tseg thiab tig rov los cuag Vajtswv, thiab nyias ua nyias lub neej kom phim qhov uas nyias twb tso nyias tej kev txhaum tseg lawm” (Tes Haujlwm 26:20). Tso kev txhaum tseg tiag tiag yog yuavtsum muaj ib tes haujlwm tsimnyog nrog ua ke.
Thov Vajtswv,
Vajtswv, nyuam yaus ua Koj tsaug uas Koj tau los nrhiav thiab cawm nyuam yaus. Thov zam txim rau nyuam yaus tej kev txhaum, thov pab nyuam yaus muaj lub siab tso kev txhaum tiag tiag thiab ua tshwm tes hauj lwm meej meej los ua tim khawv rau kev tso kev txhaum. Nyuam yaus tuav Tswv Yexus Khetos lub npe thov, Amees.
Peb puas kam poob tej yam uas peb muaj los txais yuav Cawmseej Tswv Yexus?
Nyeem Vajluskub hauv peb lub xyoos: 2 Vajntxwv 1
Kênh Youtube BHKTHN:
