Klei Aê Diê Blŭ: Rôm 13:11-14
Êlan kliăng: “Ngă bĕ snăn, kyuadah diih thâo leh kơ ênuk drei dôk truh leh mông diih mdih pĭt. Kyuadah klei bi mtlaih giăm hĭn hŏng drei hruê anei kơ hruê drei mrâo đăo” (Rôm 13:11)
Klei êmuh ksiêm mĭn: Si Khua ƀĭng kna Y-Pôl lač kơ ênuk ară anei hin? Ti klei jing pô brei phung đăo thâo săng hĕ leh anăn ya srăng ngă tơdah klei bi mtlaih giăm hĭn leh? Ya klei drei čuăn srăng bi mlih hĕ tơdah leh hriăm klei hriăm anei?
Khua ƀĭng kna Y-Pôl lač kơ ênuk drei dôk anei jing mnĭt mmông bi mlih msĕ si mdih pĭt, msĕ si mlam jĕ jih, adiê dơ̆ng mngač. “Pĭt” leh anăn “mlam” čiăng lač kơ ênuk mmăt tĭt leh anăn klei soh dôk ti gŭ klei Satan kiă kriê ară anei dơ̆ng ruĕ leh; bi klăk hŏng “mdih” leh anăn “mngač” jing sa ênuk mngač dơ̆ng truh, mphŭn kčưm tơdah Khua Yang Yêsu lŏ hriê. Ñu lač: “Kyuadah klei bi mtlaih giăm hĭn hŏng drei hruê anei kơ hruê drei mrâo đăo” (êlan 11). Mơ̆ng hruê kmhal kơ klei soh leh anăn đăo kơ Khua Yang Yêsu, phung đăo ăt mâo klei Khua Yang đru nanao, ƀiădah hlăm hruê Khua YangYêsu lŏ hriê kơh drei dưi bi knal kơ klei bi mtlaih hŏng klei klă ênŭm. Grăp hruê găn gao, ƀrư̆ drei nao giăm hĭn kơ hruê drei dưi dôk dơ̆ng ti anăp Khua Yang.
Khua ƀĭng kna Y-Pôl blŭ kñăm kơ klei sĭt nik snei: Phung đăo êjai dôk hdĭp ti lăn ala srăng bi blah nanao hŏng klei soh. Kyuadah leh drei đăo kơ Khua Yang Yêsu, knuih soh hlăm drei amâo luč ôh, kyuanăn brei drei knang kơ Khua Yang hŏng jih ai tiê toh hĕ bruă klei mmăt mơ̆ng klei hdĭp hđăp, leh anăn hơô ao klei mngač Khua Yang Yêsu hdĭp hŏng klei hdĭp mrâo (êlan 12). Wăt tơdah mâo Yang Mngăt Jăk mŭt hlăm ai tiê drei kăp mtô lač leh anăn atăt gai, ƀiădah knuih kđeh hlăm grăp čô drei ăt dôk hdĭp, kăp guôn mmông găl dưi plah mă jhưng mtao ai tiê drei, mtrŭt drei ngă “klei tă tăn amâodah kpiê ruă, ngă klei čhŏ mrŏ amâodah klei tlĕ piu, bi mneh msao amâodah bi nač” (êlan 13). Drei knŏng dưi hŏng klei soh tơdah drei hơô Khua Yang Yêsu Krist. Si tô hmô bi mguôp jing sa hlăm Ñu. Tŭ klei ƀaptem jing klei bi hmô kơ klei djiê mbĭt hŏng Ñu, dơr hĕ mnuih hđăp soh jhat mbĭt hŏng Ñu, leh anăn kbiă lŏ hdĭp mbĭt hŏng Ñu hŏng mnuih mrâo. Brei drei hơô klei mĭn leh anăn klei myang Ñu čiăng êbat hlăm klei mngač.
Tơdah thâo kơ hruê Khua Yang Yêsu lŏ hriê giăm hĭn leh, knư̆ brei phung đăo “ngă bĕ snăn” (êlan 11), čiăng lač brei drei huĭ mpŭ kơ Khua Yang, khăp kơ pô mkăn msĕ si kơ drei pô tui si klei Khua ƀĭng kna Y-Pôl mtă leh hlăm Rôm kdrêč 12, 13. Huĭ mpŭ kơ Aê Diê jing klei hưn bi sĭt kơ sa čô mâo Yang Mngăt Jăk dôk mbĭt, thâo hdơr knga kơ Khua Yang, leh anăn jing klei hưn yuôm bhăn snăk čiăng atăt lu mnuih jŭm dar drei wĭt đăo kơ Khua Yang. Ară anei hin jing mmông găl yuôm bhăn snăk kơ grăp čô drei ngă tui si klei mtă prŏng Khua Yang Yêsu mtă leh kơ drei.
Si ngă drei dôk hdĭp hŏng klei huĭ mpŭ kơ Aê Diê, jing klei bi hmô jăk kơ phung ka đăo lŏ wĭt kơ Khua Yang mơ̆?
Wah lač: Ơ Khua Yang, đru kâo dôk răng nanao hlăm ênuk knhal tuč anei, pơ̆ng asei mlei kâo ti kyâo bi kal mbĭt hŏng Ih, leh anăn hdĭp amâo djŏ kâo pô dôk hdĭp ôh, ƀiădah Ih hdĭp hlăm kâo. Bi mlih kâo jing msĕ si Khua Yang Yêsu hĭn grăp hruê leh anăn yua jih mmông găl čiăng jing pô hưn bi sĭt kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Bruă Mtao 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
