Klei Aê Diê Blŭ: Hêbrơ 8:6-13
Êlan kliăng: “Ƀiădah ară anei Krist mâo leh bruă prŏng ti dlông hĭn kyua klei Ñu jing Pô ti krah kơ klei bi mguôp jăk hĭn, kyuadah Ñu mdơ̆ng klei bi mguôp anăn ti dlông klei ƀuăn jăk hĭn” (Hêbrơ 8:6)
Klei êmuh ksiêm mĭn: Ya klei bi mguôp hđăp leh anăn klei bi mguôp mrâo jing? Ya ngă anak mnuih čiăng mâo klei bi mguôp mrâo jăk hĭn? Si drei ƀuh tơdah thâo kơ drei dôk hdĭp hlăm mta klei bi mguôp mrâo amâo djŏ hlăm klei bi mguôp hđăp ôh?
Tơdah djă hdruôm hră Klei Aê Diê Blŭ hlăm kngan, drei dưi lač mtam ti jing kdrêč Klei Bi Mguôp Hđăp, ti kdrêč Klei Bi Mguôp Mrâo. Klei Bi Mguôp Hđăp jing klei bi mguôp Aê Diê ngă leh hŏng phung ƀuôn sang Israel găn hŏng khua gĭt gai Y-Môis, mdơ̆ng atur ti dlông klei bhiăn Ñu brei leh kơ phung ƀuôn sang, hlăm anăn kruak čua hlei pô gưt kơ klei Aê Diê mtă leh srăng mâo klei jăk jĭn, hlei pô amâo gưt ôh srăng tŭ klei Ñu bi kmhal (Klei Mtô Mñă Klei Bhiăn 29). Bi Klei Bi Mguôp Mrâo lĕ, jing klei mguôp Aê Diê ngă hŏng jih jang mnuih ti lăn ala anei, êlâo hĭn hŏng phung Israel, êdei tinăn hŏng jih jang mnuih, hŏng klei bi mguôp anăn Ñu srăng pap brei klei soh leh anăn brei klei jăk jĭn kơ hlei pô hriê kơ Ñu hŏng klei đăo kơ klei Yêsu Krist djiê hrô leh klei soh digơ̆ (Y-Mathiơ 26:27-28).
Pô čih hdruôm hră Hêbrơ mblang ya ngă čiăng drei mâo hĕ Klei Bi Mguôp Mrâo: “Kyuadah tơdah klei bi mguôp êlâo anăn amâo mâo klei kƀah ôh, amâo yuôm ôh lŏ mâo klei bi mguôp tal dua” (êlan 7). Klei Bi Mguôp Hđăp mâo klei kƀah amâo djŏ hlăm klei bi mguôp ôh ƀiădah hlăm pô ngă klei bi mguôp anăn. Khua ƀĭng kna Y-Pôl thâo săng klă kơ klei anei tơdah ñu lač: “Drei thâo kơ klei bhiăn jing myang; ƀiădah kâo jing kđeh, čhĭ leh jing hlŭn kơ klei soh” (Rôm 7:14). Anak mnuih hŏng knuih soh leh anăn awăt êdu amâo srăng dưi gưt kơ klei bhiăn kluôm ênŭm ôh, leh anăn tui si klei bi kuôl kă hlăm klei bi mguôp tal êlâo, jing klei bi mguôp hđăp, snăn anak mnuih srăng tŭ klei bi kmhal. Klei anei bi êdah klă hlăm klei hƀuê ênuk phung Israel, leh sui thŭn diñu amâo gưt ôh kơ klei bhiăn Aê Diê, thŭn 586 êlâo kơ Krist, phung kahan Ƀaƀilôn bi blah dưi hŏng diñu kluôm dhuôm leh anăn mâo lu mnuih arăng puh ba jing mnă.
Ti krah klei knap mñai phung ƀuôn sang Aê Diê, Khua pô hưn êlâo Y-Yêrêmi hưn leh kơ diñu mâo sa klei bi mguôp mrâo leh anăn hlăm klei bi mguôp anăn Aê Diê srăng pap brei klei soh diñu leh anăn lŏ bi mrâo klei diñu bi mguôp hŏng Aê Diê (Y-Yêrêmi 31:31-34). Pô čih hdruôm hră Hêbrơ yua klei hưn êlâo anei čiăng lač kơ klei jăk hĭn mơ̆ng klei bi mguôp mrâo leh anăn jih jang hlei pô đăo kơ Yêsu Krist dưi mŭt sơăi hlăm klei bi mguôp mrâo anei. Jăk êdimima kơ grăp čô drei hruê anei tơdah drei thâo kơ drei mâo leh klei Aê Diê tŭ amâo djŏ kyua bruă drei pô ngă ôh ƀiădah kyua bruă Yêsu Krist ngă leh ti dlông kyâo bi kal. Mông anei, amâo djŏ drei gĭr ktưn čiăng kơ Aê Diê tŭ ôh, ƀiădah brei drei knang kơ klei pap Aê Diê hdĭp năng hŏng mnuih mrâo mâo leh klei Aê Diê tŭ.
Si ngă drei dôk hdĭp năng hŏng klei jing sa čô mnuih mŭt hlăm klei bi mguôp mrâo leh mơ̆?
Wah lač: Ơ Khua Yang, kâo awăt êdimi, amâo mâo klă ênŭm ôh. Tơdah amâo mâo klei bi mguôp mrâo hlăm êrah Khua Yang Yêsu, kâo amâo srăng dưi ngă klei bi mơak kơ Ih ôh. Kâo lač jăk kơ Ih lu êdimi kyuadah Yang Mngăt Jăk Ih dôk hdĭp hlăm kâo. Đru kâo grăp hruê hdĭp năng hŏng klei jing sa čô mnuih dôk hlăm klei bi mguôp mrâo.
Dlăng Klei Aê Diê Blŭ hlăm tlâo thŭn: Y-Markôs 15:1-41
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
