Klei Aê Diê Blŭ: Y‑Mathiơ 8:18-22
Êlan kliăng: “Ƀiădah Yêsu lač kơ ñu, “Tui hlue Kâo bĕ, leh anăn lui phung djiê dơr mă mnuih djiê diñu pô.” (Y‑Mathiơ 8:22).
Klei êmuh ksiêm mĭn: Hlei pô hriê kơ Khua Yang Yêsu leh anăn akâo čiăng tui hlue Ñu? Si Khua Yang lŏ wĭt lač kơ diñu? Ya mta klei yuôm hĭn čiăng dưi jing ƀĭng kna Khua Yang? Ya klei lông dlăng drei êjai êbat tui hlue Khua Yang grăp hruê?
Khua Yang kčưm dơ̆ng bruă Ñu hŏng klei mtô lač bŏ hŏng klei kơhưm, bi hlao lu mnuih ruă, leh anăn suôt yang jhat kyuanăn mâo nanao phung lu jŭm dar Ñu. Mâo sa čô khua čih hră jing pô mtô bi hriăm klei bhiăn kơ phung ƀuôn sang, bi êdah ai tiê mpŭ kơ Khua Yang hlăk ñu hriê akâo kơ Khua Yang čiăng tui hluê Ñu. Ƀiădah Khua Yang Yêsu brei ñu thâo săng kơ ênoh tla čiăng tui hlue Khua Yang jing dlông snăk, tơl wăt klei hdĭp kăn mâo klei hơĭt ênang rei, amâo mâo sang pưk, hruê anei dôk anôk anei mgi anôk mkăn čiăng hiu hưn mtô lač kơ Ƀuôn Ala Mtao Aê Diê. Khua Yang amâo čiăng ôh pô tui hlue Ñu kyua klei bi mčhuk ai ƀiădah brei ksiêm mĭn bi nik si ngă dưi săn asei, dưi tŭ klei dleh knap hŏng Khua Yang amâodah hơăi.
Mâo sa čô ƀĭng kna mkăn, tui hlue Khua Yang sui hruê leh, ƀiădah tơdah hmư̆ Khua Yang lač hŏng khua čih hră, snăn ñu lač hŏng Khua Yang brei ñu wĭt dơr ama ñu êlâo leh anăn srăng lŏ hriê tui hlue Khua Yang. Ama ñu ka djiê ôh, kyuadah tơdah dôk tŭ klei kơŭ kyăm ñu amâo dưi tui hlue Khua Yang ôh. Ñu knŏng čiăng wĭt guôn tơl ama ñu djiê, mkra klei dơr leh anăn bi leh hĕ klei mbha ngăn dưn leh anăn srăng lŏ wĭt kơ Khua Yang. Khua Yang wĭt lač kơ ñu, “Tui hlue Kâo bĕ, leh anăn lui phung djiê dơr mă mnuih djiê diñu pô.” (êlan 22). Khua Yang čiăng mtô snei, phung djiê hlăm mngăt srăng uêñ mĭn kơ bruă ti lăn ala anei, bi hlei pô mngăt adôk hdĭp, êlâo hĭn leh anăn kdlưn hĭn brei tui hlue Khua Yang, kyuadah bruă mtô Klei Mrâo Mrang Jăk kơ Ƀuôn Ala Mtao Aê Diê jing yuôm leh anăn jêč ruăt hĭn, amâo dưi dôk guôn ôh leh anăn amâo dưi dưm ôh ya mta klei mkăn êlâo hĭn. Kơ êdei, ăt msĕ hŏng klei mblang anăn mơh, Khua Yang mtô: “Hlei pô khăp kơ amĭ ama ñu lu hĭn kơ Kâo amâo năng kơ Kâo ôh; hlei pô khăp kơ anak êkei amâodah kơ anak mniê ñu lu hĭn kơ Kâo amâo năng kơ kâo ôh; leh anăn hlei pô amâo klam kyâo bi kal ñu leh anăn tui hlue Kâo amâo năng kơ Kâo ôh. ” (Y‑Mathiơ 10:37-38). Mtô hưn kơ Ƀuôn Ala Mtao Aê Diê brei jing bruă tal êlâo hĭn hlăm klei hdĭp pô tui hlue Khua Yang.
Tui hlue Khua Yang jing sa êlan êbat bŏ hŏng klei lông dlăng, čoh čuăn kơ drei thâodah êjai dôk găn ya mta klei truh dưn hlăm klei hdĭp ăt brei dưm Khua Yang leh anăn bruă mtô hưn Klei Mrâo Mrang Jăk êlâo hĭn kơ jih jang bruă mkăn hlăm klei hdĭp drei. Anei jing klei bi klăk hŏng klei mĭn mnuih yang đar. Klei mĭn bhiăn phung mnuih yap drei pô yơh jing jing yuôm hĭn, hrô kơ brei Khua Yang jing khua kơ klei hdĭp drei. Drei mâo nanao lu mta bruă yap yuôm kơ klei hdĭp drei pô dưm êlâo hĭn, hrô kơ klei dưm êlâo hĭn bruă Aê Diê. Lu mnuih kyuadah amâo dưi ôh hŏng klei ktŭng kdhăk ti krah dŭm mta klei anei, kyuanăn diñu lui êlan kniă ruah êlan prŏng êhai, ƀiădah amâo lŏ hdơr ôh ti knhal tuč êlan prŏng êhai anăn jing klei djiê. Bi tơdah drei kyua Khua Yang, dưi tŭ klei tla ênoh dlông dưn, ti knhal tuč êlan kniă jing klei hdĭp hlŏng lar.
Si ngă drei mprăp êmiêt ai tiê kăp tla ênoh čiăng tui hlue Khua Yang kluôm dhuôm mơ̆?
Wah lač: Ơ Khua Yang, jing Pô ruah leh anăn iêô leh kâo brei jing ƀĭng kna Ih. Akâo kơ Khua Yang đru kâo mprăp êmiêt ai tiê kăp tla ênoh leh anăn dưm Khua Yang leh anăn bruă Ih êlâo hĭn hlăm klei kâo hrŏng ruah grăp hruê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 9
Kênh Youtube BHKTHN:
