Klei Aê Diê Blŭ: Y‑Êsai 58:6-12
Êlan kliăng: “Tơdah ih brei mnơ̆ng ƀơ̆ng huă ih pô kơ pô êpa, tơdah ih bi trei mnuih knap mñai, hlăk anăn klei mngač ih srăng ƀlĕ hlăm klei mmăt, leh anăn klei mmăt ih srăng jing msĕ si yang hruê dơ̆ng.” (Y‑Êsai 58:10).
Klei êmuh ksiêm mĭn: Si klei Aê Diê lač kơ klei kăm ƀơ̆ng huă bi mơak kơ Ñu? Ya klei ƀuăn pioh brei kơ phung hur har mă bruă kơ arăng? Si klei mngač mă bruă srăng mtrang? Si drei hdĭp čiăng dưi mtrang mngač mơ̆ng klei mă bruă kơ Khua Yang hŏng bruă ngă klă sĭt grăp hruê?
Kčưm mŭt trăn Klei Aê Diê Blŭ anei, Aê Diê ƀuah kơ phung ƀuôn sang Israel kơ klei diñu kăm ƀơ̆ng huă mgưt mă. Diñu knŏng kăm bơ̆ng huă tui si klei bhiăn klei đăo amâodah ngă msĕ si bi mlih klei jăk jĭn hŏng Aê Diê, ƀiădah sĭt diñu amâo mâo luă gŭ čiăng tui duah klei Aê Diê čiăng ôh leh anăn kăn hdĭp bi êdah Anăn Ñu rei (êlan 1-5). Khua Yang mtô brei diñu thâo klei kăm ƀơ̆ng huă Khua Yang ruah jing klei uêñ mĭn đru dŏng leh anăn răng kriê kơ phung arăng dôk ktư̆ juă, phung ƀun ƀin dôk găn klei dleh dlan, amâo wir ƀô̆ ngă ngơi ôh kơ phung ayŏng adei găp djuê dôk čiăng klei đru dŏng (êlan 6-7). Klei kăm ƀơ̆ng huă sĭt, Khua Yang mtô mâo sa klei mblang yuôm mdê hĭn jing brei nao mbĭt hŏng bruă ngă. Drei kăm ƀơ̆ng huă čiăng pioh kluôm hruê mmông bi mguôp hŏng Khua Yang, bi kƀĭn klei mĭn tui duah klei Khua Yang čiăng leh anăn êdei anăn, brei drei kbiă nao mă bruă kơ arăng. Klei đăo brei atăt truh kơ bruă ngă, kyua “tơdah mâo knŏng klei đăo amâo mâo ôh bruă bi êdah, klei đăo anăn djiê leh” (Y‑Yakơ 2:17).
Aê Diê hưn mdah lu snăk klei ƀuăn pioh kơ phung thâo uêñ mĭn, mă bruă kơ pô mkăn. Pô anăn srăng mtrang mngač msĕ si ang dar, mâo klei bi hlao anôk ruă êka, mâo klei guh kơang Khua Yang kiă kriê, mâo klei Khua Yang wĭt lač leh anăn bi mtlaih tơdah kwưh akâo (êlan 8-9). Khua Yang ăt lač klă thiăm tơdah drei thâo pŏk ai tiê đru pô ư̆ êpa, ngă bruă pap kơ phung knap mñai, snăn rup bi hmô klei mă bruă drei srăng msĕ si klei mngač ang dar mtrang hlăm anôk mmăt. Khua Yang srăng atăt ba drei nanao hlŏng lar, brei mngăt drei trei mđao ti krah anôk lăn yang hruê hơr; brei klang drei jing ktang, drei srăng jing msĕ si sa boh war djam arăng krih êa, msĕ si sa akŏ êa amâo thâo khuôt ôh (êlan 11).
Ƀiădah lĕ, anei amâo djŏ ôh jing klei ƀuăn amâo mâo klei čoh čuăn, klei ƀuăn yuôm bhăn pioh kơ phung đăo sĭt êmĭt, thâo mă bruă kơ mnuih mkăn hŏng ai tiê jăk, kpă, mtăp mđơr leh anăn kmah. Hruê anei lu Phung Sang Aê Diê mkŏ mjing klei kăm ƀơ̆ng huă êpul lu mnuih, đa mdê bi asei tui si hdră pô dê. Brei drei djă pioh klei bi mjuăt pô kăm ƀơ̆ng huă ƀiădah klei yuôm hĭn jing ngă mđrĭng mbĭt hŏng klei bi mjuăt pô mă bruă kơ pô mkăn. Klei kăm ƀơ̆ng huă amâo djŏ ôh knŏng bi ư̆ êpa, kăm ngă đa mta klei, ƀiădah brei kdlưn hĭn kơnăn čiăng dưi nao truh kơ ayŏng adei dôk tuôm hŏng klei dleh dlan, hŏng pô dôk čiăng klei đru mtlaih brei. Brei drei mtrang klei mngač Klei Mrâo Mrang Jăk hŏng klei mă bruă kơ Phung Sang Aê Diê leh anăn kơ ƀuôn sang čiăng kơ hŏng klei mngač mă bruă mơ̆ng drei, lu mnuih dưi ƀuh klei Khua Yang khăp leh anăn hriê kơ Ñu.
Si ngă drei kăp mtrang mngač Klei Mrâo Mrang Jăk hŏng klei drei mă bruă mơ̆?
Wah lač: Ơ Khua Yang, brei kâo mđing hmư̆ asăp Ih grăp hruê, thâo kral klei Khua Yang čiăng hlăm klei hdĭp kâo, čiăng kơ kâo hur har mă bruă kơ pô mkăn leh anăn mtrang mngač klei khăp Ih kơ lu mnuih.
Dlăng Klei Aê Diê Blŭ hlăm tlâo thŭn: Y‑Yôp 40
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
