Klei Aê Diê Blŭ: I Kôrantô 15:24-26.
Êlan kliăng: “Êdei kơ anăn srăng truh klei knhal tuč, hlăk anăn Ñu srăng jao ƀuôn ala mtao kơ Aê Diê Ama, leh Ñu bi rai jih klei kiă kriê, jih klei dưi prŏng, leh anăn jih klei myang. Kyuadah Ñu srăng kiă kriê tơl Aê Diê dưm jih jang phung roh Ñu ti gŭ jơ̆ng Ñu.” (I Kôrantô 15:24‑25).
Klei êmuh ksiêm mĭn: Leh kbiă lŏ hdĭp, ya bruă Khua Yang Yêsu ngă? Hbĭl Krist lŏ jao Ala mtao kơ Aê Diê Ama? Ala Mtao ti gŭ klei Aê Diê kiă kriê si srăng jing? Si drei hdĭp hlăk êjai dôk guôn hruê Khua Yang lŏ hriê?
Hdră Aê Diê bi mtlaih amâo mdei hlăm bruă Khua Yang Yêsu tŭ klei arăng pơ̆ng ti kyâo bi kal leh anăn kbiă lŏ hdĭp hŏng klei guh kơang ôh. Ƀiădah bruă mơ̆ng Krist ăt lŏ dưi hluê ngă, anăn jing bi rai jih klei kiă kriê, jih klei dưi prŏng, leh anăn jih klei myang leh anăn pô roh knhal tuč Ñu srăng bi rai jing klei djiê. Arăng srăng dlăm klei djiê hlăm ênao pui leh anăn Aê Diê pô mâo klei dưi (Klei Bi Êdah 20:14). Anăn jing mông phung djiê hlăm Krist dưi kbiă lŏ hdĭp leh anăn hdĭp lă lar, amâo lŏ hmăi ôh mơ̆ng klei djiê.
Krist dưi leh hŏng klei soh ti kyâo bi kal, ƀiădah anăn ka djŏ ôh jing klei tŭ dưi knhal tuč. Phung jing dŏ Krist leh anăn jih jang anak mnuih ăt dôk hdĭp ti lăn ala “hŏng phung khua kiă kriê, hŏng phung mâo klei dưi, hŏng phung khua mtao lăn ala ênuk mmăt anei, hŏng phung yang jhat ƀai dôk hlăm jih adiê” (Êphêsô 6:12) dôk ktuê dlăng leh anăn ngă dleh dlan. Anak mnuih ăt ka dưi mâo ôh klei tăp mđơr, klei êngiê, jăk mơak sĭt nĭk. Mâo lu anôk adôk mâo klei ur krao mơ̆ng klei amâo mtăp mdơr mơ̆ng phung mâo klei dưi, phung khua kiă kriê tŭ klei yang jhat mčhur bi mjhua hŏng dưi čiăng duah klei tŭ kơ hjăn pô, ngă klei djŏ jing soh amâodah phung jhat kpĭ bi huĭ, ngă rŭng răng dleh dlan kơ lu mnuih, hlăm anăn mâo wăt phung ƀuôn sang Aê Diê. Jih jang klei anăn ngă luč klei êđăp ênang, ngă kơ anak mnuih hdĭp bŏ hŏng klei huĭ hyưt, rŭng răng, dleh dlan.
Ƀiădah djŏ mông Aê Diê, Khua Yang Yêsu Krist srăng lŏ hriê, hlăk anăn djăp klei jhat srăng dlưh rai, phung jing dŏ Aê Diê srăng thâo kral klei jăk mơak mơ̆ng klei bi mtlaih Khua Yang Yêsu ngă leh. Anei ăt jing klei čang hmăng phung dôk hlăm Krist, čang hmăng hruê jăk mơak leh “djăp klei kiă kriê, klei dưi prŏng, djăp klei myang” leh anăn “klei djiê” bi rai jih. Klei jih jang phung roh dôk ti gŭ jơ̆ng Khua Yang Yêsu Krist jing klei tŭ dưi bŏ hŏng yuôm bhăn (êlan 25, Klei Mmuñ Hđăp 8:6). Grăp čô drei brei hdĭp hlăm klei čang hmăng hruê Krist mâo klei tŭ dưi kluôm dhuôm jao Ala mtao mtăp mđơr kluôm ênŭm hlăm kngan Aê Diê Ama. Hlăk êjai dôk guôn, brei drei krơ̆ng kjăp klei đaŏ, dôk nanao hlăm Krist, hdĭp tŭ dưn kơ Aê Diê leh anăn hưn Anăn Aê Diê čiăng lu mnuih dưi tlaih êlâo kơ hruê Khua Yang lŏ hriê.
Ya klei drei čang hmăng hlăk êjai dôk hdĭp ti lăn ala anei?
Wah lač: Ơ Khua Yang Aê Diê Tlâo Čô Yang! Ai tiê kâo hur har dôk čang guôn hruê Khua Yang Yêsu Krist dưm jih jang phung roh ti gŭ jơ̆ng Ih, ăt jing hruê kâo dưi mŭt hlăm Ala mtao guh kơang, mtăp mđơr, mơak dưi dưn klei jăk mơak lă lar Aê Diê brei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 14:18-15:12
Kênh Youtube BHKTHN:
