Yaxayas 58:6-12
Nqe cim:
“Yog nej pub zaub mov rau cov neeg tshaib plab noj thiab pab cov neeg txomnyem. Ces tej kev tsaus ntuj uas nyob ibncig nej yuav hloov ua lub teeb ci rau nej pom kev ib yam li thaum tavsu.” (Yaxayas 58:10).
Lus nug rau sawvdaws xav:
- Vajtswv qhia licas txog txoj kevcai yoo mov uas haum Nws siab?
- Muaj lo lus cogtseg twg pub rau cov uas txaus siab ua haujlwm pub rau lwm tus?
- Kev kaj ntawm tes haujlwm yuav ci zoo licas?
- Peb yuav ua neej licas kom dhau peb kev ua tus Tswv haujlwm ci tau qhov kaj rau lwm tus txhua hnub?
Nyob hauv tej lus qhib thawj ntawm ntu Vajluskub no, Vajtswv cem cov Yudais txog qhov uas lawv ua txuj yoo mov. Lawv tsuas ua kevcai yoo mov raws kev raws cai lossis ua kom tau tus Tswv foom hmoov xwb, qhov tseeb lawv tsis txo hwjchim los nrhiav kev ua raws tus Tswv lub siab nyiam thiab tsis ua lubneej rau tus Tswv tau koobmeej (nqe 1-5). Tus Tswv qhia rau lawv paub hais tias txoj kevcai yoo mov uas txaus Nws siab yog pab cov neeg tabtom raug tsimtxom, pab cov pluag tabtom txomnyem, thiab tsis hnov qab cov kwvtij tabtom cheemtsum kev pab (nqe 6-7). Kevcai yoo mov tseeb uas tus Tswv qhia muaj ib lub ntsiab tshwjxeeb yog yoo mov nrog kev ua haujlwm. Peb ua kevcai yoo mov kom tseg tau sijhawm los nrog tus Tswv sib txuas lus, nrhiav paub tus Tswv lub siab nyiam thiab tomqab ntawd, peb yuav tsum tawm mus ua haujlwm pab lwm tus. Kev ntseeg yuav tsum ua haujlwm tshwm, vim hais tias “tsis ua ib yam haujlwm tshwm, ces nej txojkev ntseeg twb tuag lawm.” (Yakaunpaus 2:17).
Vajtswv muaj ntau lo lus cogtseg pub rau cov neeg uas paub txhawjxeeb, ua haujlwm pab lwm tus. Tus ntawd yuav ci ib yam li lub hnub ci thaum sawv ntxov, nws tej qhov txhab yuav zoo sai, yuav tau tus Tswv lub hwjchim tsomkwm puagncig, tau tus Tswv teb lus thov thiab tau tus Tswv pab cawm (nqe 8-9). Tus Tswv kuj hais meej ntxiv hais tias thaum peb paub qhib siab los mus pab cov neeg tsis muaj noj muaj haus, pab cov neeg txomnyem ces peb yuav zoo li lub teebci kaj nrig hauv qhov tsaus ntuj. Tus Tswv yuav coj peb kev mus ibtxhis, yuav pub tej uas peb cheemtsum hauv lub tebchaws uas qhuav nkig nkuav rau peb; yuav ua rau peb tej pob txha muaj zog, peb yuav zoo yam nkaus li lub vaj uas muaj dej ntov, thiab zoo yam li lub qhov dej txhawv uas muaj dej tsis tu (nqe 11 – Phau Txhais HMONGSV).
Tiamsis, tej no tsis yog lus cogtseg pub dawb rau txhua tus, tej lus cogtseg no tsuas yog pub rau cov ntseeg tseeb uas paub ua haujlwm pab lwm tus los ntawm nplooj siab hlub tshua, ua zoo, ncajncees thiab ua siab zoo. Niaj hnub nimno muaj ntau Pawg Ntseeg npaj muaj rooj kevcai yoo mov, muaj ntau tug nyias ua nyias kevcai yoo mov raws li sijhawm npaj tseg. Peb ua kevcai yoo mov tiamsis yuav tsum ua nrog kev ua haujlwm pab lwm tus. Ua kevcai yoo mov tsis yog tsuas yoo tshaib, caiv qee yam, tiamsis yuav tsum ua haujlwm pab cov kwvtij ntsib kev txomnyem, pab cov neeg cheemtsum pab. Peb yuav tsum ua kom qhov kaj ntawm Txojmoo Zoo ci mus rau txhua qhov dhau los ntawm peb kev ua haujlwm pab Pawg Ntseeg thiab tej kwvtij zej zos, kom xwv dhau ntawm peb tej haujlwm, coob leej ntau tug pom txog tus Tswv kev hlub thiab tig rov qab los cuag Nws.
Peb peb puas txaus siab hlo ua rau qhov kaj ntawm Txojmoo Zoo ci mus rau lwm tus los ntawm peb kev ua haujlwm?
Thov Vajtswv
Tus Tswv, thov Koj pab nyuam yaus mloog Koj tej lus txhua hnub, zeem paub Koj lub siab nyiam nyob hauv nyuam yaus lubneej kom xwv nyuam yaus txaus siab hlo ua haujlwm pab lwm tus thiab ua rau qhov kaj ntawm Koj txojkev hlub ci mus rau coob leej tau pom. Amees.
Nyeem Vajluskub peb lub xyoos: Yauj 40
Tshooj Youtube BHKTHN: https://www.youtube.com/c/bhkthn
