Klei Aê Diê Blŭ: Y-Mathiơ 6:11-15
Êlan kliăng:
“11Brei kơ hmei mnơ̆ng ƀơ̆ng huă bi djăp kơ grăp hruê; 12Pap brei kơ klei soh hmei, msĕ si hmei pap brei mơh kơ mnuih bi msoh kơ hmei leh.” (Y-Mathiơ 6:11-12).
Klei êmuh ksiêm mĭn: Ya klei Khua Yang Yêsu wah lač kơ klei čiăng hlăm kđeh leh anăn hlăm mngăt? Ya klei yuôm bhăn mơ̆ng klei wah lač anăn? Mơ̆ng mta phŭn klei wah lač Khua Yang mtô, ya klei diih ƀuh brei pô bi mlih hlăm klei wah lač?
Hlăm klei Khua Yang Yêsu bi hriăm, hdră klei wah lač tal êlâo brei mđing kơ Anăn Ama, Ƀuôn Ala Mtao, klei Ama čiăng, leh anăn kơh truh dŭm klei čiăng hlăm klei hdĭp, mâo klei čiăng hlăm kđeh leh anăn hlăm mngăt. Klei čiăng hlăm kđeh Khua Yang bi hriăm wah lač ti nei jing akâo “mnơ̆ng ƀơ̆ng huă” jing akâo mnơ̆ng ƀơ̆ng huă čiăng hdĭp mda. Khua Yang bi hriăm “Brei kơ hmei” jing lač kơ klei čiăng hlăm kđeh mơ̆ng pô mkăn. Khua Yang bi hriăm akâo “mnơ̆ng ƀơ̆ng huă bi djăp kơ grăp hruê” amâo djŏ grăp mlan amâo dah grăp thŭn ôh kyua Khua Yang čiăng drei đaŏ knang kơ klei mkăp brei mơ̆ng Khua Yang čiăng hdĭp amâo rŭng răng, kriê pioh ƀiădah thâo hdĭp mơak leh anăn đru brei.
Klei wah lač kơ klei čiăng hlăm mngăt jing akâo kơ Khua Yang pahp brei klei soh hlăm klei hdĭp grăp hruê, khă gơ̆ jing leh anak Aê Diê ƀiădah drei ăt mâo lu klei êdu awăt. Leh anăn tơdah thâo leh klei pap brei mơ̆ng Khua Yang, snăn ăt pap brei kơ phung ngă soh leh hŏng drei. Snăn kơh drei thâo klei pap brei kluôm ênŭm mơ̆ng Khua Yang.
Klei wah lač dưi mjưh hŏng klei akâo đăm brei lĕ hlăm klei mplư ôh, leh anăn akâo kơ Khua Yang mtlaih mơ̆ng klei jhat, brei ƀuh klei hdĭp grăp hruê mơ̆ng phung tui hluê Khua Yang tlă anăp hŏng klei mplư leh anăn dŭm klei ruah klei jăk leh anăn klei jhat. Dưi jing anak Khua Yang amâo djŏ jing amâo mâo ôh klei mplư, kyua wăt Khua Yang Yêsu ăt găn klei mplư. Leh anăn Khua Yang dưi leh hŏng klei mplư kyua knang hlăm Klei Aê Diê Blŭ leh anăn klei wah lač thâo klei Aê Diê Ama čiăng hlăm klei hdĭp Ñu.
Klei wah lač Khua Yang bi hriăm jing klei bi hmô kơ klei wah lač grăp hruê mơ̆ng phung đaŏ. Sĭt lŏ dlăng wĭt klei pô wah lač, drei ƀuh klei drei khăng dưm êlâo jing dŭm klei pô čiăng hĭn kơ bruă mđing kơ Anăn Ama, Klei Ama čiăng leh anăn Ƀuôn Ala Mtao. Drei ăt pioh lu đei mmông leh anăn ai ktang kơ bruă tui tiŏ dŭm klei čiăng êjai hlăm klei hdĭp anei, amâo đei mđing ôh kơ bruă bi mđĭ klei hdĭp hlăm mngăt pô čiăng dưi tlaih mơ̆ng klei mplư leh anăn klei jhat. Drei jih ai tiê akâo kơ Khua Yang pap brei kơ pô ƀiădah mâo ai tiê khăng ti anăp klei soh mơ̆ng pô mkăn ngă kơ pô. Sa bliư̆ dơ̆ng, klei wah lač Khua Yang mtô lŏ bi hdơr kơ phung drei dưm Khua Yang kdlưn hĭn kơ jih jang mta, mđing kriê dlăng klei hdĭp hlăm mngăt, leh anăn lui klei tui tiŏ hlăm kđeh anei čiăng drei thâo klei hdĭp jăk mơak leh anăn hdĭp djŏ hdră kñăm mơ̆ng Khua Yang hrih mjing leh pô.
Ya klei drei khăng wah lač hŏng Khua Yang?
Ơ Khua Yang, Ih jing Pô thâo kơ klei êdu awăt hŏng klei čiăng hlăm klei hdĭp kâo. Akâo kơ Ih kriê kjăp kâo hlăm klei đaŏ knang kơ Ih grăp hruê leh anăn myơr kơ Ih klei wah lač tui si klei Ama čiăng kơ Aê Diê Tlâo Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
