Loos 13:11-14
Nqe cim:
“Nej yuav tsum ua li no, rau qhov nej twb paub lawm hais tias lub sijhawm no yog caij sawv tsis yog caij pw. Rau qhov nimno txojkev cawm dim los ze peb dua thaum uas peb nyuam qhuav los ntseeg.” (Loos 13:11)
Lus nug rau sawvdaws xav:
– Timthawj Paulus zeem paub thiab hais txog lub sijhawm tamsim no zoo li cas?
– Cov ntseeg cheemtsum zeem paub yus tus kheej nyob qib twg thiab yuav tsum ua dabtsi thaum txojkev cawmdim los ze lawm?
– Peb muaj kev txiav txim siab hloov dabtsi thaum kawm tas zaj hnub no?
Timthawj Paulus zeem paub thiab hais txog lub sijhawm yuav tau hloov, zoo li pw yuav txog caij sawv, zoo li ib tag hmo dua twb yuav kaj ntug. “Pw” thiab “hmo ntuj” hais txog lub sijhawm tsaus ntuj nti thiab kev txhaum tiam no uas dab ntxwgnyoog kav tabtom yuav dua mus; txawv li “sawv” thiab “nruab hnub” uas yog qhov pom kev tabtom yuav los hnub Tswv Yexus rov qab los. Paulus tawm lus hais tias, “Rau qhov nimno txojkev cawm dim los ze peb dua thaum uas peb nyuam qhuav los ntseeg.” (nqe 11). Txij thaum tso kev txhaum tseg thiab ntseeg Tswv Yexus lawm, tus ntseeg nyob hauv tus Tswv txojkev pab cawm mus txog thaum tau txais txojkev cawm dim txaus nkaus hnub uas Nws rov qab los. Txhua hnub dhau mus, peb yim hnub yim mus ze hnub uas sawv ntawm Vajtswv lub xubntiag.
Timthawj Paulaus hais tias: Cov ntseeg ua neej nyob hauv lub ntiajteb yuav tsum niaj hnub tawmtsam txojkev txhaum. Vim thaum los ntseeg Yexus, peb tus yamntxwv ua txhaum tsis ploj mus, yog li peb yuav tsum vamkhom tus Tswv muab lub neej qub tso tseg, muab lub neej tshiab hauv Tswv Yexus los ua neej (nqe 12). Txawm yog Vaj Ntsujplig nyob hauv peb lub siab ntuas thiab coj peb los vim peb tus yamntxwv ua txhaum tseem nyob hauv peb, tos rawv lub sijhawm kav peb lub siab, coj yus mus ua neeg “qw ua nqaj ua nqug thiab haus cawv qaug, tsis txhob ua nkauj ua nraug thiab ua neeg tsis paub cai, tsis txhob sib cav sib ceg thiab sib khib.” nqe 13). Peb yuav kovyeej txojkev txhaum ces yog thaum peb muaj Tswv Yexus, txhais tau tias koom ua ib hauv tus Tswv, ua kevcai raus dej yog lub cim qhia tias nrog Tswv Yexus tuag, faus tus neeg qub, thiab nrog Tswv Yexus sawv rov los ua neeg tshiab. Peb hnav lub siab tshiab thiab tus Tswv lub hwjchim ua neej nyob hauv qhov kaj.
Thaum zeem paub tias ze lub sijhawm Tswv Yexus yuav los, cov ntseeg yim huab “yuav tsum ua li no” (nqe 11), txhais tau hais tias tus ntseeg zoo, hlub lwm tus ib yam li yus lub cev raws li Timthawj Paulus hais hauv Loos tshooj 12-13. Muaj kev ntseeg yog qhov timkhawv qhia hais tias muaj Vaj Ntsujplig, paub uas tus Tswv tsaug, thiab yog cov lus timkhawv coj tej neeg nyob ibncig peb los ntseeg Vajtswv. Nimno yog lub sijhawm tseemceeb kom peb txhua tus ua raws li Tswv Yexus cov lus samhwm.
Thov Vajtswv,
Tus Tswv! Thov Koj pab kom nyuam yaus niaj hnub ceevfaj ntsoov ua neej nyob tiam no, muab tus yamntxwv txhaum ntsia saum ntoo khaublig, thiab ua neej tsis yog ua rau nyuam yaus lawm, tiamsis yog ua neej pub rau tus Tswv. Thov Koj hloov kom nyuam yaus ua tau zoo li Tswv Yexus ua txhua hnub thiab siv sijhawm los ua timkhawv qhia Nws zaj. Nyuam yaus tuav Tswv Yexus lub npe thov, Amees.
Peb puas tabtom ua tus ntseeg zoo, ua qauv zoo coj tibneeg tsis ntseeg los cuag Vajtswv?
Nyeem Vajluskub hauv peb lub xyoo: II Vajntxwv 5
Kênh Youtube BHKTHN:
