Klei Aê Diê Blŭ: II Y‑Samuel 6:1-11
Êlan kliăng: “Aê Diê jing Mngăt Myang, leh anăn hlei pô čiăng kkuh mpŭ kơ Ñu, brei kkuh mpŭ hŏng mngăt leh anăn hŏng klei sĭt nik.” (Y‑Yôhan 4:24)
Klei êmuh ksiêm mĭn: Ya ngă mtao Y‑Đawit čiăng ruah leh anăn bi kƀĭn lu mnuih? Ya klei truh hlăk leh diñu kdŏ mmuñ ti anăp Yêhôwa? Ya phŭn knhal anăn jing? Si knhuah brei drei mâo êjai kkuh mpŭ kơ Aê Diê?
Hip Klei Bi Mguôp bi hmô kơ klei Aê Diê dôk mbĭt ti krah phung ƀuôn sang Ñu hlăm ênuk Klei Bi Mguôp Hđăp. Ƀiădah dơ̆ng mơ̆ng mtao Y‑Đawit jing mtao kiă kriê ti Jêrusalem snăn Hip Klei Bi Mguôp amâo lŏ dôk hlăm Sang Yang ti Silô ôh ƀiădah dôk djă pioh ti sang Y‑Abinadap ti ƀuôn Kiriat-Jêrim (I Y‑Samuel 5:1–7:1). Hlăk anăn, mtao YĐawit čiăng ba Hip Klei Bi Mguôp wĭt kơ Jêrusalem snăn ñu “bi kƀĭn jih jang phung kahan jăk hĭn hlăm phung Israel” čiăng djă ba wĭt Hip Klei Bi Mguôp (êlan 1-2).
Ƀiădah, mtao Y‑Đawit amâo ngă djŏ tui si klei bhiăn Aê Diê ktrâo atăt ôh hlăk bi mđuĕ Hip Klei Bi Mguôp (Klei Yap 4:1-49). Hrô kơ klei brei phung Lêwi yua giê kkung Hip, bi diñu lĕ “mdiăng hip Aê Diê hŏng êdeh mrâo” jing sa mta êdeh đoh hŏng êmô phung Philistin khăng yua (I Y‑Samuel 6:1-21). Tui tluôn anăn, mtao Y‑Đawit leh anăn jih jang phung ƀuôn sang Israel kdŏ mmuñ kkuh mpŭ kơ Yêhôwa hŏng djăp mta đĭng brô̆ hgơr (êlan 3-5). Diñu hơ̆k mơak kyua mĭndah srăng mâo Aê Diê dôk mbĭt kyua Hip Klei Bi Mguôp. Ƀiădah amâo yŏng thâo ôh êmô đoh êdeh anăn têč hnêč jơ̆ng, leh anăn hlue si klei hmăr mgang yang đar, Y‑Usa jing pô atăt êlan kơ êdeh, yơr kngan djă kơ̆ng Hip Klei Bi Mguôp. Anei jing sa klei Aê Diê kăm ghă khut khat, amâo mâo pô dưi sô̆ Hip Klei Bi Mguôp ôh (Klei Yap 4:15). Khădah Y‑Usa čiăng răng mgang Hip Klei Bi Mguôp dưn ƀiădah wơr bĭt hĕ klei bhiăn Aê Diê, Yêhôwa čuh ai ngêñ leh anăn bi kmhal Y‑Usa djiê mtam ti djiêu Hip Klei Bi Mguôp (êlan 6-7).
Klei Aê Diê bi kmhal Y‑Usa kñăm čiăng mñă kơ Y‑Đawit pô leh anăn kơ jih jang phung ƀuôn sang brei khut khat gưt asăp Aê Diê hlăm jih jang klei truh. Bruă bi mđuĕ Hip Klei Bi Mguôp wĭt kơ Jêrusalem jing klei čiăng găl yơh ƀiădah brei ngă djŏ tui si hdră bhiăn Aê Diê mtô snăn kơh dưi mâo klei Aê Diê hơêč hmưi. Mtao Y‑Đawit ngă leh tui si hdră ñu mĭn leh anăn tŭ klei truh yơh. Kyua ăl kơ Aê Diê leh anăn huĭ kơ klei truh anăn, mtao Y‑Đawit amâo jhŏng ba Hip Klei Bi Mguôp wĭt kơ ƀuôn prŏng ôh ƀiădah ba dưm kơ sang Y‑Ôbet-Êđôm êjai tlâo mlan. Aê Diê hơêč hmưi kơ Y‑Ôbet-Êđôm leh anăn kơ jih phung hlăm sang gơ̆ (êlan 8-11).
Klei yăl dliê anei mñă kơ drei hlăm knhuah mă bruă leh anăn kkuh mpŭ kơ Aê Diê. Mtao Y‑Đawit leh anăn phung ƀuôn sang hơ̆k kdơ̆k kdŏ mmuñ ti anăp Yêhôwa kyua mĭndah diñu dôk ngă klei djŏ leh anăn bi mơak kơ Aê Diê. Ƀiădah diñu lui hĕ klei bhiăn Aê Diê leh anăn bi mđuĕ Hip Klei Bi Mguôp tui si hdră diñu pô mĭn. Hruê anei, lu Phung Sang Aê Diê năng ai hur har yơh hlăm klei kkuh mpŭ hŏng lu hdră êlan ƀiădah wơr bĭt hĕ tui duah klei Ñu čiăng. Drei amâo dưi ôh mă klei hur har čiăng hrô kơ klei amâo gưt asăp. Aê Diê čiăng kơ phung anak Ñu djă pioh klei bhiăn klei hdĭp mngăt hlăm klei kkuh mpŭ leh anăn brei “kkuh mpŭ hŏng mngăt leh anăn hŏng klei sĭt nik” djŏ tui si klei Khua Yang mtô.
Si ngă drei mđing uêñ mơ̆ čiăng bi mơak kơ Aê Diê hlăm klei drei kkuh mpŭ kơ Ñu?
Wah lač: Ơ Khua Yang, akâo kơ Ih đru hmei thâo kral klei Ih čiăng leh anăn hŏng jih ai tiê đup gưt. Brei kâo kkuh mpŭ kơ Ih hŏng klei djŏ, bi mơak kơ Ih nanao.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 9:35 – 11:9
Kênh Youtube BHKTHN:
