II Hơ’mon 33:21-25
“’Nĕ pơ-ư kơ năr dơning, Yua kơ ih ưh kơ băt năr dơning sư jing liơ.” (Tơdrong Pơđơ̆k 27:1)
Nơ̆r jet tơchĕng pơwao:
– Pơtao Ammôn nhen păng phara kơ ‘Bă sư ‘bơ̆t yơ?
– Yua iŏk tơdrong đêl sư pơm noh kiơ?
– Bơ̆n tơlĕch ‘bai pơhrăm hơyơ đơ̆ng tơdrong arih Pơtao Ammôn kơ đeh dêh noh?
Ammôn pơm Pơtao kơplah sư ‘nao ‘bar jĭt sơnăm păng sư pơgơ̆r ‘bar sơnăm. Nhen thoi ‘bă sư Manase pơm Pơtao, Pơtao Ammôn pơm tơdrong kơnê̆ ‘bơ̆t anăp Kră Yang ‘Bok Kei-Dei, kơkuh kơ lu rup yang mă ‘bă sư đei pơm păng bơ̆jang kơ lu sư. Mălei phara kơ ‘bă sư, Pơtao Ammôn ưh kơ đei tơ jur akâu kơdih ‘bơ̆t anăp Kră Yang ‘Bok Kei-Dei na pơm tơdrong yoch rai lơ. Đơ̆ng tơdrong noh, Kră Yang ưh kơ oei hơdai Pơtao Ammôn păng ưh kơ ăn tơdrong pŭn hiôk thoi ‘bă sư Pơtao Manase đơ̆ng rŏng kơ sư wih brŏk tơ Kră Yang. Mă khan đe rôp phak Pơtao Manase tơ Babylôn, mălei kơplah sư tơbral, tơ jur akâu kơdih ‘bơ̆t anăp Kră Yang lei na đei Kră Yang dŏng pơklaih, na sư brŏk tơ Jêrusalem pơm Pơtao dơ̆ng. Pơtao Ammôn ưh kơ chu tơ jur akâu yŏng jang kơ sư chă đon wă pơm kơ sư, na pơlôch hloi sư kơtă lăm hnam pơtao.
Mă khan Pơtao Manase đei adrin pơm tơplơ̆ kơ dôm tơdrong kơnê̆ đei pơm adrol ki sơ̆, mălei oei ‘bơm tơdrong kơnê̆ kơ kon pơlei (II Hơ’mon 33:17). Păng lăm tơdrong arih Ammôn. Lăm tơdrong arih sư, Pơtao Ammôn mă khan đei jơ năr wă tơ jur akâu kơdih ‘bơ̆t anăp Kră Yang ‘Bok Kei-Dei rok kiơ̆ kơmĭl ‘bă sư mălei pơtao rơih iŏk tơdrong kơnê̆ đơ̆ng ‘bă sư. Kơplah rơih iŏk pơm tơdrong kơnê̆ lei na sư kư̆m rơih iŏk ăn kơdih sư tơdrong phak đơ̆ng Kră Yang (II Hơ’mon 7:19-20). Tơdrong phak truh kơ Pơtao Manase kơplah đei pơm Pơtao truh kơ tơ dôm jĭt sơnăm, mălei tơdrong phak truh kơ Pơtao Ammôn đơ̆ng rŏng kơ pơm Pơtao ‘bar sơnăm. Pơtao Ammôn ưh kơ đei jơ năr lơ wă tơbral thoi ‘bă sư păng tơhiong lê̆ jơ năr truh ning mônh. Tơdrong hơ’mon gah tơdrong arih Pơtao Ammôn kơ đeh đei chih răk tơ’bôh đei gơh klaih iŏk trong kiơ̆ Kră Yang dah ưh, bơ̆jang kơ sư dah ưh, mălei ưh kơ sĭ mă layơ kư̆m đei jơ năr ngăl ôh.
Đơ̆ng jơhngơ̆m pơang păng jơhngơ̆m ‘bônh kơblôk đơ̆ng bơngai hơmu hơmong đei pơm kơ Pơtao Ammôn ưh kơ đei tơchĕng sô gô ‘bônh kơ hiong thoi noh. Tơplih kơ tơdrong kơkuh kơ Kră Yang ‘Bok Kei-Dei tơpăt tơpă (II Hơ’mon 33:13). Lei na Pơtao kơkuh păng bơ̆jang kơ lu rup yang lăm teh đak ưh kơ ‘bôh jing kon Kră Yang, lu bơ̆n kư̆m đei tơchĕng oei đunh dêh truh năr tơ’bơ̆p Kră Yang, ding dang yơ đei tơdrong arih hiôk rơngei dah mă lơ sơnăm ‘biơ̆ na hiơ̆k bơ̆jang kơ Kră Yang, dah bơ̆ng pơhiơ̆ lê̆ tơdrong pơm kơdranh ăn kơ bơngai bu ‘nei… Tơpă ưh kơ đei bu băt kơplah ayơ ‘Bok Krist jur păng kư̆m ưh kơ băt tơdrong kiơ gô truh tơ bơ̆n. Bơ̆n kư̆m ưh kơ băt bơngai mă bơ̆n wă pơm kơdranh noh oei pă dôm yơ jơ năr wă tơbral wih brŏk tơ Kră Yang. Kơlih thoi noh, apinh mă bu bu ‘nĕ pă pơhiơ̆ dơ̆ng, athei bơ̆jang kơ Kră Yang hloi păng adrin jah ră roi Tơdrong ‘Nao ‘Lơ̆ng.
Ơ Kră Yang, apinh Ih mơnat ăn kơ tơdrong inh pơhiơ̆ lê̆ tơdrong bơ̆jang kơ Kră Yang păng pơm kơdranh gah Kră Yang. Apinh Ih ăn kơ inh adrin bơ̆jang kơ Kră Yang păng ră roi Tơdrong ‘Nao ‘Lơ̆ng ‘năr âu hloi wă kơ huay kơ tơhiong lê̆ jơ năr Kră Yang ăn. Krao khan yua Anăn Kră Yang Yêsu Krist, Amen.
Bơ̆n oei bơ̆jang kơ Kră Yang dah bơ̆jang kơ bu lăm tơdrong arih kơ đeh dêh ‘nâu?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 16
Kênh Youtube BHKTHN:
