I Petus 2:1-3
Nqe cim:
“Nej yuav tsum ua li tus menyuam mos liab uas nyuam qhuav yug, tus menyuam ntawd ib sij yuav noj ib zaug mis uas yog cov kua mis dawbhuv ntawm sab ntsujplig. Yog nej haus cov kua mis ntawd nej yuav hlob zoo thiab nej yuav dim nej lub txim. Raws li Vajtswv txojlus hais tias, “Nej twb tau saj tus Tswv txoj koob hmoov lawm.” (I Petus 2:2-3a)
Lus nug rau sawvdaws xav:
– Tom qab uas los ntseeg tus Tswv, muaj lub siab dawbhuv, cov ntseeg Yexus yuav tsum ntshaw ua yam dabtsi?
– Ua li cas thiaj yog lub neej tau saj tus Tswv kev qab zib?
– Peb ua dabtsi kom tau ntxiv thiab qhia tshwm lub neej tau saj tus Tswv qab zib?
Timthawj Petus qhia rau cov ntseeg uas tabtom khiav mus nyob rau txhua qhov chaw hais tias thaum uas “nej mloog qhov tseeb ua rau nej muaj lub siab dawbhuv” (I Petus 1:22), nej twb “tso txhua yam phem, txhua yam kev dag, tsis tseeb, lub siab ntxub thiab hais lus phem” (nqe 1), ces qhov tseemceeb yog yuav tsum nyiam Vajtswv Txojlus zoo li tus menyuam nqhis mis.
Lo lus “yog” hauv nqe 3 qhia paub cov ntseeg uas tau saj tus Tswv kev qab zib lawm. Lo lus “saj” muaj lub ntsiab tias tau txais, siv. Thaum ib tug neeg twb tau saj tus Tswv kev qab zib, dhau tej kev ntsib raug tau zoo lossis txomnyem los lub siab yeej nqhis qhawv Vajtswv Txojlus thiab mloog Nws tej lus yog lub tswvyim ua rau peb tsis ua txhaum, phem qias. Qhov no tsuas tau txais thaum tus neeg ntawd zeem paub tias lub ntiajteb no tsuas nyob ib vuag, thiab “txhua tus puavleej zoo ib yam li tej nroj tsuag, thiab lawv lub hwjchim zoo ib yam li tej paj nroj xwb. Thaum tej nroj tsuag tuag tej paj nroj yuav zeeg tas.” (I Petus 1:24).
Lub neej uas twb tau saj tus Tswv kev qab zib, tsis yog mloog tus Tswv Txojlus kom tsis ua txhaum xwb, tiamsis nws “ib sij yuav noj ib zaug mis uas yog cov kua mis dawbhuv ntawm sab ntsujplig” (nqe 2). Lo lus “ib sij” hais txog lub siab nqhis nqhawv. Qhov kev sib piv ntawm lub siab nqhis nqhawv Vajtswv Txojlus zoo li tus menyuam mos liab nqhis mis, tus neeg uas ntseeg Vajtswv yeej xav kom sab ntsujplig loj hlob, xav kom loj hlob hauv txojkev cawm dim ces yuav tsum nqhis Vajtswv Txojlus, nyeem, kawm, xav txog lub siab nqhis zoo li tus menyuam mos liab nqhis mis kom loj hlob. Vim qhov ntawd, tus neeg ntawd yuav sawv ruaj khov rau sab kev ntseeg thaum muaj cua daj cua dub tuaj raug lub neej mus txog hnub uas ntsib tus Tswv ( nqe 3).
Yog tus ntseeg Yexus, tau tus Tswv zam txhua yam kev txhaum, tau yug dua tshiab ces peb yuav nyiam thiab ua raws Vajtswv Txojlus. Yuav tsum rau siab thiab nqhis Vajtswv Txojlus kom muaj hauvpaus hauvntsis, kom pab tau kev ntseeg yim hnub yim loj hlob, tiv taus kev sim, txomnyem los rau kev ua neej nrog tus Tswv mus. Yog peb loj hlob sab ntsujplig, tabtom ua tus Tswv haujlwm pab yaj me lossis loj, ces yuav tsum txo hwjchim kawm ntxiv rau lub neej sab ntsujplig thiab sab nqaij tawv raws li Timthawj Paulus tus qauv “Kuv niaj hnub tswj rawv kuv lub cev rau qhov kuv yeej yog tus uas qhia lwm tus. Yog kuv tsis tswj kuv lub cev ntshai nyob tsam kuv tsis tau nrog luag sib tw khiav.” (I Kauleethaus 9:27).
Thov Vajtswv,
Tus Tswv, nyuam yaus ua Koj tsaug vim Koj pub rau nyuam yaus tau saj tus Tswv kev qab zib dhau los ntawm tej koob hmoov nrog rau tej kev txomnyem hauv kev ua neej. Thov tus Tswv ntxiv lub siab hlub thiab nqhis Vajtswv Txojlus zoo ib yam li tus menyuam mos nqhis mis, kom nyuam yaus ua haum Koj siab. Nyuam yaus tuav Tswv Yexus lub npe thov. Amees.
Peb rau siab thiab nqhis kawm Vajtswv Txojlus txhua hnub li cas?
Nyeem Vajluskub hauv peb lub xyoo: Yelemis 5
Kênh Youtube BHKTHN:
