Klei Aê Diê Blŭ: II Klei Yăl Dliê 12:1-4
Êlan kliăng: “Klei mgao nao êlâo kơ klei rai luč, leh anăn klei krưh nao êlâo kơ klei lĕ” (Klei Bi Hriêng 16:18)
Klei êmuh ksiêm mĭn: Ya bruă Mtao Rôƀôam leh anăn phung ƀuôn sang ngă leh ƀuh ƀuôn ala mtao diñu dưi mâo klei hơĭt kjăp leh anăn mdrŏng sah? Ya klei Aê Diê brei truh? Ya drei ngă čiăng ñĕ kơ klei ngă mgao?
Amâo sui ôh leh ala čar Mtao Rôƀôam dưi “kjăp leh anăn ktang” leh anăn klei dưi mtao dưi ktang leh mtao leh anăn “jih jang phung Israel”, lač kơ phung djuê ana Ƀenjamin leh anăn Yuđa mơ̆ng ala mtao kwar Dhŭng, lui leh klei bhiăn Aê Diê. Diñu amâo hdơr ôh ya klei dưi mâo jing kyua Aê Diê brei kyua anăn ngă mgao, đăo knang kơ pô leh anăn amâo sĭt suôr ôh hŏng Aê Diê. Diñu rŭ mdơ̆ng leh “anôk dlông, kmeh, leh anăn phung rup yang Asêra”, hlăm krĭng mâo phung êkei ngă knhông hlăm dŭm sang yang (I Bruă Mtao 14:23-24). Diñu wơr leh klei Y‑Môis hưn brei răng, “Đăm diih lač hlăm ai tiê diih, ‘Klei myang drei leh anăn klei ktang kngan drei bi mâo leh klei mdrŏng anei” (Klei Mtô Mñă Klei Bhiăn 8:17). Kyua anăn, Aê Diê ngă kơ Mtao Êjip Y‑Sisak bi blah, mmiă dŭm ƀuôn kjăp leh anăn ktang hlăm Yuđa, leh anăn nao “truh ti Yêrusalem”. Hruê anei, hlăm mtih sang yang Amôn ti Karnak, ala čar Êjip mâo tur anăn dŭm boh ƀuôn hlăm Israel mtao anei dưi plah mmiă.
Aê Diê ngă djŏ tui si klei Ñu bi hriăm Mtao Salômôn hlăm I Klei Yăl Dliê 28:9, anăn jing tui duah Aê Diê snăn srăng dưi bi tuôm hŏng Ñu leh anăn mâo Ñu kiă kriê, mklăk wĭt tơdah lui Aê Diê snăn Ñu srăng lui leh anăn tuôm hŏng klei truh. Sa čô mnuih lui klei bhiăn Aê Diê, amâo hluê ngă klei bhiăn Aê Diê, klei anăn jing pô anăn lui leh Aê Diê (II Klei Yăl Dliê 7:19, 22). Kyua anăn Mtao Rôƀôam leh anăn phung ƀuôn sang tŭ klei Aê Diê bi kmhal.
Klei Bi Hriêng 16:18, “Klei mgao nao êlâo kơ klei rai luč, leh anăn klei krưh nao êlâo kơ klei lĕ.” Klei anei amâo djŏ ôh knŏng hŏng anak mnuih. Mơ̆ng sa čô dĭng buăl jăk doh mngač, bŏ hŏng klei thâo mĭn, knŏng kyua klei ngă mgao leh anăn ktưn hưn kơ pô kyua “klei jăk siam pô” anăn Satan êbuh lĕ, leh anăn kyua “klei guh kơang” mơ̆ng Satan ngă leh kơ ñu amâo lŏ thâo mĭn ôh čiăng hdơr klei ñu mâo jing Aê Diê brei. Satan čiăng dưi mâo klei mpŭ leh anăn klei guh kơang jing dŏ Aê Diê, boh jhat jing Aê Diê dlăm satan hlăm lăn (Y‑Êsêkiêl 28:17). Amâo mâo ôh hlei pô hlăm phung drei čiăng ngă leh anăn tŭ boh jhat msĕ Satan leh anăn Mtao Rôƀôam hlăm klei yăl dliê anei. Sĭt drei ƀuh pô dôk hlăm klei kdlưn hĭn hlăm klei tŭ jing hlăm ya mta bruă, hlăm anăn mâo klei mă bruă kơ Aê Diê amâodah hlăm bruă knuă, boh nik sĭt ƀuh pô dôk mâo sa anôk bruă kjăp, boh nik hing ang amâodah mdrŏng sah snăn brei thâo răng păn kjăp kơ Aê Diê lu hĭn. Kyuadah hlăk êjai anăn drei ênưih lĕ hlăm klei mgao đuê̆ kbưi hŏng Aê Diê leh anăn klei bhiăn Ñu.
Drei dôk bi mĭn kơ pô hlăk dôk mgao kơ ya mta klei?
Wah lač: Ơ Khua Yang, akâo kơ Ih đru kâo êbat êdu êun, thâo kral djăp klei kâo mâo jing kyua Aê Diê brei. Tơdah hlăm kâo mâo ya klei mgao, akâo kơ Ih pap brei leh anăn đru kâo lăm lui čiăng kâo êbat hlăm êlan Ih.
Dlăng Klei Aê Diê Blŭ hlăm tlâo thŭn: Klei Mmuñ Hđăp 42:5-11; 43:1-5; 44:1-16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
