Mathais 12:1-5
Nqe cim:
“Nco ntsoov hnub Xanpataus ua hnub tseemceeb” (Khiavdim 20:8).
Lus nug rau sawvdaws xav:
- Tswv Yexus thiab cov thwjtim ua dabtsi rau hnub Xanpataus?
- Vim li cas cov Falixais yws Yexus?
- Tswv Yexus txhais hnub Xanpataus lub ntsiab li cas?
- Peb qhia tawm lub siab saib taus thiab siv tshwjxeeb hnub Athiv los pehawm Vajtswv zoo li cas?
Thaum Tswv Yexus thiab cov thwjtim tabtom taug kev mus hauv ib daim teb npleg, cov thwjtim tshaib plab yog li lawv de hnab nplej los tev noj. Lawv ua li no raug cov Falixais yws, vim raws li cov neeg Yudais txoj cai hauv phau ntawv Mishnah, hnub Xanpataus txwv tsis pub mus hlais nplej, yog li lawv hais tias Tswv Yexus thiab cov thwjtim ua yam uas “txhaum kev cai” hnub Xanpataus lawm. Lub homphiaj uas cov Falixais hais no yog txo Tswv Yexus lub koob npe, rau qhov Nws yog ib tug Xibhwb tiamsis tsis coj raws li txoj cai. Yog li ntawd, Nws tej lus qhia ntseeg tsis tau. Tswv Yexus thiaj muab zaj lus hauv I-Xamuyees 21:1-6 los qhia, thaum tus povthawj Ahimelej rhuav txoj cai cia Daviv thiab nws cov neeg nrog Ahimelej noj cov ncuav hauv chav dawbhuv vim lawv tabtom tshaib plab. Yog li tagnrho cov povthawj puavleej ua txhaum txoj cai ua haujlwm rau hnub Xanpataus los tsis raug suav hais tias yog ua txhaum.
Tswv Yexus xav hais txog lub hauvpaus hnub Xanpataus yog cia txhua tus tibneeg so thiab pehawm Vajtswv, txoj kevcai yog cia tibneeg qhia tshwm txojkev hlub Vajtswv thiab sawvdaws. Cov neeg Falixais, saib txoj cai hnub Xanpataus tseemceeb dua qhov uas so hnub Xanpataus, lawv ua rau cov pejxeem txhawj thiab tsis muaj kev kaj siab hnub ntawd vim ntshai tsam ua txhaum txoj cai.
Pawg Ntseeg lub sijhawm ntawd kuj tseem ua raws li tus Tswv tej lus qhia, “Nco ntsoov hnub Xanpataus ua hnub tseemceeb”, tiamsis tom qab uas Tswv Yexus sawv hauv qhov tuag rov qab los, ces Pawg Ntseeg tsis pehawm hnub xya lawm, muab hnub ib hauv lub limtiam uas yog ncaj rau hnub Tswv Yexus sawv ua hnub so thiab pehawm Vajtswv. Tus uas sau phau Henplais tau ntuas Vajtswv cov menyuam yuav tsum pehawm Vajtswv hauv Henplais 10:25: “Sawvdaws yuav tsum tuaj ua ke mloog lus qhuab qhia tsis txhob tso tseg, ib yam li muaj qee leej tau tso tseg lawm. Nej puavleej paub hais tias twb yuav txog hnub uas Yexus rov qab los. Yog li ntawd peb ib tug hajyam yuav tsum txhawb ib tug lub zog heev dua qhov qub.” Txawm qhia li ntawd los, tseem muaj ntau leej tso kev pehawm Vajtswv tseg mus ncaws npas, saib hu nkauj lomzem, lossis vim ib qho vimchiv twg. Cia li nco ntsoov tes haujlwm pehawm Vajtswv yog Kevcai, lo lus “Xanpataus” raws li lus Henplais txhais tau hais tias yog “nres, so”. Hnub Xanpataus yog hnub uas peb nres txhua yam haujlwm mus nrhiav noj, npaj siab los pehawm Vajtswv. Thaum ub cov neeg Falixais cem Tswv Yexus tsis so hnub Xanpataus, lub homphiaj yog txo Tswv Yexus tej lus qhia; nimno yog cov ntseeg Yexus tso kev pehawm Vajtswv tseg ces kuj yog peb tabtom txo tus Tswv tej kevcai.
Thov Vajtswv,
Tus Tswv, thov Koj pab kom nyuam yaus niaj hnub kub siab lug pehawm Koj tsis tso tseg. Thov Koj pab kom nyuam yaus paub hmov tshua lwm tus thaum pehawm Koj. Amees.
Peb puas nyiam kev pehawm Vajtswv, nrog tus Tswv thiab cov kwvtij ntseeg sib raug zoo?
Nyeem Vajluskub hauv peb lub xyoos: Yelemis 34:8-35:19
Kênh Youtube BHKTHN:
https://www.youtube.com/c/bhkthn
