Klei Aê Diê Blŭ: Y-Mathiơ 6: 9-10
“9Snăn wah lač bĕ msĕ snei:
‘Ơ Ama hmei, dôk hlăm adiê ơi,
akâo kơ anăn Ih mâo klei mpŭ doh jăk.
10Akâo kơ ƀuôn ala mtao Ih truh;
akâo kơ klei Ih čiăng srăng jing
ti lăn ala msĕ si hlăm adiê.”
Klei êmuh ksiêm mĭn: Ya mta klei leh anăn ya mta bruă Khua Yang Yêsu mtô phung ƀĭng kna Ñu brei mđing tal êlâo tơdah wah lač? Si jar wah lač drei ƀuh mơ̆ng klei hriăm anei? Tơdah klei wah lač knŏng jing klei akâo đuč snăn si klei drei msĕ hŏng phung amâo đaŏ? Si ngă čiăng dưi mâo klei bi mguôp sĭt suôr hŏng Aê Diê Ama tơdah drei wah lač?
Khua Yang Yêsu bi hriăm phung ƀĭng kna brei mđing ai tiê kơ Khua Yang Aê Diê Ama sĭt wah lač, anăn jing: Anăn Ama, Ƀuôn Ala Mtao leh anăn Klei Ama Čiăng. Boh blŭ “Ama” tinei lač kơ Aê Diê jing Pô Hrih Mjing, Pô Kiă Kriê jih jang lăn adiê, leh anăn jing Aê Diê Ama kơ Aê Diê Anak, jing Khua Yang Yêsu. Phung tui hluê Khua Yang Yêsu kyua hŏng klei đaŏ kơ Ñu ăt dưi yap jing anak Aê Diê leh anăn dưi dlăng Ñu jing Ama mơh. Klei anei brei ƀuh klei wah lač êlâo hĭn jing mŭt hlăm klei bi mguôp hŏng Aê Diê Ama hlăm klei jing “Ama- anak”. Hlăm bruă klam jing sa čô anak, phung đaŏ kơ Khua Yang brei mpŭ kơ Anăn Ama hŏng klei yuôm hĭn, bi êdah hŏng knhuah hdĭp doh jăk leh anăn ai tiê kkuh mpŭ kơ Ñu hŏng jih ai tiê. Amâo djŏ knŏng mjưh mơ̆ng năn ôh, phung bĭng kna ăt brei thâo mĭn kơ klei bi lar Ƀuôn Ala Mtao Ama ti lăn mơ̆ng bruă hưn Klei Mrâo Mrang Jăk kơ phung ka thâo Khua Yang čiăng kơ Ƀuôn ală mtao Ama dưi truh. Knhal tuč, phung đaŏ kơ Khua Yang brei wah lač hlăm ai tiê tui si Ama čiăng srăng jing ti lăn ala msĕ si lăn adiê, jing phung wah lač brei gưt ngă tui si Ama čiăng wăt tơdah tăp năng klei Ama čiăng bi mklăk hŏng klei pô akâo.
Klei Khua Yang Yêsu bi hriăm wah lač đru kơ phung ƀĭng kna leh anăn drei thâo kơ jar klei wah lač tal êlâo brei uêñ mĭn kơ Aê Diê Ama, amâo djŏ knŏng akâo kơ mnơ̆ng dhơ̆ng hlăm klei hdĭp pô đuč ôh. Tơdah drei wah lač snăn, drei srăng lĕ hlăm klei amâo thâo ôh ya klei drei wah lač hŏng Khua Yang hlăk êjai klei hdĭp jăk mơak, êđăp ênang Leh anăn tơdah snăn, drei amâo mdê ôh hŏng phung amâo đaŏ, diñu nao kơ phung ruo yang knŏng čiăng akâo klei diñu čiăng. Brei drei thâo săng klei wah lač jing sa mta klei pap prŏng kơ phung đaŏ kơ Krist, kyua pô dưi iêu Pô kiă kriê jih jang adiê lăn ala jing Ama, leh anăn mâo Ñu yap jing anak Ñu wăt tơdah drei amâo năng ôh. Kyua anăn, brei wah lač hlăm ai tiê dưi dưm klei bi mguôp sĭt suôr hŏng Aê Diê Ama, hơêč hmưi leh anăn bi mni kơ Khua Yang kyua klei yuôm bhăn anăn.
Djŏ mơ̆ drei kreh akâo kơ klei pô čiăng ƀiă dah wơr hĕ Anăn Ama, Ƀuôn Ala Mtao Ama leh anăn Klei Ama čiăng?
Ơ Khua Yang, akâo kơ Ih đru kâo êpa hmao dưi hdĭp hlăm klei bi mguôp hŏng Khua Yang grăp hruê. Akâo kơ Ih brei kơ kâo klei hdĭp mpŭ mni kơ Anăn Ih, uêñ mĭn kơ Ƀuôn Ala Mtao Ih ti lăn ala, leh anăn hdĭp hlăm klei gưt ngă tui hluê si klei Ih čiăng.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
