Klei Aê Diê Blŭ: Klei Bi Hriêng: 13:12-19.
Êlan kliăng: “Sa klei čiăng truh leh jing mmih kơ mngăt” (Klei Bi Hriêng 13:19a).
Klei êmuh ksiêm mĭn: Si ngă klei Mtao Y‑Salômôn bi hriăm anak ñu kơ klei čang hmăng hlăm klei hdĭp? Ya klei bhiăn brei drei hluê ngă čiăng klei čang hmăng dưi truh ? Si drei ba yua klei bhiăn anei čiăng kơ klei čang hmăng dưi truh jing sĭt?
Hlăm klei hdĭp grăp čô mâo sơaĭ klei čang hmăng kơ pô, kơ gŏ sang leh anăn Sang Aê Diê, ƀiădah dŭm klei čang hmăng anăn dưi truh sĭt amâodah hơaĭ tui hluê si lu mta. Mtao Y‑Salômôn thâo klă anak pô ăt mâo lu klei čang hmăng anăn ñu bi hriăm anak hdră čiăng klei pô čang hmăng dưi truh. Mâo mmông anak srăng ruă ai tiê, ênguôt hnĭng leh klei anak čang hmăng amâo dưi truh (êlan 12), ƀiădah ñu mtă kơ anak đăm ôh kyua klei amâo tŭ jing luč hĕ klei čang hmăng. Ñu mđĭ ai anak ñu, “klei čang hmăng truh leh jing sa ƀĕ kyâo klei hdĭp” (êlan 12), leh anăn ñu klah čŭn “Sa klei čiăng truh leh jing mmih kơ mngăt” (câu 19).
Hlăm dŭm êlan Klei Bi Hriêng anei, Mtao Y‑Salômôn bi hriăm anak ñu čiăng klei čang hmăng dưi truh sĭt brei hluê ngă dŭm klei bhiăn: Tal sa, brei anak hriăm klei thâo mĭn kyua “Klei huĭ mpŭ kơ Yêhôwa jing klei kčưm kơ klei thâo săng; phung mluk bi êmut kơ klei thâo mĭn leh anăn klei bi hriăm” (Klei Bi Hriêng 1:7). Klei thâo mĭn dưi bi êdah klă klơ̆ng tơdah anak mđing kơ klei mtô bi hriăm. Klei thâo mĭn srăng ba anak kơ “akŏ êa klei hdĭp” (êlan 14) leh anăn anak srăng dưi mâo klei jăk mơak mơ̆ng Aê Diê (êlan 15). Tal dua, brei anak bi êdah klei thâo mĭn hlăm klei hdĭp kpă ênô hluê si hnơ̆ng Aê Diê čuăn. Brei anak “thâo răng ngă jih bruă hŏng klei thâo mĭn” Aê Diê brei (êlan 16) leh anăn “sĭt suôr” hlăm djăp klei (êlan 17). Wăt tơdah tuôm hŏng klei dleh dlan amâodah klei hdĭp bi mlih si ngă dưn, snăn brei anak răng kriê klei hdĭp kpă ênô hlăm djăp bruă ngă. Tal tlâo, brei anak mprăp ai tiê leh anăn luă gŭ tŭ mă “klei mkra”. Hluê si klei mĭn khăng mâo sĭt tŭ klei mkra, tal êlâo anak srăng ƀuh ênguôt, ƀiădah tơdah anak hơĭt ai tiê ksiêm mĭn bi mklă klei bi hriăm leh anăn tŭ klei ƀuah mkra anăn čiăng lui klei soh, klei amâo djŏ, anak srăng tŭ jing hlăm klei hdĭp leh anăn srăng mâo klei mpŭ (êlan 18). Sĭt anak hluê ngă djŏ klei bhiăn anăn, klei anak čang hmăng srăng dưi truh sĭt, anak srăng bŏ hŏng ai ktang leh anăn mngăt ai tiê mâo klei jăk mơak.
Pô ksiêm hriăm klei đaŏ John Henry Jowett čih: “Sa klei klă sĭt huĭ hyưt hlăm klei amâo tŭ jing, anăn jing klei amâo gĭr lŏ lông ngă ôh”. Năng ai mâo lu klei drei čang hmăng ka dưi truh ôh, ƀiădah đăm êdu ai ôh, brei drei lŏ ksiêm dlăng klei pô hdĭp. Akâo kơ Khua Yang đru drei êdu êun tŭ klei ƀuah mkra, bi hriăm mơ̆ng amĭ ama, mơ̆ng phung khua gĭt gai hlăm klei hdĭp mngăt năng mpŭ amâodah phung khua mduôn mâo klei dưi brei hlăm Sang Aê Diê, gĭr, sĭt suôr hluê ngă klei Aê Diê ktrâo lač leh anăn hdĭp nanao hlăm klei kpă ênô, klă sĭt drei srăng mjing klei čang hmăng klă sĭt mơ̆ng pô truh jing sĭt.
Drei gĭr, sĭt suôr hluê ngă klei ktrâo lač mơ̆ng Aê Diê mơ̆?
Wah lač: Ơ Khua Yang, kâo bi mni lač jăk kơ Ih kyua Klei Aê Diê Blŭ mñă kơ kâo amâo êdu ai tơdah tuôm hŏng klei amâo tŭ jing. Akâo kơ Khua Yang brei kâo hdĭp hlăm klei kpă ênô Ih leh anăn đru kâo êdu êun tŭ mă klei ƀuah mkra, bi mlih klei êdu kƀah, klei soh pô.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 16:5-22
Kênh Youtube BHKTHN:
