Klei Aê Diê Blŭ: Y‑Mathiơ 12:1-5
Êlan kliăng: “Brei ih hdơr kơ hruê sabat čiăng pioh gơ̆ jing doh jăk” (Klei Kbiă 20:8)
Klei êmuh ksiêm mĭn: Ya bruă Khua Yang Yêsu leh anăn phung ƀĭng kna ngă hlăm hruê Sabat? Ya ngă phung Pharisi lač kơ Khua Yang? Si Khua Yang Yêsu mblang kơ klei yuôm bhăn mơ̆ng hruê Sabat? Si drei bi êdah ai tiê mpŭ leh anăn pioh hjăn hruê kjuh čiăng kkuh mpŭ kơ Khua Yang?
Hlăk Khua Yang Yêsu leh anăn phung ƀĭng kna găn hma mdiê ƀlê, phung ƀĭng kna Ñu êpa, anăn rač ƀơ̆ng hĕ mdiê. Phung Pharisi lač kơ bruă anei kyua hlue si klei bhiăn klei đăo Yuđa hlăm hdruôm hră Mishnah, kăm wiă mdiê hlăm hruê sabat, anăn diñu lač Khua Yang Yêsu leh anăn phung ƀĭng kna ngă leh bruă “amâo dưi ngă” hlăm hruê sabat. Hdră kñăm mơ̆ng klei ƀuah lač anei jing mdlưh kơhưm Khua Yang Yêsu hlăk êjai Ñu jing sa čô Rabi ƀiădah amâo hlue ngă ôh hdră bhiăn, snăn dŭm klei Khua Yang mtô amâo năng đăo ôh. Khua Yang Yêsu yua leh klei yăl dliê hlăm I Y‑Samuel 21:1-6 hlăk Khua ngă yang Y‑Ahimelek amâo hlue gưt klei bhiăn brei Y‑Đawit leh anăn phung tui hlue ñu ƀơ̆ng mnơ̆ng pioh kơ Aê Diê ti anôk doh jăk kyua digơ̆ dôk êpa. Leh anăn wăt phung khua ngă yang ăt ngă soh mă bruă hlăm hruê sabat ƀiădah amâo dlăng jing soh ôh.
Khua Yang Yêsu čiăng mñă kơ hdră kñăm mơ̆ng hruê sabat jing čiăng kơ grăp čô mnuih dưi mdei leh anăn kkuh mpŭ kơ Aê Diê, klei hdră bhiăn čiăng jing čiăng kơ anak mnuih bi êdah klei khăp hŏng Aê Diê leh anăn hdơ̆ng pô. Hŏng mnuih Pharisi, klei bhiăn kơ hruê sabat jing yuôm bhăn hĭn kơ bruă mdei hlăm hruê sabat, diñu ngă kơ mnuih ƀuôn sang rŭng răng leh anăn amâo êđăp ênang ôh hlăm hruê sabat kyua huĭ ngă soh hŏng klei bhiăn.
Sang Aê Diê hruê anei ăt hlue ngă klei bhiăn Aê Diê mtô, “Brei ih hdơr kơ hruê sabat čiăng pioh gơ̆ jing doh jăk”, ƀiădah mơ̆ng leh Khua Yang Yêsu kbiă lŏ hdĭp, Sang Aê Diê amâo lŏ kkuh mpŭ hlăm hruê tal kjuh ôh ƀiădah mă hruê tal êlâo hlăm hruê kăm jing hruê Khua Yang kbiă lŏ hdĭp čiăng hrăm mbĭt mdei leh anăn kkuh mpŭ. Pô čih hră Hêbrơ mñă kơ phung ƀuôn sang Aê Diê brei djă pioh klei kkuh mpŭ kơ Aê Diê hlăm hră Hêbrơ 10:25: “Đăm lui ôh klei bi kƀĭn msĕ si đa đa mưng ngă, ƀiădah bi mđĭ ai hdơ̆ng drei, leh anăn ngă klei anăn lu hĭn êjai diih ƀuh Hruê Krist giăm truh.” Khădah snăn, lu mnuih ênưih lăm lui klei pô kkuh mpŭ kơ Aê Diê kyua hdră čưng boh, kdŏ mmuñ, amâodah mta phŭn mkăn. Brei drei hdơr bruă kkuh mpŭ kơ Aê Diê jing Klei Bhiăn, boh blŭ “sabat” hlăm klei blŭ Hêbrơ jing “mjưh mă bruă, čiăng mdei”. Hruê sabat jing hruê drei mdei mă bruă duh dơ̆ng čiăng kƀĭn hlăm Aê Diê mơ̆ng bruă ngă kkuh mpŭ kơ Ñu. Hlăk đưm phung Pharisi lač kơ Khua Yang Yêsu amâo djă pioh hruê sabat hŏng klei kñăm mdlưh kơhưm Khua Yang mtô bi hriăm; hruê anei, tơdah phung đăo ênưih lui klei kkuh mpŭ snăn drei ăt dôk mdlưh Klei Bhiăn Aê Diê.
Drei dôk khăp kơ hruê mmông dưi kkuh mpŭ kơ Aê Diê, bi mguôp hŏng Ñu leh anăn hŏng ayŏng amai adei sa klei đăo mơ̆?
Wah lač: Ơ Khua Yang, akâo kơ Ih đru kâo djă pioh nanao klei kkuh mpŭ kơ Ih hlăm grăp hruê kjuh leh anăn kƀĭn ai tiê hlăm bruă kkuh mpŭ kơ Ih. Akâo kơ Ih brei kâo mđing khăp kơ ayŏng amai adei pô lu hĭn sĭt kâo kkuh mpŭ kơ Aê Diê.
Dlăng Klei Aê Diê Blŭ hlăm tlâo thŭn: Y‑Yêrêmi 34:8–35:19
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
